Levitico 17:1-16
17 Inkuan ni nen Jehova ed si Moises:
2 “Mansalita kad si Aaron tan saray ananak to tan amin ya Israelita tan ibagam ed sikara: ‘Oniay ingganggan nen Jehova:
3 “‘“No walay siopaman ed sankaabungan na Israel a mamakger na sakey a kalakian a baka odino kilaw a kalakian a karnero odino kanding, diad loob na kampo odino ed paway na kampo,
4 imbes ya iyakar to itan ed lolooban na tolda a pantitiponan pian iyapay ed si Jehova diad arap na tabernakulo nen Jehova, satan a too et mankasalanan ed dala. Sikatoy amaagus na dala, tan sikatoy nepeg ya ekalen* ed saray kabaleyan to.
5 Saya et pian aliwa lan diad uma so pamakgeran na saray Israelita ed ayayep da, noagta iyakar da iratan ed si Jehova diad lolooban na tolda a pantitiponan, dia ed saserdote. Nepeg ya ibagat da iratan bilang bagat a pandurungoan parad si Jehova.+
6 Tan iwalsik na saserdote so dala diad altar nen Jehova diad lolooban na tolda a pantitiponan tan paaseweken to so taba bilang ambalingit* ya angob parad si Jehova.+
7 Kanian agla ra nepeg a mangiyapay na saray bagat ed saray singa-kanding a demonyo*+ a pandadayewan* da.+ Saya so manbayag a ganggan parad sikayo, diad amin a henerasyon yo.”’
8 “Ibagam ed sikara, ‘Siopaman a too ed sankaabungan na Israel odino dayon manaayam ed limog yo a mangiyapay na apay a popoolan odino sakey a bagat
9 tan agto itan iyakar ed lolooban na tolda a pantitiponan pian iyapay ed si Jehova et nepeg ya ekalen* ed saray kabaleyan to.+
10 “‘No walay siopaman ed sankaabungan na Israel odino siopaman a dayon manaayam ed limog yo a mangan na antokaman a klase na dala,+ ipulisay ko itan a too* a mamangan na dala, tan sikatoy ekalen* kod kabaleyan to.
11 Ta say bilay* na laman et walad dala,+ tan inter kon mismo itan diad altar+ parad sikayo pian makapanggaway pananakbong parad sikayo,* lapud say dala so manggaway pananakbong+ ed panamegley na bilay* a walad satan.
12 Kanian inkuan ko ed saray Israelita: “Anggapo* ed sikayo so nepeg a mangan na dala, tan anggapoy dayon manaayam ed limog yo+ a nepeg a mangan na dala.”+
13 “‘No mangerel na ayep so sakey ed saray Israelita odino dayon manaayam ed limog yo tan makalay atap ya ayep odino manok a nayarin kanen, nepeg ton iyibung so dala na satan+ tan tabonan toy dabok.
14 Ta say bilay* na amin a klase na laman et say dala to, lapud say bilay* et walad satan. Kanian inkuan kod saray Israelita: “Agyo nepeg a kanen so dala na antokaman a klase na laman, lapud say bilay* na amin a klase na laman et say dala to. Siopaman a mangan ed satan et nepeg ya ekalen.”*+
15 No say siopaman,* balanglan niyanak ya Israelita odino sakey a dayo, et mangan na ayep ya inatey la odino biningbingkas na atap ya ayep,+ nepeg ton ipesak iray kawes to tan manames, balet sikatoy agmalinis ya anggad labi;+ kayari na satan et sikatoy magmaliw lan malinis.
16 Balet no agto ipesak iratan tan agto amesen so sarili to,* ebatan to so kasalanan to.’”+
Paimanod leksab
^ Odino “pateyen.”
^ Odino “makapakepay liknaan; makapakalmay liknaan.” Literal, “makapainawa.”
^ Literal, “saray kanding.”
^ Odino “pilalawananan.”
^ Odino “pateyen.”
^ Odino “kamarerwa.”
^ Odino “pateyen.”
^ Odino “kamarerwa.”
^ Odino “kamarerwa yo.”
^ Odino “kamarerwa.”
^ Odino “Anggapoy kamarerwa.”
^ Odino “kamarerwa.”
^ Odino “pateyen.”
^ Odino “kamarerwa.”
^ Odino “kamarerwa.”
^ Odino “siopaman a kamarerwa.”
^ Literal, “laman to.”
