Levitico 24:1-23
24 Onia ni inkuan nen Jehova ed si Moises:
2 “Iganggan mo iray Israelita a mangiyakar ira ed sika na puron larak na olibo parad pansilew, pian agbalot naerep iray lamparaan.+
3 Diad paway na kurtina na Testimonya, diad loob na tolda a pantitiponan et nepeg a seguroen nen Aaron ya agbalot naerep iray lamparaan manlapud labi ya anggad kabuasan diad arapan nen Jehova. Sakey iyan permanentin ganggan parad amin a henerasyon yo.
4 Nepeg a naynay ton iyuksoy iray lamparaan diad tapew na puron balitok a kandelero+ diad arapan nen Jehova.
5 “Mangala kay pinon arina tan gawam iyan 12 kurti-singsing a tinapay. Nepeg a duaran kakaplo na sakey ya efa* so usaren ed kada tinapay.
6 Pantatapewan mo iratan ed nankaduan dasig, anemira ed kada dasig,+ diad puron balitok a lamisaan diad arapan nen Jehova.+
7 Mangiyan kay puron olibano diad tapew na kada dasig, tan onkana itan bilang tinapay parad apay a mangirepresenta*+ a pinoolan parad si Jehova.
8 Diad kada agew na Sabaton, nepeg a naynay ton iyuksoy itan diad arapan nen Jehova.+ Sakey itan a manbayag a sipanan ed saray Israelita.
9 Magmaliw itan a kien nen Aaron tan saray ananak to,+ tan kanen da itan diad masanton pasen,+ ta satan et bengatlan sankasantosan parad sikato manlapud saray apay a pinoolan parad si Jehova, bilang manbayag a totontonen.”
10 Natan diad limog na saray Israelita et walay sakey ya anak na biin Israelita tan sakey a lakin Ehipsio,+ tan nanlaban iran dua diad kampo, sikato tan samay lakin Israelita.
11 Samay anak na biin Israelita et pinauges to so Ngaran* tan inayew to itan.*+ Kanian sikatoy inyakar dad si Moises.+ Say ina to et si Selomit, ya anak nen Dibri manlapud tribu nen Dan.
12 Sikatoy inkulong da ya anggad malinew lad sikara so desisyon nen Jehova.+
13 Insan imbaga nen Jehova ed si Moises:
14 “Ipaway yod kampo imay angayew, tan amin ya akadngel ed sikato et itapew day lima ra ed ulo to, tan sikatoy tupaken na amin a totoon nantitipon.+
15 Tan ibagam ed saray Israelita, ‘No walay siopaman a mangayew ed Dios to, ebatan toy kasalanan to.
16 Kanian nepeg a pateyen imay mamapauges ed ngaran nen Jehova.+ Nepeg a sikatoy tupaken na amin a totoon nantitipon. Nepeg a pateyen so balanglan dayo odino niyanak ya Israelita a mamapauges ed Ngaran.
17 “‘No say sakey a too et mamatey na too, sikatoy nepeg a pateyen.+
18 Siopaman a mamatey ed ayep* na arum a too et nepeg ton bayaran itan, bilay parad bilay.*
19 No sakitan na sakey a too so kapara ton too, nepeg a gawaen ed sikato no antoy ginawa to.+
20 Pukel parad pukel,* mata parad mata, ngipen parad ngipen; nepeg a gawaen met ed sikato so ginawa ton impamasakit.+
21 Say toon mamatey ed ayep na arum a too et nepeg ton bayaran itan,+ balet samay mamatey ed sakey a too et nepeg a pateyen.+
22 “‘Saksakey a ganggan so onaplika parad sikayo, balanglan dayo odino niyanak ya Israelita,+ ta siak si Jehova a Dios yo.’”
23 Insan akitongtong si Moises ed saray Israelita, tan impaway dad kampo imay angayew, tan sikatoy tinupak da.+ Kanian ginawa na saray Israelita so ingganggan nen Jehova ed si Moises.
Paimanod leksab
^ Say duaran kakaplo na sakey ya efa et 4.4 litro. Nengnengen so Apendise B14.
^ Odino “bilang pakanodnonotan (mangirerepresenta) a parte na satan.”
^ Salanti, say ngaran a Jehova, a singa walad bersikulo 15 tan 16.
^ Odino “nansalitay mauges ed satan.”
^ Odino “Tan samay mamatey na kamarerwa na ayep.”
^ Odino “kamarerwa parad kamarerwa.”
^ Odino “aputer a pukel.”
