1. Anton organisasyon ya mangirerepresentad si Jehova so insalat ed apostatan Israel? (Nengnengen so litratod sayan pahina.)

SARAY lingkor nen Jehova natan diad dalin et mandadayew ed sikato diad paraan ya labay to. Singa naaralan ed imbeneg ya artikulo, say nasyon na Israel so pinili nen Jehova bilang totoo to nensaman. Balet nan-apostata ira. Kanian sinalatan ira nen Jehova na balon nasyon ya tugyopen na saray papatumbok na Kristo. Nagmaliw iran organisasyon a mangirerepresenta ed si Jehova. Nansiansia itan ya organisasyon anggano aderal so Jerusalem nen 70 C.E. (Luc. 21:20, 21) Saraman ya agawa nen inmunan siglo so pakapatnagan no anto met so nagawad saray lingkor nen Jehova ed sarayan kaunoran ya agew. Asingger lan naandi so sistema nen Satanas, balet mansiansia so organisasyon na Dios. (2 Tim. 3:1) Panon itayon makaseguro?

2. Antoy imbaga nen Jesus nipaakar ed “baleg a kairapan,” tan panon itan ya onggapo?

² Impasakbay nen Jesus no antoy nagawa diad kaunoran iran agew: “Wala naani so baleg a kairapan ya agni agawa  manlapud inggapo na mundo anggad natan, anggapo ni, tan agla nagawa lamet.” (Mat. 24:3, 21) Onggapo so baleg a kairapan no usaren la nen Jehova so politikal iran pakayari pian deralen so “Makapanyarin Babilonia,” say sankamundoan ya empiryo na palson relihyon. (Apo. 17:3-5, 16) Antoy onsublay ya nagawa?

3. Kayarin naderal so palson relihyon, antoy salien ya gawaen nen Satanas ed saray lingkor nen Jehova?

³ Kayarin naderal so palson relihyon, si Satanas tan saray nanduruman kabiangan na sistema to et onatakid saray lingkor nen Jehova. Nipaakar ed ‘Gog ed dalin na Magog,’ oniay ibabaga na Biblia: “Onsegep ka naani, onsabi ka naani a singa sakey a bagyo, singa ka naani sakey a lurem a manakbong ed dalin, sika, tan saray amin ya ulop mo, tan dakel a balbaley a niulop ed sika.” Lapud anggapo ray sundalo tan armas na Saray Tasi nen Jehova tan sikara so sankadeenan ya totoo ed mundo, singa main-inomay iran atakien. Balet, baleg itan a lingo!—Eze. 38:1, 2, 9-12.

4, 5. Antoy gawaen nen Jehova ed plano nen Satanas ya deralen iray lingkor to?

⁴ Antoy gawaen na Dios ed plano nen Satanas ya deralen iray lingkor to? Onkiwas si Jehova parad sikara, tan ipanengneng toy kanepegan to bilang Soberano ed Uniberso. Parad si Jehova, no aatakien iray lingkor to et singa sikaton mismo so aatakien da. (Basaen so Zacarias 2:8.) Kanian onkiwas a tampol so Ama tayod tawen pian iliktar to tayo. Diad satan la onggapo so Armagedon, say “guerra a nagawa ed baleg ya agew na Dios a Makapanyarin-amin,” tan sigpot lan naderal so mundo nen Satanas.—Apo. 16:14, 16.

⁵ Impropesiya nen Jeremias ya mismon si Jehova so milaban diad Armagedon: ‘Si Jehova wala so pisangsangan to ed saray nasyon; sikato so mangukom ed amin a laman. No nipaakar ed saray marelmeng, yawat to ra naani ed kampilan, kuan nen Jehova. Onia so kuan nen Jehova na saray ehersito, Nia, say mauges ompaway a manlapu ed nasyon angga ed nasyon et sakey a baleg a bagyo so onalagey a manlapu ed kasampotan a kabiangan na dalin. Et saray pinatey nen Jehova ed satan ya agew manlapu ed sakey a sampot na dalin angga met lanlamang ed sananey a sampot na dalin; ag-ira napaney-eyan, tan ag-ira met natipon, o nitabon; magmaliw iran dutak ed tapew na dalin.’ (Jer. 25:31-33) Diad Armagedon et mangangga la iyan mauges a sistema na bengabengatla. Naderal so mundo nen Satanas, balet mansiansia so kabiangan na organisasyon nen Jehova ya walad dalin.

