Unonan Samuel 15:1-35

  • Agpinatey nen Saul si Agag (1-9)

  • Kinondena nen Samuel si Saul (10-23)

    • “Mas maabig so katutulok nen say bagat” (22)

  • Nipulisay si Saul bilang ari (24-29)

  • Pinatey nen Samuel si Agag (30-35)

15  Insan inkuan nen Samuel ed si Saul: “Imbaki ak nen Jehova pian lanaan ka bilang ari a manguley ed Israel a totoo to;+ natan et dengel mo so imbaga nen Jehova.+  Oniay inkuan nen Jehova na saray armada: ‘Mikuentaan ak ed saray Amalekita lapud sinmumpa rad Israel sanen pinmaway irad Ehipto.+  La ka, tan patey mo iray Amalekita+ tan deral mo ra+ pati say amin a kayarian da. Agmo ra kakawananen,* tan patey mo ran amin,+ laki tan bii, ugaw tan kapangiyanak, baka tan karnero, kamelyo tan asno.’”+  Tinawag nen Saul iray totoo tan binilang to ra diad Telaim: Walay 200,000 sundalon manaakar tan 10,000 lalaki ed Juda.+  Inmabante si Saul ya anggad syudad na Amalek tan sikatoy nantambang diad abay na lawak.*  Insan inkuan nen Saul ed saray Keneo:+ “Taynan kayo, ekal kayod limog na saray Amalekita, pian agkayo nalanor sano deralen ko ra,+ ta impatnag yoy matoor a panangaro ed amin a totoo na Israel+ sanen pinmaway ira ed Ehipto.” Kanian tinmaynan ed limog na Amalek iray Keneo.  Kayari na satan et pinatey nen Saul iray Amalekita+ manlapud Havila+ ya anggad Sur,+ a walad abay na Ehipto.  Inerel ton mabilay si Agag+ ya ari na Amalek, balet pinatey tod espada so amin a totoo.+  Ingen, agpinatey* nen Saul tan saray totoo si Agag, tan saray sankaabigan a karnero, baka, matataban ayep, saray kalakian a karnero, tan amin a maabig.+ Agda labay iratan a pateyen. Balet pinapatey da iramay anggapoy kakanaan tan aglabalabay. 10  Insan oniay mensahe nen Jehova a sinmabi ed si Samuel: 11  “Pagbabawian* ko a ginawak ya ari si Saul, ta imbeneg to ak tan agto uunoren iray salitak.”+ Nanermen a maong si Samuel, tan sikatoy sanlabin akikasid si Jehova.+ 12  Sanen kabkabuasan a binmangon si Samuel pian laen toy Saul, oniay nipaamta ed si Samuel: “Linmad Carmel+ si Saul tan angipaalagey diman na monumento to.+ Insan sikatoy pinmawil tan amalasur ed Gilgal.” 13  Sanen akasabi lay Samuel ed si Saul, inkuan ed sikato nen Saul: “Bendisyonan ka komon nen Jehova. Sinumpal ko la so salita nen Jehova.” 14  Balet inkuan nen Samuel: “Anto sirin yay narerengel kon ungol na saray karnero tan baka?”+ 15  Inmebat si Saul: “Inala da iratan ed saray Amalekita, ta agpinatey* na totoo iray sankaabigan a karnero tan baka pian ibagat dad si Jehova a Dios mo; balet pinapatey mi iramay arum.” 16  Diad saman et inkuan nen Samuel ed si Saul: “Tunda ka! Ibagak pad sika no antoy imbaga nen Jehova ed siak kalabian.”+ Kanian inkuan to: “Mansalita ka!” 17  Inkuan nen Samuel: “Agta melmelag so pangipapasen mod sarilim+ sanen nagmaliw kan ulo na saray tribu na Israel, tan sanen nilanaan ka nen Jehova bilang ari na Israel?+ 18  Insan imbaki ka nen Jehova parad sakey a kimey ya inkuan ton, ‘La ka, tan patey mon amin iray makasalanan ya Amalekita.+ Miguerra kad sikara anggad naupot mo ra.’