Saray Gawa na Saray Apostol 8:1-40
8 Inabobonan nen Saulo so impamatey dad si Esteban.+
Diad saman ya agew et apasegsegang a maong so kongregasyon diad Jerusalem; nitaytayak iran amin diad interon rehyon na Judea tan Samaria nilikud ed saray apostol.+
2 Balet si Esteban et imponpon na lalakin matakot ed Dios, tan inakisan dan maong.
3 Ingen ginapoan nen Saulo a buyaken so kongregasyon. Sinansakey ton nilooban iray kaabungan da, inggagayugoy to ray lalaki tan bibii, tan impaipriso to ra.+
4 Balet saramay nitaytayak et linmad nanduruman pasen na dalin ya inyaabawag da so maong a balita nipaakar ed salita na Dios.+
5 Natan et linmay Felipe ed syudad* na Samaria+ tan impulong tod sikara so Kristo.
6 Saray totoo et nankakasakey a nanimanon maong ed si Felipe legan dan tatalinengen tan nenengnengen iray tandan gagawaen to.
7 Ta dakel so aselepan na demonyo,* tan oneeyag iraya na maksil tan ompapaway ira.+ Tan apaabig so dakel a paralitiko tan piley.
8 Kanian walay baleg a liket ed satan a syudad.
9 Diad satan a syudad et walay sakey a lakin manngaray Simon, ya antis na saya et sikatoy manmamahiko tan pankekelawen to so nasyon na Samaria, ya ibabaga ton sikatoy makapanyari.
10 Amin da, manlapud sankaabebaan ya anggad sankatageyan et maniimanon maong ed sikato tan ibabaga ran: “Sayan too so Pakayari na Dios, a tatawagen a Baleg a Pakayari.”
11 Kanian sikatoy tutumboken da lapud abayag la ran mankelaw ed panmamahiko to.
12 Balet sanen anisia rad si Felipe, a mangiyaabawag na maong a balita nipaakar ed Panarian na Dios+ tan ed ngaran nen Jesu-Kristo, lalaki tan bibii so nampabautismo.+
13 Nagmaliw met a mananisia si Simon, tan sanen abautismoan et akiulop a naynay ed si Felipe,+ tan nikelawan ed pakakanengneng tod saray nagagawan tanda tan angkakabaleg iran makapanyarin gawa.
14 Sanen nadngelan na saray apostol ed Jerusalem ya inawat na saray totoo ed Samaria so salita na Dios,+ imbaki ra ditan si Pedro tan Juan;
15 tan linma iraya ed saray taga Samaria tan impikasi da ra pian makaawat ira na masanton espiritu.+
16 Ta anggapo nid sikara so akaawat ed satan, noagta abautismoan labat ira diad ngaran na Katawan a Jesus.+
17 Diad saman et intapew da iray lima rad sikara,+ kanian akaawat ira na masanton espiritu.
18 Natan, sanen anengneng nen Simon a makakaawat na masanton espiritu so siopaman a pangitapewan na saray apostol ed lima ra, inopresian to ray kuarta,
19 ya inkuan to: “Iter yo met ed siak iyan autoridad, pian siopaman a pangitapewan koy limak et makaawat na masanton espiritu.”
20 Balet inkuan nen Pedro ed sikato: “Naderal komon so pilak mo a pati sika, lapud iisipen mo a nakayarian moy regalo na Dios diad panamegley na kuarta.+
21 Anggapon balot so betang mod saya, ta aliwan maptek so pusom ed pakanengneng na Dios.
22 Magbabawi ka sirin ed sayan kaugsan mo, tan mikasi kad si Jehova,* a no nayari et perdonaen to komon so mauges ya intension na pusom,
23 ta nanenengneng ko a sakey kan ampait a samal* tan aripen na ag-inkatunong.”
24 Inmebat si Simon: “Ipikasi yo ak sirin ed si Jehova* pian anggapo komon ed sarayan imbaga yo so nagawad siak.”
25 Diad saman, sanen sigpot la ran akapantasi tan nipasabi da lay salita nen Jehova,* pinmawil ira ed Jerusalem tan inyabawag da so maong a balita ed dakel a baryo na saray Samaritano.+
26 Balet akitongtong so anghel+ nen Jehova* ed si Felipe, ya inkuan to: “Alagey ka tan la kad abalaten diad dalan a manlapud Jerusalem a paarap ed Gaza.” (Sakey iyan dalan diad desierto.)
27 Diad saman et sikatoy inmalagey tan linma, tan walay Etiopen eunoko,* a walaay autoridad tan panlilingkoran to so Candace a reyna na saray Etiope, tan mangaasikaso ed amin a kayamanan to. Sikatoy linmad Jerusalem pian mandayew,+
28 tan pasempet la tan akayurong ed karwahe to, tan babasaen ton maksil so libro nen propeta Isaias.
29 Kanian imbaga na espiritu ed si Felipe: “La ka tan asinggeran mo iyan karwahe.”
30 Batik si Felipe a binansagan to itan tan nadngel ton babasaen a maksil na eunoko so libro nen propeta Isaias, tan inkuan to: “Natatalosan moy babasaen mo?”
31 Inkuan to: “Panon kon natalosan no anggapoy mangipaliwawa ed siak?” Kanian pinalugan toy Felipe tan pinayurong tod abay to.
32 Natan et saya so kabiangay Kasulatan a babasaen ton maksil: “Sikatoy singa sakey a kordero ya inyakar ed panagpateyan, tan singa sakey a karneron marendeen ed arapan na managkiskis na bago, ya agto biswaten so sangi to.+
33 Sanen sikatoy papabandayen, agnaikdan na hustisya.+ Siopay mangibagad saray detalye nipaakar ed henerasyon to? Ta say bilay to et inekal ed dalin.”+
34 Insan inkuan na eunoko ed si Felipe: “Ibagam pad siak, siopay tutukoyen dia na propeta? Sikaton mismo odino arum a too?”
35 Nansalitay Felipe, ya inggapo tod sayan parte na kasulatan tan impulong tod sikato so maong a balita nipaakar ed si Jesus.
36 Legan a manbiabiahe rad dalan, akasabi rad kawalaan na danum, tan inkuan na eunoko: “Wala diay danum; antoy makasbel ed pakabautismoan ko?”
37 *——
38 Diad saman et pinatunda toy karwahe, tan linmasur ed danum si Felipe tan say eunoko, tan sikatoy binautismoan to.
39 Sanen sinmakbit la ra, tampol ya inwanwan na espiritu nen Jehova* si Felipe pian ontaynan la, kanian agla anengneng na eunoko, balet sikatoy malikeliket ya amaarap ed dalan to.
40 Linma balet si Felipe diad Asdod tan intultuloy ton inyabawag so maong a balita diad amin a syudad anggad sikatoy akasabi ed Cesarea.+
Paimanod leksab
^ Odino posiblin, “sakey a syudad.”
^ Odino “marutak ya espiritu.”
^ Nengnengen so Apendise A5.
^ Literal, “ampait ya apgo.”
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Odino “opisyal ed palasyo.”
^ Nengnengen so Apendise A3.
^ Nengnengen so Apendise A5.
