Salmos 139:1-24
Directorataki. Davidan salmopa.
139 Jehová Dios Tata, jumaw chuymaj uñantistajja, jumaw uñtʼarakistajja.+
2 Kunapachas nayajj qontʼasta, kunapachas sartasirakta uk jumajj yattawa.+
Kunanaksa nayajj lupʼiskta* ukanakjja jayatpachwa jumajj amuytajja.+
3 Nayajj viajkta ukhasa nayajj iktʼaskta ukhas uñjistawa,taqe thakinakajwa jumajj uñtʼtajja.+
4 Jehová Dios Tata, kuntï nayajj arskä ukjja jumajj yatjjtawa,janïr kuns nayajj arskta ukhaw jumajj yatjjtajja.+
5 Nayar jarkʼaqañatakejj jumajj naya muytpachanktawa,jumaw katjjasirakistajja.
6 Jumajj wali sum nayarojj uñtʼistajja, ukajj wali musparkañapuniwa, janiw amuyirjamäkti.*
Wali altorakiwa, janiw nayajj alcansirjamäkti.*+
7 ¿Kawkirurak juman espiritumat nayajj escapiriststi?
¿Kawkirurak juma nayraqatat escapiriststi?+
8 Nayatï alajjpachar makatirista ukhajja, jumajj ukankasmawa,nayatï Sepulturan* jaqosiskirista ukhajja, jumajj ukankarakismawa.+
9 Chheqanakatï jilaqetaspa, wali jayar jalarakirista,ukhamat wali jayankir lamar qota jakʼan jakañataki ukhajja,
10 amparamaw ukan irpnaqetaspa,kupi amparamaw katjjasirakitaspa.+
11 Nayatï “¡cheqpachapuniw chʼamakajj nayar imantitani!” sasin sirista ukhajja,arumajj naya muytpachanwa qhanar tukuspa.
12 Chʼamakas janiw jumatakejj wali chʼamakäkaspati,jan ukasti chʼamakajj urjam wali qhanäspawa.+
Jumatakejj chʼamakas qhanas pachpakiwa.+
13 Jumaw riñonanakaj lurtajja,jumarakiw taykajan purakapan nayar jarkʼaqestajja.+
14 Nayajj wali musparkañ luratätwa, ukatwa nayajj wal musparta, jumarus jachʼañcharaksma.+
Luratanakamajj wali musparkañawa,+uk nayajj sum yatta.
15 Kunapachatï nayajj jamas lugaran luratäkayäta,+mamajan purakapan jilaskayäta ukhajja,chʼakhanakajajj janiw jumat imantatäkänti.
16 Janïr nayajj naskayäta ukhaw nayranakamajj nayar uñjitäna,cuerpojan taqpach partenakapaw libroman qellqantatäjjäna,cuerpojan partenakapajj kuna urunakansa formasïna ukas qellqantatäjjänwa,janïr ukanakajj utjkäna ukhaw qellqantatäjjäna.
17 ¡Juman amuyunakamajj nayatakejj wali sumawa!+
Dios Tata, ¡amuyunakamajj waljawa!+
18 Kunapachatï nayajj amuyunakam jaktʼañ yantʼta ukhajja, ukanakajj lamar qotankir chʼallat sipansa jukʼamp waljawa.+
Alwajj nayajj sartkta ukhajja, jumampïskaktwa.*+
19 Dios Tata, ¡mirä amp suma, ojalay jan wali jaqenakar jiwayasma!+
Ukhamatwa jaqe jiwayirinakajj* nayat jitheqtapjjani,
20 khitinakatï jan wali amtamp* juma contra parlapki ukanaka.
Jupanakajj juma contra saytʼirïpjjewa, sutimjja jan walinakatakiw aytapjjaraki.+
21 Jehová Dios Tata, ¿janit nayajj uñisirinakamarojj uñisktjja?+
¿Janit nayajj juma contra saytʼasirinakat ajjtasktjja?+
22 Jupanakarojj nayajj wal uñista,+jupanakajj cheqpach enemigonakajaruw tukupjje.
23 Dios Tata, chuymaj uñantita, chuymajsa uñtʼarakim.+
Chuymaj uñantita, llakisiykitu uka amuyunakajsa uñtʼarakim.+
24 Kuna jan wali lurañ amuyunakas nayan utji uk uñjam,+wiñay thaknam irpita.+
Notanaka
^ Jan ukajja, “piensaskta”.
^ Jan ukajja, “ukajj wali musparkañawa”.
^ Jan ukajja, “nayajj amuykirista ukat sipansa jukʼampiwa”.
^ Ukajja, “nayajj jaktʼaskaktwa” sasaw jaqokipasirakispa.
^ Jan ukajja, “wila wartir jaqenakajj”.
^ Jan ukajja, “amuyunakaparjam”.
