Levitico 6:1-30
6 Onia ni inkuan nen Jehova ed si Moises:
2 “No walay siopaman* a nankasalanan tan agnanmatoor ed si Jehova+ diad impamalikdo tod kaabay to nipaakar ed bengatlan nimatalek ed sikato,+ odino ed bengatlan impaisinop ed sikato, odino tinakewan to odino sinaol to so kaabay to,
3 odino sikatoy akalmo na bengatlan abalang tan intila to itan, tan nansamba na tila ed anggan dinan ed sarayan kasalanan a nayarin ginawa to,+ oniay nepeg ton gawaen:
4 No sikatoy nankasalanan tan apaneknekan itan, nepeg ton ipawil so tinakew to, kinatkat to, inala to diad impansaol to, say nimatalek ed sikato, odino bengatlan abalang a nalmo to,
5 odino antokaman a sengegay impansamba to na tila, tan nepeg ton bayaran so interon kantidad na satan,+ tan aruman to ni na kakalima na samay kantidad. Iter to itan ed akankayarian diad agew ya apaneknekan so kasalanan to.
6 Tan bilang apay to parad impakasumlang ed si Jehova, sikatoy mangiyakar ed saserdote na andiay depekton kalakian a karnero manlapud pulok unong ed akuentan kantidad ya onkanan apay parad impakasumlang.+
7 Manggawa na pananakbong so saserdote parad sikato diad arapan nen Jehova, tan sikatoy naperdona ed antokaman a ginawa to a sengegay impankasalanan to.”+
8 Oniay inkuan ni nen Jehova ed si Moises:
9 “Iganggan moy Aaron tan saray ananak to, ya ikuan mo, ‘Saya so ganggan nipaakar ed apay a popoolan:+ Nepeg a sanlabin mansiansia so apay a popoolan ed tapew na altar ya anggad kabuasan, tan pansiansiaen a mandarlang so apoy ed altar.
10 Isulong na saserdote so kawes to a linen,+ tan isulong to so linen a karsonsilyo* to.+ Insan ekalen to iray dapol*+ na apay a popoolan a pinoolan diad tapew na altar tan iyan to iratan ed abay na altar.
11 Insan to lakseben iray kawes to+ tan mansulong na sananey tan awiten to iray dapol diad malinis a pasen ed paway na kampo.+
12 Pansiansiaen a mandarlang so apoy ed altar. Ag-itan nepeg a naerep. Nepeg a kinabuasan a sungloran itan na saserdote+ tan iyalasir to so apay a popoolan ed tapew na satan, tan paaseweken to so taba na saray bagat a pandurungoan ed tapew na satan.+
13 Pansiansiaen a mandarlang so apoy ed altar. Ag-itan nepeg a naerep.
14 “‘Natan, saya so ganggan nipaakar ed apay a kakanen:+ Sikayo ran ananak nen Aaron so nepeg a mangiyapay ed satan diad arapan nen Jehova ed arap na altar.
15 Sakey ed sikara so mangala na sankaakop ed pinon arina na apay a kakanen ya alaokay larak tan amin ya olibano a walad apay a kakanen, tan paaseweken to itan ed altar bilang ambalingit* ya angob ya onkanan apay a mangirepresenta* parad si Jehova.+
16 Kanen nen Aaron tan saray ananak to imay akera.+ Kanen itan bilang andi-lebaduran tinapay diad masanton pasen. Kanen da itan diad sular na tolda a pantitiponan.+
17 Ag-itan nepeg ya iluto ya alaokay lebadura.+ Inter ko itan bilang apag da ed saray apay a pinoolan a parad siak.+ Satan et bengatlan sankasantosan,+ a singa say apay parad kasalanan tan apay parad impakasumlang.
18 Kanen itan na amin a lalakin ananak nen Aaron.+ Satan so permanentin apag da a nanlapud saray apay a pinoolan parad si Jehova, diad amin a henerasyon yo.+ Amin a bengatlan nidiwit ed saratan* et magmaliw a masanto.’”
19 Inkuan lamet nen Jehova ed si Moises:
20 “Saya so apay nen Aaron tan saray ananak to parad si Jehova ya iyapay da diad agew na pakalanaan to:+ say kakaplo na efa*+ na pinon arina bilang regular ya apay a kakanen,+ say kapaldua na satan et diad kabuasan tan say kapaldua et diad labi.
21 Iluto itan a nanlarak ed tirampiak a kawali.+ Nepeg ya ikames itan a maong ed larak tan iyapay mo itan ya apisagpisag bilang aluton apay a kakanen a walaay ambalingit* ya angob parad si Jehova.
22 Gawaen itan na sakey ed saray ilalak nen Aaron ya onsublay a manlingkor bilang alanaan a saserdote.+ Sakey iyan manbayag a totontonen: Paaseweken itan bilang interon apay parad si Jehova.
23 Kada apay a kakanen ya iyapay na saserdote et nepeg ya interon apay. Ag-itan nepeg a kanen.”
24 Inkuan lamet nen Jehova ed si Moises:
25 “Ibagam ed si Aaron tan saray ananak to, ‘Saya so ganggan nipaakar ed apay parad kasalanan:+ Nepeg a pakgeran met so apay parad kasalanan diad arapan nen Jehova ed pasen a pamapakgeran ed apay a popoolan.+ Sakey itan a sankasantosan a bengatla.
26 Kanen itan na samay saserdoten mangiyapay ed satan parad kasalanan.+ Kanen itan ed masanton pasen, diad sular na tolda a pantitiponan.+
27 “‘Amin a bengatlan nidiwit ed karne na satan et magmaliw a masanto, tan no say kawes na sakey et apulasian na dala, nepeg mon urasan itan diad masanton pasen.
28 Nepeg a betagen imay nanlambongan a banga. Balet no inlambong itan ed gansan kaldero, nepeg a gisigisen so kaldero tan urasan.
29 “‘Kanen itan na balang laki a saserdote.+ Satan et bengatlan sankasantosan.+
30 Balet, agnepeg a kanen so apay parad kasalanan no say arum a dala na satan et niyakar ed tolda a pantitiponan pian manggawa na pananakbong diad masanton pasen.+ Nepeg a poolan itan.
Paimanod leksab
^ Odino “kamarerwa.”
^ Odino “iray dapol a nantaba,” salanti, saray dapol ya atalem ed taba na saray bagat.
^ Odino “a lalatopan iran kawes.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “bilang pakanodnonotan (mangirerepresenta) a parte na satan.”
^ Odino “saray apay.”
^ Say kakaplo na sakey ya efa et 2.2 litro. Nengnengen so Apendise B14.
^ Odino “makapakepay liknaan; makapakalmay liknaan.” Literal, “makapainawa.”
