Unonan Samuel 12:1-25
12 Insan oniay inkuan nen Samuel ed interon Israel: “Nia, ginawak so* amin a kinerew yod siak, tan anuro ak la na arin manguley ed sikayo.+
2 Natan, nia so ari a manangidaulo* yo!+ Balet siak, masiken ak la tan ubanan la, tan kaiba yo iray ana’ko,+ tan indaulo ta kayo manlapu lad inkaugaw ko anggad natan.+
3 Wadia ak natan. Ibaga yo diad arapan nen Jehova tan ed nilanaan+ to no walay reklamo yod siak: Wala tay inalak a baka odino asno yo?+ Odino siopay sinaol ko odino minaltratok? Siopay angawatan koy pasuksok pian manbulagbulagan ak ed ginawa to?+ No wala, ipawil ko itan ed sikayo.”+
4 Inmebat ira: “Agmo kami sinaol odino minaltrato, tan agka angawat na antokaman manlapud lima na anggan siopa.”
5 Kanian inkuan tod sikara: “Si Jehova tan say nilanaan to so mantasi ed sayan agew ya anggapoy aromog yon pakaakusaan ed siak.”* Diad saman et inkuan da: “Sikato so mantasi.”
6 Kanian inkuan nen Samuel ed saray totoo: “Si Jehova so mantasi. Inusar toy Moises tan Aaron tan impaway to iray inmuunan atateng yo diad dalin na Ehipto.+
7 Tan natan et alagey kayo, ta mangukom ak ed sikayo diad arapan nen Jehova lapud amin a matunong a ginawa nen Jehova ed sikayo tan ed saray inmuunan atateng yo.
8 “Sanen sinmabi ed Ehipto si Jacob,+ tan kinmerew na tulong ed si Jehova iray inmuunan atateng yo,+ imbaki nen Jehova si Moises+ tan Aaron pian nipaway dad Ehipto iray inmuunan atateng yo tan panayamen to rad sayan pasen.+
9 Balet nilingwanan day Jehova a Dios da, kanian inlako to ra+ ed si Sisera+ a pangulo na armada nen Hazor tan ed saray Filisteo+ tan ed ari na Moab,+ tan nilabanan da ra.
10 Tan kinerew day tulong nen Jehova+ tan inkuan da, ‘Nankasalanan kami,+ ta tinaynan mi Jehova pian manlingkor ed saray Baal+ tan saray imahen nen Astoret;+ kanian iliktar mo kami natan ed lima na saray kakabusol mi, pian makapanlingkor kami ed sika.’
11 Insan imbaki nen Jehova si Jerubaal,+ Bedan, Jefte,+ tan Samuel,+ tan inliktar to kayod lima na saray kakabusol yo ed kaliberliber yo, pian manbilay kayon maligen.+
12 Sanen sinmumpad sikayo si Nahas+ ya ari na saray Ammonita, inkuan yod siak, ‘Andi, labay min talagay nawalaan na ari a manguley ed sikami!’+ anta si Jehova a Dios yo so Ari yo.+
13 Nia natan so arin pinili yo, say kinerew yo. Nengneng yo! Anuro si Jehova na sakey ya ari a manguley ed sikayo.+
14 No takotan tan panlingkoran yoy Jehova+ tan ontulok kayod ibabaga to+ tan agkayo manrebelde ed saray ganggan nen Jehova, tan no sikayo tan say ari a manguley ed sikayo et ontumbok ed si Jehova a Dios yo, marakep itan.
15 Balet no agyo tuloken so ibabaga nen Jehova tan manrebelde kayod saray ganggan nen Jehova, dusaen kayo nen Jehova pati saray kaamaan yo.+
16 Alagey kayo natan tan nengneng yo iyan makapakelaw a bengatlan gawaen nen Jehova ed arapan yo.
17 Agta panag-ani na trigo natan? Kerewen kod si Jehova a pakarolen tan pauranen to; insan amtaen tan talosan yo no panoy kabaleg na ginawa yon kaugsan diad pakanengneng nen Jehova diad inkerew yo na sakey ya ari.”+
18 Diad saman et tinmawag si Samuel ed si Jehova, tan pinakarol tan pinauran nen Jehova diad saman ya agew, kanian amin a totoo et tinmakot a maong ed si Jehova tan ed si Samuel.
19 Tan inkuan na amin a totoo ed si Samuel: “Ipikasim iray lingkor mo ed si Jehova a Dios mo,+ ta agmi labay so ompatey, lapud inaruman mi iray kasalanan mi diad inkerew mi na sakey ya ari.”
20 Kanian inkuan nen Samuel ed saray totoo: “Agkayo natatakot. Tuan ginawa yo iyan amin a kaugsan. Balet natan, agyo la ibebeneg si Jehova,+ tan nepeg yon panlingkoran si Jehova ed interon puso yo.+
21 Agyo tutumboken iray andi-kakanaan a bengatla+ ya agmakagunggona+ tan agmakapangiliktar, ta anggapoy kana na saratan.
22 Ta nisengeg ed bantog a ngaran to,+ agtaynanan nen Jehova iray totoo to,+ lapud ginetma nen Jehova a sikayo so pagmaliwen ton totoo to.+
23 Parad siak, agko met nagawaan so mankasalanan ed si Jehova diad itundak a manpikasi parad sikayo, tan itultuloy kon ibangat ed sikayo so maabig tan dugan dalan.
24 Basta takotan yoy Jehova,+ tan manlingkor kayod sikato ed katooran* tan ed interon puso yo, ta nengneng yo iray makapakelaw a bengatlan ginawa to parad sikayo.+
25 Balet no gagalaen yoy manggawa na mauges, naderal kayo,+ sikayo tan say ari yo.”+
Paimanod leksab
^ Literal, “dinengel koy boses yo nipaakar ed.”
^ Literal, “manaakar ed arapan.”
^ Literal, “anggapoy antokaman ya aromog yod limak.”
^ Odino “ed katuaan.”