6, 7. (a) Iner so panlalapuan na saray kabiangan na “baleg ya ulop”? (b) Anto ray agawan inyaligwas diad imbebeneg iran taon?

⁶ Onaaligwas so kabiangan na organisasyon na Dios ya walad dalin lapud saray totoo ditan et aabobonan to. Ipapaseguro na Biblia: “Saray mata nen Jehova et onnenengneng ed saray matunong, tan saray layag to et onderengel ed masimoon a pikakasi ra.” (1 Ped. 3:12) Kaibad sarayan matunong so “sakey a baleg ya ulop” ya “nanlapud baleg ya irap.” (Apo. 7:9, 14) Sarayan makaliktar et aliwa labat ya “sakey ya ulop” noagta “sakey a baleg ya ulop”—dakdakel iran maong. Imadyin mo pa no antoy naliknam no sakey kad saray kabiangan na baleg ya ulop ya makaliktar ed “baleg ya irap”!

⁷ Saray kabiangan na baleg ya ulop et nanlapud amin a bansa. Natitipon ira lapud panagpulong a kimey ya impasakbay nen Jesus ya kaibad tanda na kiwawala to. Inkuan to: “Sayan maong a balita na panarian so nipulong ed interon dalin bilang  pantasi ed amin a nasyones, insan onsabi so anggaan.” (Mat. 24:14) Diad sarayan kaunoran ya agew, satan so manunan kimey na organisasyon na Dios. Lapud sankamundoan ya panagpulong tan panagbangat na Saray Tasi nen Jehova, naaralan na minilyon ya totoo no panon dan dayewen so Dios “diad espiritu tan katuaan.” (Juan 4:23, 24) Singa bilang, manlapud 2003 ya service year anggad 2012, masulok ya 2,707,000 so nampabautismo bilang simbolo na dedikasyon dad Dios. Natan et wala lay masulok ya 7,900,000 ya Tasi ed interon mundo, tan minilyon ni mililimog ed sikara, lalo lad tinaon ya Memoryal na impatey na Kristo. Siempre, agtayo itan ilalastog ta ‘say Dios so mamapabaleg.’ (1 Cor. 3:5-7) Balet malikeliket itayo ta kada taon et lalon ondarakel so baleg ya ulop.

8. Akin et ontan lay iyaaligwas na organisasyon nen Jehova natan?

⁸ Talagan dinmakerakel iray lingkor nen Jehova diad dalin ta sikaton mismo so onsusuportad saray Tasi to. (Basaen so Isaias 43:10-12.) Satan ya idarakel et impropesiya nen Isaias: “Say daiset magmaliw naani a sanlibo, et say melag magmaliw naani a mabiskeg a nasyon. Siak, si Jehova, sikato naani gawaen ko a magano ed panaon to.” (Isa. 60:22) Dati et “daiset” labat iray alanaan ya nakekera diad dalin balet dinmakel ira nen tinipon so arum nin kabiangan na “Israel na Dios.” (Gal. 6:16) Ontan met, lapud panamendisyon nen Jehova, diad ilalabas na taon et tuloytuloy ni so idarakel na baleg ya ulop.

9. Antoy nepeg tayon gawaen pian naeksperiensya tayoy marakep ya arapen ya insipan na Dios?

⁹ Insipan nen Jehova so marakep ya arapen ed sikatayon amin balanglan alanaan itayo odino kabiangan na baleg ya ulop. Balet pian naeksperiensya tayo itan, kaukolan tayon unoren iray pagagawa to. (Isa. 48:17, 18) Nonoten pa ray Israelita nensaman ya kaukolan ya manpasakop ed Mosaikon Ganggan. Say sakey ya gagala na satan et pian naprotektaan so bansan Israel panamegley na saray ganggan nipaakar ed seksual ya kondukta, panagnegosyo, pamabaleg ed ananak, dugan panagtrato ed kaparan too, tan arum ni. (Exo. 20:14; Lev. 19:18, 35-37; Deu. 6:6-9) Ontan met ed sikatayo natan. Saray ganggan na Dios et parad proteksion tan pankaabigan tayo. Tan amta tayon aliwan makapabelat so pangunor ed saratan. (Basaen so 1 Juan 5:3.) Diad tua, no panon ya prinotektaan na Ganggan iray Israelita nensaman, say pangunor tayod ganggan tan prinsipyo nen Jehova natan et aglabat manprotektad sikatayo noagta ontulong met pian mansiansia itayon “mabiskeg ed pananisia.”—Tito 1:13.