+ 19  Kanian akin et agmo tinulok so boses nen Jehova, noagta akilumbaan kan angalay samsam+ tan ginawam so mauges ed pakanengneng nen Jehova?” 20  Balet inkuan nen Saul ed si Samuel: “Tinulok ko pa so boses nen Jehova! Ginawak so kimey ya angibakian nen Jehova ed siak tan inawit ko dia si Agag ya ari na Amalek, tan pinatey ko iray Amalekita.+ 21  Balet inaala na saray totoo iray samsam a karnero tan baka, saray sankaabigan ed saray nigana ed kadederal, pian ibagat ed si Jehova a Dios mo diad Gilgal.”+ 22  Insan inmebat si Samuel: “Mas panliketan kasi nen Jehova iray apay a popoolan tan saray bagat+ nen say katutulok ed si Jehova? Mas maabig so katutulok nen say bagat,+ tan say idengel nen say taba+ na saray kalakian a karnero; 23  ta say panagrebelde+ et miparad kasalanan a panagparles,+ tan say pangipilit ed agkanepegan et miparad panguusar na mahiko tan idolatriya.* Lapud impulisay moy salita nen Jehova,+ impulisay to ka met bilang ari.”+ 24  Diad saman et inkuan nen Saul ed si Samuel: “Nankasalanan ak, ta agko tinulok so ganggan nen Jehova tan saray salitam, lapud tinmakot ak ed saray totoo kanian dinengel koy imbaga ra. 25  Tan natan, ipangasim, perdonam so kasalanan ko tan mila kad siak ya ompawil pian ondakmomo ak ed si Jehova.”+ 26  Balet inkuan nen Samuel ed si Saul: “Agak milad sika, ta impulisay moy salita nen Jehova, tan impulisay ka nen Jehova bilang ari na Israel.”+ 27  Sanen onla lay Samuel, inegnaan nen Saul so saloy na andiay-taklay a latop nen Samuel, balet apilat itan. 28  Diad saman et inkuan nen Samuel ed sikato: “Inekal* ed sika natan nen Jehova so inkaarim ed Israel, tan iter to itan ed kaparam a too a magmaong nen say sika.+ 29  Sakey ni, tooren na Sankatagyan na Israel+ so amin a salita to,+ tan agmanguman so kanonotan to,* ta Sikatoy aliwan singa too a manguman so kanonotan to.”*+ 30  Diad saman et inkuan to: “Nankasalanan ak. Balet ipangasim, pagalangan mo ak ed arapan na mamatatken na saray kabaleyan ko tan ed arap na Israel. Mila kad siak ya ompawil, pian makadakmomo ak ed si Jehova a Dios mo.”+ 31  Kanian tinmumbok si Samuel ed si Saul, tan dinmakmomo si Saul ed si Jehova. 32  Tan inkuan nen Samuel: “Iyakar yod siak si Agag ya ari na Amalek.” Balet napipilitan* ya inmasingger ed sikato si Agag, ta ninonot nen Agag: ‘Agda ak la pateyen.’ 33  Balet inkuan nen Samuel: “No panon a naandiay ananak iray bibii lapud espadam, mas nin naandiay ananak so inam nen say arum a bibii.” Diad saman et sinisigbat tan tinetegteg toy Agag ed arapan nen Jehova diad Gilgal.+ 34  Amaarap la natan si Samuel ed Rama, tan sinmempet met lay Saul ed dilin abung to diad Gibea. 35  Agla anengneng nen Samuel si Saul anggad agew na impatey to, balet nanermen si Samuel lapud si Saul.+ Tan naermenan si Jehova lapud ginawa ton ari na Israel si Saul.+

Paimanod leksab

Odino “kakasian.”
Odino “kulos.”
Odino “kinasian.”
Odino “Panermenan.”
Odino “kinasian.”
Literal, “saray estatuan terafim,” salanti, saray dirios ed abung; saray idolo.
Literal, “Pinilat.”
Odino “tan agto pagbabawian.”
Odino “a magbabawi.”
Odino posiblin, “matalek.”