Onlad karga

Onlad saray karga

 INALAD DAAN IRAN KOLEKSION MI

“Dakel ni Kaukolan ya Anien”

“Dakel ni Kaukolan ya Anien”

Sinmabi si George Young ed Rio de Janeiro nen Marso 1923

SAY taon et 1923. Napnapno so concert hall na Drama and Music Conservatory diad São Paulo! Kasin narerengel yoy malinlinew ya boses nen George Young? Kada sentence na paliwawa to et ipapatalos ed salitan Portuguese. Madengedengel so amin ya 585 a wadman. Saray teksto na Biblia ed salitan Portuguese et nanengneng ed screen. Tan diad sampot na paliwawa to, imbunog so nilasus a kopya na bokletan Millions Now Living Will Never Die! diad salitan Portuguese, tan wala met ed English, German, tan Italian. Maabig so resulta na paliwawa! Abalitaan iyan tampol na dakel. Kayari duay labi, napno lamet so hall parad sakey nin paliwawa. Akin et agawa iratan?

Nen 1867, inmalis manlapud United States si Sarah Bellona Ferguson tan say pamilya to diad Brazil. Nen 1899, amta nen Sarah ya nalmo to lay katuaan kayari ton binasa iray pigaran literatura na Biblia ya inawit na agi tod Brazil manlapud United States. Lapud mahilig ya manbasa, sikatoy nan-subscribe na English ya Watch Tower. Lapud aliketan a maong ed mensahe na Biblia, sinulatan toy Brother C. T. Russell, ya imbaga ton sikatoy “prueba ya anggapoy toon agnasabi anggan panon kaarawi.”

Can the Living Talk With the Dead? (diad salitan Portuguese)

Ginawa nen Sarah Ferguson so anggaay nayarian to pian inabang ed arum so katuaan ed Biblia. Mabetbet ton isipen balet no siopay ontulong ed sikato, say pamilya to, ontan met ed saray totood Brazil. Nen 1912, imbagad sikato na Bethel diad Brooklyn ya walay onlad São Paulo tan awit to ray nilibon tract ya Where Are the Dead? diad salitan Portuguese. Nen 1915, imbaga ton talagan pankelawan to ya dakel ed saray Estudyante na Biblia so maniilalon asingger lay iyakar dad tawen. Imbalikas toy liknaan to diad sulat to: “Panon to balet iray walad Brazil tan amin ya walad South America? . . . No nanengneng yo labat no panoy kabaleg na South America, seguradon nibaga yon tampol  ya dakel ni kaukolan ya anien.” On, dakdakel ni kaukolan ya anien!

Nen manga 1920, inmatendi so waloran marinero ya taga Brazil ed pigaran pantitipon diad New York City legan ya aapigeren so barko dan parad guerra. Nen pinmawil irad Rio de Janeiro, innabang dad arum so balon naaralan dan ilalo a walad Biblia. Ag-abayag nen Marso 1923, si George Young, sakey a pilgrim odino ombiabiahen manangasikaso, et linmad Rio de Janeiro, ya ditan et akalmo na saray interesado. Inyuksoy toy pangipatalos ed pigaran publikasyon diad salitan Portuguese. Ag-abayag et nambiahe si Brother Young paonlad São Paulo, insan linmad syudad ya walay manga 600,000 a manaayam. Sikatoy nampaliwawa ditan tan angibunog na bokletan Millions, a singa abitlad gapo na sayan artikulo. “Lapud bukbukor ko,” so inreport to, “mandedepende ak labat ed dyaryo pian mangiyabawag.” Saratan so “inmunan paliwawad publiko a walad dyaryo diad Brazil ya sinuportaan tan inaprobaan na I.B.S.A.,” so inyarum to. *

Saray teksto na Biblia et nanengneng ed screen legan na paliwawa nen Brother Young

Diad sakey a report nipaakar ed Brazil, oniay inkomento na Watch Tower ya Disyembre 15, 1923: “No isipen mi inggapo na kimey diman nen Hunyo 1, tan anggapo nin balot so literatura ed saman, talagan makapadinayew so impamendisyon na Katawan ed kimey.” Imbaga ni na report ya say paliwawa nen Brother Young ed São Paulo et 2 ed samay 21 ya paliwawa manlapud Hunyo 1 anggad Setyembre 30, ya ami-amin et walay 3,600 ya inmatendi. Diad Rio de Janeiro, kalkalnan linmaknab so mensahe na Panarian. Tan diad loob labat na pigaran bulan, masulok a 7,000 ya publikasyon tayo ed salitan Portuguese so nibunog! Sakey ni, say The Watch Tower ed salitan Portuguese et ginmapon im-publish diad isyu ya Nobyembre-Disyembre 1923.

Si Sarah Bellona Ferguson, sankaunaan ya nan-subscribe na English ya Watch Tower diad Brazil

Linmay George Young ed si Sarah Ferguson, tan oniay imbaga na The Watch Tower: “Pinmaway so sister ed balkon, tan diad gapo et agmakasel. Binembenan toy lima nen Brother Young tan sankanengneng ton maong so lupa to, insan inkuan to: ‘Tuan Pilgrim kayo?’” Ag-abayag et sikato tan saray apatiran anak to et abautismoan. Diad tua, sikatoy 25 taon lan manaalagar ya nabautismoan! Imbaga na Agosto 1, 1924 a Watch Tower ya 50 so abautismoan ed Brazil, maslak et diad Rio de Janeiro.

Natan, manga 90 taon lay linmabas, agti la itepet ya: “Panon to balet iray walad Brazil tan amin ya walad South America?” Masulok ya 760,000 iran Tasi nen Jehova so mangipupulong na maong a balita diad Brazil. Tan natan et nipapasabi met lad interon South America so mensahe na Panarian diad salitan Portuguese, Spanish, tan dakel ni ran lokal ya lenguahe. Nen 1915, duga so imbaga nen Sarah Ferguson ya “Dakel ni kaukolan ya anien.”—Inalad daan iran koleksion mi diad Brazil.

^ par. 6 Say kabaliksan na I.B.S.A. et International Bible Students Association.

[Credit Line]

Acervo Fotográfico da Light