10. Akin et nepeg ya mangigana tayoy panaon parad panaral na Biblia tan sinimban Panagdayew na Pamilya?

¹⁰ Say kabiangan na organisasyon nen Jehova ya walad dalin et onaaligwas ed nanduruman paraan. Alimbawa, mas lalon onlilinew so pakatalos tayod katuaan ed Biblia. Ontan so mismon ibabaga na Biblia, ya ‘say basbas na matunong et singa liwawa na kabuasan, ya onsinag lan onsinag angga ed nagnap ya agew.’ (Uli. 4:18) Balet tepetan tayoy sarili tayo: ‘Kasin antak iray balon pananguman ed pakatalos tayod pigaran teksto? Kasin niyugalik ya basaen ya inagew-agew so Biblia? Kasin labalabay kon basaen iray publikasyon tayo? Kasin walay sinimban Panagdayew na Pamilya mi?’ Aliwa iratan ya mairap, balet nepeg ya mangigana tayoy panaon pian nagawaan tayo iratan. Importantin maong ya aralen tayoy Salita na Dios, iyaplika itan, tan mibansag ed iyaabante na organisasyon na Dios—lalo la ta asingsingger la so baleg ya irap!

11. Panon ya makagunggona iray piesta nensaman tan saray aral, asemblea, tan kombension natan?

 ¹¹ Papasesegen itayo na organisasyon ya tumboken iyan simbawa nen apostol Pablo ya parad pankaabigan tayo: “Nonoten tayo so sakey tan sakey pian makapansasagyatan itayo a mangaro tan manggawa na maabig, ya agtayo papaulyanan so pantitipon tayo, a singa niyugali na arum, noagta manpapasesegan itayo, nagkalalo la ta nanenengneng yon asingsingger lay agew.” (Heb. 10:24, 25) Saray tinaon ya piesta tan arum nin pantitipon et amabiskeg ed espiritualidad na saray Israelita nensaman. Saray selebrasyon ya singa say Piesta na Kobongkobong nen panaon nen Nehemias et maliket ya okasyon. (Exo. 23:15, 16; Neh. 8:9-18) Natan et wala met iray aral, asemblea, tan kombension tayo. Nepeg ya atendian tayon amin iratan pian mansiansia tayon mabiskeg ed espiritual tan maliket tayon manlingkor ed si Jehova.—Tito 2:2.

12. Antoy nepeg ya panmoria tayod panagpulong a kimey?

¹² Lapud kabiangan itayo na organisasyon na Dios, maliket tayon mibibiang ed “masanton kimey na maong a balita na Dios.” (Roma 15:16) No mibiang tayod satan ya “masanton kimey,” magmaliw itayon “kakimeyan” nen Jehova, say “Masanton Dios.” (1 Cor. 3:9; 1 Ped. 1:15) Diad pangipupulong tayod maong a balita, napapasanto so ngaran nen Jehova. Talagan baleg a pribilehyo ya nimatalek ed sikatayo so “maglorian maong a balita na maliket a Dios.”—1 Tim. 1:11.

13. Iner akadepende so mabiskeg ya espiritualidad tayo tan say mismon bilay tayo?

¹³ Labay na Dios ya mansiansia tayon mabiskeg ed espiritual diad iyapit tayod sikato tan isuportad organisasyon to ed nanduruman paraan. Imbaga nen Moises ed saray Israelita: ‘Tawagen ko so tawen tan say dalin a mantasi ed sika ed sayan agew, ya inyan ko ed arap mo so bilay tan say patey, say bendisyon tan say ayew; tan pilien mo so bilay pian manbilay ka, sika tan say kapolian mo, diad pangaro ed Jehova a Dios mo, panumpal ed boses to, tan ipeket ed sikato; ta sikato so bilay mo tan kinarukey na saray agew mo, ta pian makapanayam ka ed dalin ya insamba nen Jehova ya iter tod saray amam, a di Abraham, Isaac tan Jacob.’ (Deu. 30:19, 20) Say bilay tayo et akadepende ed panggawa tayoy linawa nen Jehova, pangarod sikato, idengel ed boses to, tan iyapit ed sikato.

