Levitico 19:1-37
19 Oniay inkuan ni nen Jehova ed si Moises:
2 “Mitongtong kad amin ya Israelita tan ibagam ed sikara, ‘Nepeg kayon magmaliw a masanto, ta siak, si Jehova a Dios yo, et masanto.+
3 “‘Nepeg a respetoen* na balang sakey ed sikayo so ina tan ama to,+ tan nepeg yon ngilinan iray sabaton ko.+ Siak si Jehova a Dios yo.
4 Agkayo onaasingger ed saray andi-kakanaan a dirios+ odino igawaan yoy inkasikayo na saray dirios a gawad metal.+ Siak si Jehova a Dios yo.
5 “‘Natan, no mangiyapay kayo na bagat a pandurungoan parad si Jehova,+ nepeg yon ibagat itan ed paraan a nagamoran yoy panangabobon to.+
6 Nepeg a kanen itan diad agew na pangibagat yo tan diad ontumbok ya agew, balet samay nakera anggad komatlon agew et nepeg a poolan.+
7 Balet, no kanen so antokaman ed satan diad komatlon agew, makapadimla itan a bengatla tan agnaabobonan.
8 Ebatan na samay mangan ed satan so kasalanan to, lapud pinabanday to so masanton bengatla nen Jehova, tan satan a too* et nepeg ya ekalen* ed saray kabaleyan to.
9 “‘Sano anien yo so bunga na dalin yo, agyo aanien so amin a walad gilig na uma yo tan agyo dodokdoken so natudtor* ed nan-anian yo.+
10 Ontan met, agyo aalaen iray akera ed kaubasan yo odino dodokdoken iray napnaplag ya ubas ed kaubasan yo. Itilak yo iratan parad mairap-bilay*+ tan dayo. Siak si Jehova a Dios yo.
11 “‘Agkayo mantatakew,+ agkayo mansasaol,+ tan agkayo mansasaolan.
12 Agkayo mansasamba na tila diad ngaran ko,+ ta napabanday so ngaran na Dios yo. Siak si Jehova.
13 Agyo sasaolen so kapara yon too,+ tan agkayo mantatakew.+ Nepeg yon iter ed sakey ya uupaan a trabahador so bayar to ya agla itan nasanlabian ya anggad kabuasan.+
14 “‘Agyo aayewen* so sakey a telek odino mangiyan kayoy pakapatiran na sakey a bulag,+ tan nepeg yon takotan so Dios yo.+ Siak si Jehova.
15 “‘Nepeg a makatunongan so pangukom yo. Agyo pipilaan so mairap-bilay odino papaboran so mayaman.+ Nepeg yon ukomen so kapara yon too unong ed inkahustisya.
16 “‘Agkayo onliliber ed saray kabaleyan yo pian mangikayat na panagpauges.+ Agyo ipepeligro so bilay* na kapara yon too.*+ Siak si Jehova.
17 “‘Agyo nepeg a busolen so agi yo diad puso yo.+ Nepeg yon ipetek so kapara yon too,+ pian agkayo makapinonong ed kasalanan to.
18 “‘Agkayo ombabales+ odino maneem-em na sakit na linawa ed saray ananak na kabaleyan yo, tan aro yoy kapara yon too a singa ed sikayon dili.+ Siak si Jehova.
19 “‘Nepeg yon sumpalen iray totontonen ko: Agyo pankakastaen so nandumaan a klase na kokomponien yon ayayep. Agyo tataneman na duaran klase na bini so uma yo,+ tan agkayo mansusulong na kawes a gawad duaran klase na impanlaok a tinebey.+
20 “‘No inakdolan na sakey a laki so sakey a biin aripen ya apilin magmaliw ya asawa na arum a laki balet agni arondon odino nibulos, nepeg iran dusaen. Ingen, ag-ira nepeg a pateyen, ta say bii et aliwa nin bulos.
