Levitico 21:1-24
21 Onia ni inkuan nen Jehova ed si Moises: “Mitongtong kad saray saserdote, saray ananak nen Aaron, tan ibagam ed sikara, ‘Agnepeg a dutakan na siopaman so inkasikato nisengeg ed sakey ya inatey a too* a kabaleyan to.+
2 Balet nayari ton gawaen itan parad sakey a maapit a kanayon, parad ina to, ama to, anak ton laki odino bii, agi ton laki,
3 tan nayari ton dutakay inkasikato parad agi ton bii no saya et birhen ya asingger ed sikato tan agni akiasawa.
4 Agto nayarin dutakay inkasikato tan pabandayey inkasikato lapud sakey a bii ya asawa na sakey a laki a kabaleyan to.
5 Agda nepeg a kiskisan so ulo ra+ odino katlien so nguro na balbas da odino sugaten so laman da.+
6 Nepeg iran magmaliw a masanto parad Dios da,+ tan agda nepeg a pabandayen so ngaran na Dios da,+ ta iyaapay da iray apay a pinoolan parad si Jehova, say tinapay* a parad Dios da, tan nepeg a magmaliw iran masanto.+
7 Ag-ira nepeg a mangasawa na sakey a paabang a bii,+ sakey a biin naandi so inkabirhen to, odino sakey a biin indiborsyo na asawa to,+ ta say saserdote et masanto parad Dios to.
8 Sikatoy nepeg mon pasantosen,+ ta sikato so mangiyaapay na tinapay parad Dios mo. Nepeg a sikatoy masanto parad sikayo, ta siak, si Jehova a mamapasanto ed sikayo, et masanto ak.+
9 “‘Natan no say biin anak na sakey a saserdote et pabandayen toy inkasikato diad pagmaliw ton paabang a bii, papabandayen toy ama to. Nepeg a sikatoy poolan.+
10 “‘Say atagey a saserdote ed limog na agagi to, a nikalbo ed ulo to so larak a panaglana+ tan aturo* pian nisulong to iray kawes parad saserdote,+ et agto papaulyanan ya ag-akaayos so buek to tan agto pipilaten iray kawes to.+
11 Agto nepeg ya asinggeran so siopaman ya inatey a too;*+ agto nayarin dutakay inkasikato anggano parad ama to odino ina to.
12 Agto nepeg ya ompaway ed santuaryo tan pabandayen so santuaryo na Dios to,+ ta walad sikato so tanda na dedikasyon, say larak a panaglana na Dios to.+ Siak si Jehova.
13 “‘Nepeg a sikatoy mangasawa na birhen.+
14 Agto nayarin mangasawa na sakey a balo, biin indiborsyo na asawa to, biin naandi so inkabirhen to, odino biin paabang; noagta nepeg a sikatoy mangasawa na sakey a birhen manlapud kabaleyan to.
15 Agto nepeg a pabandayen so ilalak* to ed limog na saray kabaleyan to,+ ta siak si Jehova a mamapasanto ed sikato.’”
16 Inkuan ni nen Jehova ed si Moises:
17 “Ibagam ed si Aaron, ‘Diad amin a henerasyon na saray ilalak mo,* agnayarin mangiyapay na tinapay ed Dios to so siopaman ed sikara a walaay depekto ed laman.
18 No walay siopaman a walaay depekto ed laman to, agto nayarin onasingger: say toon bulag odino piley odino aderal so lupa to* odino andukey so sakey a lima o sali to,
19 toon apiley so sali odino lima to,
20 bukot odino unano,* odino toon walaay depekto ed mata odino walaay burog odino kular odino aterak so bukel na paltak to.+
21 Siopaman a walaay depekto ed saray ilalak* nen Aaron a saserdote et agnayarin onasingger pian mangiyapay na saray apay a pinoolan parad si Jehova. Lapud sikatoy walaan na depekto, agto nayarin onasingger pian mangiyapay na tinapay a parad Dios to.
22 Sarag ton kanen so tinapay a parad Dios to manlapud saray sankasantosan a bengatla+ tan manlapud saray masanton bengatla.+
23 Balet agto nayarin onasingger ed kurtina,+ tan agto nayarin onasingger ed altar,+ ta walay depekto to; tan agto nepeg a pabandayen so santuaryok,+ ta siak si Jehova a mamapasanto ed sikara.’”+
24 Kanian akitongtong si Moises ed si Aaron tan ed saray ananak to tan ed amin ya Israelita.
Paimanod leksab
^ Odino “nisengeg ed sakey a kamarerwa.”
^ Odino “kakanen,” a manutukoy ed saray bagat.
^ Literal, “say lima to et apano.”
^ Odino “siopaman ya inatey a kamarerwa.” Say Hebreon salitan nephesh ed sayan bersikulo et mikonektaan ed sakey a Hebreon salita a mankabaliksan na “inatey.”
^ Literal, “bini.”
^ Literal, “binim.”
^ Literal, “odino apisag so eleng to.”
^ Odino posiblin, “mapmabeng.”
^ Literal, “bini.”
