Salmos 64:1-10
-
Jamasan atacañ amtapki uka jaqenakat jarkʼaqatäña
-
“Diosaw jupanakarojj flechtʼani” (7)
-
Directorataki. Davidan salmopa.
64 Dios Tata, ruwtʼasinksma ukhajj arujarojj istʼakimaya.+
Walpun atacapkitu uka enemigonakajat jakäwijar jarkʼaqtʼakimaya.
2 Kunanaktï jan wali jaqenakajj jamasan naya contra amtasipki ukanakat jarkʼaqtʼakitaya.+
Jan walinak lurir jaqenakat jarkʼaqtʼakitaya.
3 Mä espadar uñtataw jupanakajj lajjranakap afiltʼapjje,flechanakar uñtataw jan wali arunakapjja flechtʼañatak wakichtʼapjje,
4 ukhamat imantasipki uka lugarat jan juchani jaqer flechtʼañataki.
Mä akatjamatwa uka jaqerojj jan ajjsartʼas flechtʼapjje.
5 Jan wali amtanakapjja janiw jaytañ munapkiti,*kunjamsa trampanakap imantapjjaspa uka toqetwa parlapjje.
Jupanakajj akham sapjjewa: “¿Khitirak uñjanisti?”+ sasa.
6 Kunjamatsa mayninakarojj jan waltʼayapjjaspa ukjja jupanakajj thaqasipkakiwa,jan wali amtanakapjja jamasanwa amuytʼapjje,+sapa maynin chuymanakapan amtanakapajj janiw amuyañjamäkiti.
7 Ukampis Diosaw jupanakarojj flechtʼani.+
Jupanakajj mä akatjamatwa mä flechamp usuchjat uñjasipjjani.
8 Pachpa lajjranakapaw jupanakar tinkuyani,+taqe khitinakatï uñjapkani ukanakajj jiskʼachasaw pʼeqenakap khiwisipjjani.
9 Ukatjja taqe jaqenakajj wal ajjsarayasipjjani,kuntï Diosajj lurki ukwa jupanakajj yatiyapjjarakini,ukatsti kunanaktï Diosajj lurki uka toqetwa sum amuyapjjani.+
10 Cheqap sarnaqer jaqejj Jehová Dios laykuw kusisini, juparuw imantasirakini.+
Taqe khitinakatï cheqap chuymanïpki ukanakajj wal kusisipjjani.
Notanaka
^ Jan ukajja, “Jupanakajj jan wal lurañatakiw jupanakkam chʼamañchtʼasipjje”.