14. Antoy panmoria na sakey a brother ed nanengneng a kabiangan na organisasyon na Dios?

¹⁴ Naaralan nen Brother Pryce Hughes so katuaan antis na 1914, tan nansiansian matoor ed si Jehova tan ed organisasyon To diad interon bilay to. Imbaga to: “Say sankaimportantian ya naaralan ko et say pansiansian maapit ed nanengneng a kabiangan na organisasyon nen Jehova. Apaneknekan kod eksperiensyak nensaman ya talagan makapuy so panmatalek ed kanonotay too. Manlapu la nen amoriak itan, nagmaliw ak ya determinadon mansiansian matoor ed organisasyon. Wala ta ni arum ya paraan ya nagamoran tayoy pabor tan bendisyon nen Jehova?”

15. Mangiter na Makasulatan ya alimbawa no antoy dugan panmoria ed saray pananguman ed pakatalos tayod Biblia.

¹⁵ Pian abobonan tan bendisyonan nen Jehova so balang sakey ed sikatayo, nepeg ya suportaan tayoy organisasyon to tan awaten tayo ray pananguman ed pakatalos tayod Kasulatan. Niay sakey ya alimbawa nensaman: Kayari impatey nen Jesus, walay piganlibon Judion Kristiano ya maseseg nin manguunor ed Ganggan. (Gawa 21:17-20) Balet kinorihe ira nen Pablo tan  impamoria tod sikara ya posible labat so kaperdona na kasalanan da panamegley na “impangiyapay ed laman nen Jesu-Kristo,” aliwan diad panamegley na saray “bagat ya iyaapay unong ed Ganggan.” (Heb. 10:5-10) Inawat na dakel ed sarayan Judio so simbawa nen Pablo, inuman day panagnonot da, tan inmaligwas irad espiritual. Kaukolan ya makuli tayo met ya manaral tan lukas so nonot tayo no wala ray pananguman ed pakatalos tayod Salita na Dios o diad panagpulong tayo.

16. (a) Akin et nibaga tayon malikeliket so bilay ed Paraiso? (b) Antoy labalabay mon naeksperiensya ed Paraiso?

¹⁶ Amin ya mansiansian matoor ed si Jehova tan ed organisasyon to et tuloytuloy ya makaawat na bendisyon. Awaten na saray matoor ya alanaan so marakep ya pribilehyon nakaiba si Jesus ya manuley ed tawen. (Roma 8:16, 17) No diad dalin so ilalo tayo, imadyin pay liket na bilay ed Paraiso. Lapud kabiangan itayo na organisasyon nen Jehova, malikeliket tayon ibabagad arum so insipan na Dios ya balon mundo! (2 Ped. 3:13) ‘Saray mauyamo et tawiren da so dalin tan manliket irad inkadaakan na kareenan,’ so kuan na Salmo 37:11. ‘Manpaalagey tayo na saray abung, tan panayaman tayo iratan’ tan panliketan tayo ray “gawa na saray lima” tayo. (Isa. 65:21, 22) Anggapo lay makaeksperiensyay ag-inkahustisya, irap, tan eras. (Sal. 72:13-16) Lapud naandi lay Makapanyarin Babilonia, anggapo lay mangikayat na saray palson bangat. (Apo. 18:8, 21) Napaoli iray inaatey tan walay pankanawnawa ran manbilay na andi-angga. (Isa. 25:8; Gawa 24:15) Talagan makapaliket so ilalo na saray minilyon ya dedikadon lingkor nen Jehova! Pian nanengneng tayoy pakasumpal na saratan ya sipan, nepeg ya bilang indibidual et mantultuloy tayon onaligwas ed espiritual, tan mibansag tayod iyaabante na organisasyon na Dios.

17. Antoy nepeg ya panmoria tayod si Jehova tan ed organisasyon to?

¹⁷ Lapud manasingger lay anggaan na sayan sistema, komon ta mansiansian mabiskeg so pananisia tayo tan matoor tayon dayewen si Jehova diad organisasyon to. Say nalilikna tayo et onman met ed si David nen inkansion to: ‘Sakey a pamaakaran so kinerew ko ed Jehova, a satan so anapen ko: say pakapanayam ko komon ed abung nen Jehova ed amin ya agew na bilay ko, ya mangamayo [“onnengneng,” NW] ed karakpan nen Jehova, tan manbalita ed templo to.’ (Sal. 27:4) Komon ta balang sakey ed sikatayo et mansiansian maapit ed si Jehova, tan mibansag ed iyaabante na organisasyon to.