Unonan Samuel 19:1-24

  • Intultuloy a binusol nen Saul si David (1-13)

  • Akatakas si David ed si Saul (14-24)

19  Diad saginonor et nansalitay Saul ed si Jonatan ya anak to tan ed amin ya aripen to nipaakar ed pamatey ed si David.+  Balet inad-aro nen Jonatan ya anak nen Saul si David,+ kanian oniay inkuan nen Jonatan ed si David: “Labay kan ipapatey nen Saul ya amak. Ipangasim, manalwar ka diad kabuasan, tan la kad maamot a pasen tan mansiansia ka diman.  Onla ak a manalagey ed abay nen amak diad uma a kawalaan mo. Mitongtong ak ed amak nipaakar ed sika, tan no walay naamtaan ko, ibagak ed sika.”+  Kanian maabig so sinalita nen Jonatan ed si Saul ya ama to nipaakar ed si David.+ Inkuan tod sikato: “Agkomon mankasalanan so ari ed si David a lingkor to, ta sikatoy agnankasalanan ed sika tan agunggonaan ka ed saray ginawa to parad sika.  Inrisga toy bilay to* pian pateyen to imay Filisteo,+ kanian inter nen Jehova ed interon Israel so baleg a pananalo.* Anengneng mo itan, tan agaylay liket mo. Kanian akin et mankasalanan ka ed dala ya andiay kasalanan diad pamatey mod si David ya anggapoy makasengeg?”+  Dinengel nen Saul si Jonatan, tan oniay insamba nen Saul: “Unong a mabilay si Jehova, sikatoy agnapapatey.”  Kayari na saman et tinawag nen Jonatan si David tan imbaga tod sikato irayan amin a bengatla. Kanian inyakar nen Jonatan si David ed si Saul, tan sikatoy nantultuloy a nanlingkoran to a singa dati.+  Sinmabi panaon et agawa lamet so guerra, tan linman akilaban si David ed saray Filisteo tan amayamay so apatey tod sikara, tan batik ira.  Tan inabuloyan nen Jehova a niwalad si Saul so makapuy ya espiritu+ sanen sikatoy akayurong ed loob na abung to a sankaegnaan toy gayang, legan a mantotogtog na arpa si David.+ 10  Sinali nen Saul ya ipanek si David diad padir ed panamegley na gayang, balet alikiran toy gayang ya inkena nen Saul, kanian pinmanek itan ed padir. Diad saman a labi et binmatik tan tinmakas si David. 11  Diad saginonor et angibaki si Saul na saray mensahero pian bantayan day abung nen David tan sikatoy pateyen da diad kabuasan,+ balet imbagad sikato nen Mical ya asawa to: “No agka ontakas* ed sayan labi, bangkay ka la nabuas.” 12  Tampol a pinaleksab nen Mical si David diad bintana pian sikatoy makabatik tan makatakas. 13  Inala nen Mical so estatua a terafim* tan inyan to itan ed dukolan, tan angiyan na iket a gawad bagoy kanding ed pangidadangananan nen David na ulo to, tan sinakbongan toy abel. 14  Natan et angibaki si Saul na saray mensaheron mangala ed si David, balet inkuan nen Mical: “Sikatoy mansasakit.” 15  Kanian imbaki nen Saul iramay mensahero pian nengnengen day David tan inkuan tod sikara: “Awit yo dia anggano walad dukolan to pian sikatoy ipapatey ko.”+ 16  Sanen akaloob iramay mensahero, wadman ed dukolan so estatua a terafim* tan sakey ya iket a gawad bagoy kanding diad pangidadangananan nen David na ulo to. 17  Inkuan nen Saul ed si Mical: “Akin et tinilaan mo ak tan pinatakas moy kabusol ko?”+ Inmebat si Mical ed si Saul: “Inkuan tod siak, ‘No agmo ak patakasen, pateyen ta ka!’” 18  Natan et batik tan tinmakas si David tan akasabid si Samuel diad Rama.+ Imbaga tod sikato so amin a ginawa nen Saul ed sikato. Insan linma iran dua nen Samuel ed Naiot,+ tan nanayam ira diman. 19  Agnambayag et oniay nipaamta ed si Saul: “Si David et walad Naiot diad Rama.” 20  Tampol ya angibaki si Saul na saray mensaheron mangerel ed si David. Sanen anengneng dan manpropropesiya iray mamatatken a propeta tan akatalindeg si Samuel a mangidadaulo ed sikara, niwalad saray mensahero nen Saul so espiritu na Dios, tan kinmiwas met ira a singa saray propeta. 21  Sanen imbaga ra itan ed si Saul, tampol ya angibaki lamet na sananey iran mensahero, balet kinmiwas met ira a singa saray propeta. Kanian imbaki nen Saul so komatlon grupo na saray mensahero, balet kinmiwas met ira a singa saray propeta. 22  Diad kaunoran et sikatoy linma met ed Rama. Sanen sikatoy akasabid baleg a bobon a walad Secu, oniay intepet to: “Iner so kawalaan di Samuel tan David?” Inmebat ira: “Wadman irad Naiot+ diad Rama.” 23  Legan a mamapaarap ed Naiot diad Rama si Saul, niwala met ed sikato so espiritu na Dios, tan kinmiwas a singa sakey a propeta anggad akasabi ed Naiot diad Rama. 24  Nilakseb to met iray kawes to tan kinmiwas a singa propeta diad arapan nen Samuel, tan sanagew tan sanlabin akarukol diman a lakseb.* Kanian oniay ibabaga ra: “Kasin sakey met a propeta si Saul?”+

Paimanod leksab

Odino “Inyan toy kamarerwa to ed lima to.”
Odino “kililiktar.”
Odino “No agmo itakas so kamarerwam.”
Odino “so dios ed abung; so idolo.”
Odino “so dios ed abung; so idolo.”
Odino “ngalngali anggapoy sulong to.”