Levitico 18:1-30
18 Onia ni inkuan nen Jehova ed si Moises:
2 “Mitongtong kad saray Israelita tan ibagam ed sikara, ‘Siak si Jehova a Dios yo.+
3 Agyo aaligen so kagagawa na saramay walad dalin na Ehipto a nanayaman yo, agyo aaligen so kagagawa na saramay walad dalin na Canaan, a pangiyakaran kod sikayo.+ Tan agyo tutumboken iray totontonen da.
4 Nepeg yon unoren iray ganggan ko, tan nepeg yon sumpalen iray totontonen ko tan tumbok yo iratan.+ Siak si Jehova a Dios yo.
5 Nepeg yon sumpalen iray totontonen ko tan saray ganggan ko; siopaman a manggagawa ed saya et manbilay ed panamegley na saratan.+ Siak si Jehova.
6 “‘Anggapoy nepeg ya onasingger ed maapit a kanayon to pian akdolan to.*+ Siak si Jehova.
7 Agmo nepeg ya akdolan so amam, tan agmo nepeg ya akdolan so inam. Sikatoy inam, tan sikatoy agmo nepeg ya akdolan.
8 “‘Agmo nepeg ya akdolan so asawa nen amam.+ Mangiter itan na kababaingan ed amam.*
9 “‘Agmo nepeg ya akdolan so agim a bii, balanglan sikatoy anak nen amam odino anak nen inam, balanglan sikatoy niyanak ed parehon sankaabungan odino andi.+
10 “‘Agmo nepeg ya akdolan so apom a bii ed anak mon laki odino ed anak mon bii, lapud mamabanday itan ed sika.
11 “‘Agmo nepeg ya akdolan so anak a bii na asawa nen amam, say ilalak nen amam, ta sikatoy agim.
12 “‘Agmo nepeg ya akdolan so bii ya agi nen amam. Sikatoy kanayon nen amam.+
13 “‘Agmo nepeg ya akdolan so bii ya agi nen inam, ta sikatoy kanayon nen inam.
14 “‘Agmo iikday kababaingan so lakin agi nen amam* diad piakdol mod asawa to. Sikatoy panginaen mo.+
15 “‘Agmo nepeg ya akdolan so manugang mon bii.+ Sikatoy asawa na anak mo, kanian agmo nepeg ya akdolan.
16 “‘Agmo nepeg ya akdolan so asawa na agim a laki,+ ta mangiter itan na kababaingan ed agim a laki.*
17 “‘Agmo nepeg ya akdolan so sakey a bii tan say anak ton bii.+ Agmo nepeg ya alaen bilang asawa so apo ton bii ed anak ton laki odino ed anak ton bii pian akdolan mo. Sikaray maapit a kakanayon to; mabanbanday itan a kagagawa.*
18 “‘Agmo aalaen so sakey a bii pian iyarum mo ed agi ton bii bilang komaduan asawam+ tan sikatoy agmo nepeg ya akdolan legan a mabilay ni so agi to.
19 “‘Agmo aakdolan so bii legan na panreregla to.+
20 “‘Agmo nepeg ya akdolan so asawa na kaparam a too,* a gawaen moy inkasikan agmalinis.+
21 “‘Agmo iyaabuloy a niyapay* ed si Molec+ so siopaman ed saray ilalak mo. Agmo papabandayen so ngaran na Dios mo ed ontan a paraan.+ Siak si Jehova.
22 “‘Agka miaakdol ed sakey a laki a singa piaakdol mod sakey a bii.+ Makapadimla itan a kagagawa.
23 “‘Agnepeg a misekso so sakey a laki ed sakey ya ayep tan magmaliw ya agmalinis lapud satan; odino iyasingger na sakey a bii so inkasikato ed sakey ya ayep pian misekso ed satan.+ Sumlang iya ed no antoy nisipor.
24 “‘Agyo dudutakay inkasikayo diad antokaman ed sarayan bengatla, ta saray nasyon a pataynanen ko ed arapan yo et dinutakan day inkasikara lapud sarayan amin.+
25 Kanian arutakan so dalin, tan dusaen ko itan lapud kasalanan to, tan iyula na dalin iray manaayam ditan.+
26 Balet sumpal yo iray totontonen ko tan saray ganggan ko,+ tan agyo nepeg a gawaen so antokaman ed sarayan makapadimlan bengatla, balanglan niyanak ya Israelita odino sakey a dayon manaayam ed limog yo.+
27 Ta amin irayan makapadimlan bengatla et gagawaen na saray totoon manaayam ed dalin antis yo,+ tan natan et arutakan so dalin.
28 Diad ontan et agkayo iyula na dalin lapud panudutak yo ed satan a singa pangiyula tod saray nasyon antis yo.
29 No walay siopaman a manggawa ed anggan dinan ed sarayan makapadimlan bengatla, amin iramay* manggagawa ed saratan et nepeg ya ekalen* ed saray kabaleyan da.
30 Nepeg yon sumpalen so obligasyon yod siak diad agyo panggagawa ed anggan dinan ed sarayan makapadimlan kaugalian a gagawaen antis yo,+ pian agyo nadutakan so inkasikayo lapud saratan. Siak si Jehova a Dios yo.’”
Paimanod leksab
^ Literal, “pian iparungtal so inkalakseb to.” Nausar ed sayan bersikulo tan ed ontumbok iran pakabasaan.
^ Literal, “Inkalakseb itan nen amam.”
^ Literal, “ipaparungtal so inkalakseb na lakin agi nen amam.”
^ Literal, “inkalakseb itan na agim a laki.”
^ Odino “makapabaing itan a kagagawa; imoral itan.”
^ Odino “kaabay mo; kaulop mo.”
^ Odino “nidedika; nibagat.”
^ Odino “a kamarerwan.”
^ Odino “pateyen.”