21 Nepeg ya iyakar na laki ed si Jehova so apay to parad impakasumlang diad lolooban na tolda a pantitiponan, sakey a kalakian a karnero ya apay parad impakasumlang.+
22 Say saserdote et manggaway pananakbong parad sikato diad arapan nen Jehova ed panamegley na kalakian a karnero ya apay parad impakasumlang ya onkana parad impankasalanan to, tan sikatoy naperdona ed impankasalanan to.
23 “‘Sano onloob kayod dalin ya iter kod sikayo tan mantanem kayo na antokaman a kiew parad naakan, nepeg yon ipasen ya agmalinis tan sebel* so bunga na satan. Sebel* itan ed sikayo diad loob na taloy taon. Ag-itan nepeg a kanen.
24 Balet diad komapat a taon, amin a bunga na satan et magmaliw a masanto ya onkana ed panliliket diad arapan nen Jehova.+
25 Tan diad komaliman taon, nayarian yo lan kanen so bunga na satan pian niarum itan ed aanien yo. Siak si Jehova a Dios yo.
26 “‘Agkayo mamangan na alaokay dala.+
“‘Agkayo manpaparles unong ed saray tanda tan agkayo manmamahiko.+
27 “‘Agyo kikiskisen* so buek ed gilig na ulo yo* odino katlien so nguro na balbas yo.+
28 “‘Agyo susugaten so laman yo nisengeg ed sakey ya inatey a too,*+ tan agyo tatatoan so inkasikayo. Siak si Jehova.
29 “‘Agmo papabandayen so anak mon bii diad panggawam ed sikaton paabang a bii,+ pian say dalin et agnarutakan na prostitusyon tan agnapano na mabanday iran kagagawa.+
30 “‘Ngilinan yo iray sabaton ko+ tan igalang* yoy santuaryok. Siak si Jehova.
31 “‘Agkayo onaasingger ed saray espiritista,+ tan agkayo onkokonsulta ed saray managparles,+ pian agkayo magmaliw ya agmalinis lapud sikara. Siak si Jehova a Dios yo.
32 “‘Alagey kad arapan na sakey ya ubanan,+ tan nepeg mon igalang so masiken,+ tan nepeg mon takotan so Dios mo.+ Siak si Jehova.
33 “‘No walay dayo a miaayam ed sikayo diad dalin yo, agyo nepeg a maltratoen.+
34 Samay dayon miaayam ed sikayo et nepeg yon ipasen a singa niyanak ya Israelita ed limog yo;+ tan sikatoy aroen yo a singa sikayon dili, ta dayo kayon manaayam nensaman diad dalin na Ehipto.+ Siak si Jehova a Dios yo.
35 “‘Agkayo manguusar na masaol iran simbangan sano mansukat kayoy karukey, kabelat, odino karakel.+
36 Nepeg kayon mangusar na suston simbangan, suston panagsukat na belat, suston panagsukat na amaga iran bengatla,* tan suston panagsukat na likido.*+ Siak si Jehova a Dios yo, ya angipaway ed sikayo diad dalin na Ehipto.
37 Kanian nepeg yon sumpalen so amin a totontonen ko tan amin a ganggan ko, tan nepeg yon tumboken iratan.+ Siak si Jehova.’”
Paimanod leksab
^ Literal, “takotan.”
^ Odino “kamarerwa.”
^ Odino “pateyen.”
^ Odino “imay akera.”
^ Odino “napapairap.”
^ Odino “pansasalitaay mauges.”
^ Literal, “dala.”
^ Odino posiblin, “Agkayo labat manalalagey no walad peligro so bilay na kapara yon too.”
^ Literal, “singa say katat na kayarian to.”
^ Literal, “Ag-asegat.”
^ Odino “babawasan; kakatlian.”
^ Odino “kakatlian iray patilya yo.”
^ Odino “nisengeg ed sakey a kamarerwa.” Say Hebreon salitan nephesh ed sayan bersikulo et manutukoy ed sakey ya inatey a too.
^ Odino “pandinayewan.” Literal, “takotan.”
^ Literal, “sakey a suston efa.” Nengnengen so Apendise B14.
^ Literal, “sakey a suston hin.” Nengnengen so Apendise B14.
