Unonan Pedro 1:1-25
1 Siak, si Pedro, ya apostol+ nen Jesu-Kristo, so nansulat ed saray temporaryon miaayam tan nitaytayak ed Ponto, Galacia, Capadocia,+ Asia, tan Bitinia, saramay pinili
2 unong ya amta lan unona na Dios ya Ama tayo,+ diad panamasanto na espiritu,+ pian sikaray magmaliw a matulok tan nawalsikan na dala nen Jesu-Kristo:+
Ondaak komon ed sikayo so agnaparaan a kaabigan tan kareenan na Dios.
3 Narayew komon so Dios tan Ama na Katawan tayon Jesu-Kristo, ta lapud baleg a panangasi to et niyanak itayo lamet+ diad sakey ya agmanganggan ilalo+ diad panamegley na inkioli nen Jesu-Kristo manlapud inaatey,+
4 diad sakey ya agnaderal, agnarutakan, tan ag-onkupas a tawir.+ Niparaan itan ed tawen parad sikayo+
5 a sasalimbengan na pakayari na Dios lapud pananisia yo. Sasalimbengan kayo parad sakey a kililiktar ya iparungtal diad kaunoran a panaon.
6 Lapud saya et malikeliket kayo, anggaman diad antikey a panaon et nakaukolan yoy manermen lapud nanduruman subok,+
7 pian diad panamegley na asubok a kualidad na pananisia yo,+ a mabmabli ni nen say balitok a nadederal anggano asubok* itan ed apoy, et makaawat kayoy dayew tan gloria tan galang sano omparungtal lay Jesu-Kristo.+
8 Anggaman sikatoy agyon balot anengneng, sikatoy aaroen yo. Anggaman sikatoy agyo nanenengneng natan, ipapatnag yoy pananisia ed sikato tan malikeliket kayo, ya agnadeskribe tan alay abig itan a nalilikna yo,
9 ta amta yon say pananisia yo et manresulta ed kililiktar yo.*+
10 Nipaakar ed sayan kililiktar, saray propeta, a nampropesiya nipaakar ed agnaparaan a kaabigan a parad sikayo, et maseet a nanusisa tan maalwar a nananap.+
11 Intultuloy dan sinukayan no anton espisipikon panaon odino no anton klase na panaon so tutukoyen na espiritun walad sikara nipaakar ed si Kristo,+ ta akauna lan tinasian na espiritu so nipaakar ed panirap nen Kristo+ tan saray maglorian bengatla a nagawa kayari na saraya.
12 Imparungtal ed sikara a say panlilingkor da et aliwan parad sikara, noagta parad sikayo, ya intarya da iramay bengatlan inyabawag lad sikayo na saramay angipakabat na maong a balita ed sikayo diad tulong na masanton espiritu a nanlapud tawen.+ Sarayan bengatla et pirpirawat a natalosan na saray anghel.
13 Kanian iparaan yoy nonot yo parad impasyan kimey;+ mantultuloy kayon manlikas diad amin a paraan;+ iteen yoy ilalo yo ed agnaparaan a kaabigan ya ipagamor ed sikayo sano omparungtal lay Jesu-Kristo.
14 Bilang matulok ya ananak, agkayo la manpapaimpluensya ed saray pilalek yo nensaman sanen anggapo ni kakabatan yo,
15 noagta magmaliw kayon masanto diad amin a kagagawa yo,+ a singa samay Masanton Dios ya anawag ed sikayo,
16 ta nisulat: “Nepeg a magmaliw kayon masanto, lapud masanto ak.”+
17 Tan no ontatawag kayo ed Ama ya anggapoy lalabien to sano manguukom+ unong ed kimey na kada sakey, manbilay kayon walaay takot ed sikato+ legan a sikayoy temporaryon miaayam ed sayan mundo.
18 Ta amta yo a nibulos kayo*+ ed andi-kakanaan a paraan na kabibilay yo a tinawir yo ed inmuunan atateng yo,* aliwan diad panamegley na saray bengatlan naderal, a singa say pilak odino balitok.
19 Imbes, nibulos kayo diad panamegley na mablin dala,+ a singa say dala na kordero ya andiay pakabalawan tan malinis,+ say dala nen Kristo.+
20 Tua, sikatoy pinili la na Dios antis a niletneg so mundo,+ balet sikatoy nipatnag diad kasampotan na saray panaon nisengeg ed sikayo.+
21 Diad panamegley to et nagmaliw kayon mananisia ed Dios,+ samay amaoli ed sikato manlapud inaatey+ tan angiter ed sikato na gloria,+ pian say panisiaan tan panilaloan yo et say Dios.
22 Natan ta nilinisan yo lay inkasikayo* diad itutulok yo ed katuaan a nanresulta ed masimoon ya aroan na sanaagi,+ manaaroan kayon maong manlapud puso.+
23 Ta diad salita na mabilay tan andi-anggaan a Dios et niyanak kayo lamet,+ aliwan diad panamegley na nabulok a bini,+ noagta diad panamegley na agnabulok a bini.*+
24 Ta “amin a totoo* et singa dika, tan amin a gloria ra et singa rosas ed uma; say dika et nalenes, tan say rosas et napagpag,
25 balet say salita nen Jehova* et mansiansia ya anggad angga.”+ Tan sayan “salita” et samay maong a balita ya impakabat ed sikayo.+
Paimanod leksab
^ Odino “pinapuro.”
^ Odino “kililiktar na kamarerwa yo.”
^ Literal, “dinondon kayo.”
^ Odino “ed panamegley na tradisyon.”
^ Odino “kamarerwa yo.”
^ Salanti, say bini a makapawala na bunga.
^ Literal, “amin a laman.”
^ Nengnengen so Apendise A5.
