Levitico 12:1-8
-
Panaglinis kayari na impananak (1-8)
12 Onia ni inkuan nen Jehova ed si Moises:
2 “Ibagam ed saray Israelita, ‘No manlukon* so sakey a bii tan mananak na laki, sikatoy magmaliw ya agmalinis ed loob na pitoy agew, a singa diad saray agew na agto inkamalinis sano sikatoy manreregla.+
3 Say ugaw et segaten ed komawalon agew.+
4 Mantultuloy a linisan na bii so sarili to manlapud dala diad ontumbok a 33 agew. Agto nepeg a diwiten so antokaman a masanton bengatla, tan sikatoy agnepeg ya onloob ed masanton pasen anggad nasumpal to iray agew na panaglinis to.
5 “‘No bii so anak to, sikatoy agmalinis ed loob na 14 ya agew, a singa diad panreregla to. Mantultuloy ton linisan so sarili to manlapud dala diad ontumbok a 66 ya agew.
6 Sano asumpal lay panaglinis to nisengeg ed anak a laki odino bii, sikatoy mangiyakar diad lolooban na tolda a pantitiponan, ed saserdote, na sakey a kilaw a kalakian a karnero a mantaoy sakey parad apay a popoolan+ tan sakey a sibong a malapati odino palekpek ya apay parad kasalanan.
7 Iyapay itan na saserdote ed arapan nen Jehova tan manggawa na pananakbong parad sikato, tan sikatoy magmaliw a malinis manlapud impanparala to. Saya so ganggan nipaakar ed bii a mananak na laki odino bii.
8 Balet no agto nayariay mangiter na sakey a karnero, nepeg a sikatoy mangala na duaran palekpek odino duaran sibong a malapati,+ say sakey et apay a popoolan tan say sakey et apay parad kasalanan, tan manggawa na pananakbong so saserdote parad sikato, tan sikatoy magmaliw a malinis.’”
Paimanod leksab
^ Odino “manlukon na bini.”
