Unonan Samuel 18:1-30

  • Impankaaro nen David tan Jonatan (1-4)

  • Angimon si Saul lapud saray impanalo nen David (5-9)

  • Sinali nen Saul a pateyen si David (10-19)

  • Inasawa nen David si Mical ya anak nen Saul (20-30)

18  Kayari na impitongtong nen David ed si Saul, nagmaliw a maapit a sankaaro si Jonatan+ tan si David,* tan sikatoy inaro nen Jonatan a singa ed sarili to.*+  Manlapud saman ya agew, ginawa nen Saul si David a lingkor to, tan agto la pinasempet ed abung nen ama to.+  Tan nansipanan si Jonatan tan David,+ lapud sikatoy inaro nen Jonatan a singa ed sarili to.*+  Inekal nen Jonatan so sulong ton andiay-taklay a latop tan inter tod si David, pati say arum nin akasulong ed sikato, say espada to, pana to, tan balkes to.  Oonlan miguerra si David tan sikatoy matalona*+ ed inerman a pangibakian nen Saul. Kanian sikatoy tinuro nen Saul a mangidaulo ed saray sundalo,+ tan aliketan so amin a totoo tan ariripen nen Saul.  Kada ompawil si David tan saray kaiba to manlapud impamatey dad saray Filisteo, ompaway iray bibii manlapud amin a syudad na Israel pian onabet ed si Arin Saul legan iran mangakansion,+ onsasayaw, tan manliliket, tekep na saray tamburin,+ tan saray salterio.*  Oniay ikansion na saray bibiin manliliket: “Nilibo so pinatey nen Saul,Tan samplon libolibo so pinatey nen David.”+  Sinmanok a maong si Saul,+ tan ag-aliketan ed sayan kansion, kanian inkuan to: “Indayew day David lapud samplon libolibo, balet siak et nilibo labat. Say aglabat la niiter ed sikato et say inkaari!”+  Manlapud saman ya agew et naynay lan pansususpetsaan nen Saul si David. 10  Diad sinmublay ya agew et inabuloyan na Dios a niwalad si Saul so makapuy ya espiritu,+ tan sikatoy kinmiwas a singa atapis* ed loob na abung legan a mantotogtog si David na arpa+ a singa gagawaen ton dati. Walay sankaegnaan nen Saul a gayang,+ 11  tan inkena toy gayang,+ ya inkuan ton: ‘Ipanek koy David ed padir!’ Balet amiduan aliktaran itan nen David. 12  Insan tinmakot si Saul ed si David lapud walad sikato si Jehova,+ balet tinaynan to lay Saul.+ 13  Kanian sikatoy pinaekal la nen Saul ed kawalaan to tan impagmaliw ton pangulo na sanlibo, tan idadaulo nen David so armada ya onlan miguerra.*+ 14  Nantultuloy a matalona* si David+ ed amin a gagawaen to, tan walad sikato si Jehova.+ 15  Tan sanen anengneng nen Saul a sikatoy matalonan maong, sikatoy tinmakot ed sikato. 16  Balet inaro na interon Israel tan Juda si David, ta idadaulo to rad saray pilalaban da. 17  Diad saginonor et inkuan nen Saul ed si David: “Nia so panguloan ya ana’kon bii a si Merab.+ Sikatoy iter ko bilang asawam.+ Balet mantultuloy kan manpakpel parad siak tan milaban ka parad saray guerra nen Jehova.”+ Ta inisip nen Saul: ‘Aliwan say limak so ondapod sikato. Say lima na saray Filisteo so mamatey ed sikato.’+ 18  Diad saman et inkuan nen David ed si Saul: “Siopa ak, tan siopa ray kakanayon ko, say pamilya nen amak ed Israel, pian magmaliw a manugang na ari?”+ 19  Balet sanen sinmabi panaon a niiter la komon ed si David si Merab ya anak nen Saul, sikatoy asawa la nen Adriel+ a Meholatita. 20  Natan, si Mical+ ya anak nen Saul et inaro toy David, tan nipaamta itan ed si Saul, tan sikatoy aliketan ed satan. 21  Kanian inkuan nen Saul: “Sikatoy iter kod sikato pian napatitan, ta pian ondapo ed sikato so lima na saray Filisteo.”+ Insan inkuan nen Saul ed si David ed komaduan pankanawnawa: “Mikasakey ka natan ed siak ed panamegley na panangasawa.”* 22  Ontan met, oniay ingganggan nen Saul ed saray aripen to: “Masekreto yon ibaga ed si David, ‘Aliketan ed sika so ari, tan labalabay ka na amin ya aripen to. Kanian natan, mikasakey kad ari ed panamegley na panangasawa.’” 23  Sanen oniay imbaga na saray aripen nen Saul ed si David, inkuan nen David: “Melag ta labat lan bengatla ed sikayo so pikasakey ed ari ed panamegley na panangasawa, anta mairap so bilay ko tan ipapasen ak ya abeba?”+ 24  Diad saman et oniay impaamta rad si Saul: “Ontan so imbaga nen David.” 25  Insan inkuan nen Saul: “Oniay ibaga yod si David, ‘Aglabay na ari so antokaman a dasel+ likud labat ed 100 a katat na kayarian+ na saray Filisteo, pian makabales ed saray kakabusol na ari.’” Ta plaplanoen nen Saul a napatey na saray Filisteo si David. 26  Kanian ontan so imbaga rad si David, tan aliketan si David a mikasakey ed ari ed panamegley na panangasawa.+ Antis a nagawa iman, 27  linmay David a kaibay sundalo to tan pinatey da so 200 a Filisteo, tan inyakar nen David ed ari so kompleton bilang na saray katat na kayarian da, pian mikasakey ed ari diad panamegley na panangasawa. Kanian inter nen Saul ed sikato si Mical ya anak to bilang asawa.+ 28  Amoria nen Saul a si Jehova et walad si David,+ tan sikatoy inaro nen Mical ya anak to.+ 29  Lapud saya et lalon tinmakot si Saul ed si David, tan nagmaliw a kalaban nen David si Saul legay bilay to.+ 30  Ompapaway a milaban iray prinsipe na saray Filisteo, balet kapagno ompaway iran milaban, mas matalona si* David nen say amin a lingkor nen Saul;+ tan nigalgalang so ngaran to.+

Paimanod leksab

Odino “nikasakey so kamarerwa nen Jonatan ed kamarerwa nen David.”
Odino “singa ed dilin kamarerwa to.”
Odino “singa ed dilin kamarerwa to.”
Odino “kinmiwas a makabat.”
Sakey a klase na nandeles ya instrumento.
Odino “kinmiwas a singa propeta.”
Literal, “tan sikatoy ompapaway tan onloloob ed arapan na totoo.”
Odino “kinmiwas a makabat.”
Odino “Magmaliw ka natan a manugang ko.”
Odino “mas makabat so inkiwas nen.”