Ɲanndra Mun 4:1-27
4 Min mma mun, amun tie fɔ nga siɛ kun tu’n.+Amun sie amun su kpa naan amun a wun sa wlɛ,
2 afin ń klé amun like kpa.Nán amun wla fi like nga n kle’n* su.+
3 Min si i ɲrun’n, n yoli ba kpa,+yɛ min nin kusu kloli min kpa liɛ su.+
4 Min si kleli min like, yɛ ɔ seli min kɛ: “Maan min ndɛ’m be tran ɔ awlɛn’n nun kpa.+Fa min mmla’m be su titi naan ka nguan nun.+
5 Yo naan si ngwlɛlɛ, yo naan wun sa wlɛ.+Nán ɔ wla fi ndɛ nga n kan’n, nán se kɛ a faman su.
6 Nán kpalo i, yɛ ɔ́ sásá wɔ.Klo i, yɛ ɔ́ fá ɔ síe.
7 Ngwlɛlɛ’n yɛ ɔ ti like cinnjin kpafuɛ’n niɔn.+ Ɔ maan yo naan si ngwlɛlɛ,ninnge kwlaa nga a ɲan be’n, maan sa wlɛ wunlɛ’n tran be nun wie.+
8 Bu i like cinnjin kpa, yɛ ɔ́ mán ɔ kɔmin su.+Ɔ́ yí ɔ ayɛ afin a tɔ i nun.+
9 Ɔ́ fá waka nɲrɛ nglanman kpa mun síe ɔ ti’n su.Ɔ́ fá kle klanman kpa kun dí ɔ gbanflɛn.”
10 Min wa, sie ɔ su naan sɔ min ndɛ’m be nun klanman,yɛ á dí afuɛ kpanngban kpa.+
11 Ngwlɛlɛ’n i atin’n yɛ ń klé wɔ-ɔ.+Atin nga be ti seiin’n be su yɛ ń fá wɔ ń sín-ɔn.+
12 Kɛ á nánti’n, like fi su tanndanman ɔ ja’n nun.Sɛ a wanndi kusu’n, ɔ ja su kplaman.
13 Fɔ nga be tu wɔ’n, trɛ i kekle. Nán yaci nun.+Sie i kpa, afin ɔ ti ɔ nguan ɲanman.+
14 Nán fa klunwifuɛ’m be atin’n su wie,yɛ nán sin sran tɛtɛ’m be atin’n su.+
15 Nán wunnge lɔ, nán sin su.+Sin lika uflɛ, nán se kɛ á jrán lɛ bɔbɔ.+
16 Afin sɛ be nin-a yoman sa tɛ’n, be kwlá lafiman.Sɛ be nin-a yiman sran ase’n, lafilɛ kunman be.
17 Klunwi yolɛ’n yɛ ɔ ti be aliɛ-ɔ,*sa kekleekle yolɛ’n yɛ ɔ ti be duvɛn-ɔn.
18 Sran kpa’m be atin’n, ɔ ti kɛ lika m’ɔ kpaja nglɛmun nun,m’ɔ kpaja kɔ i ɲrun lele lika’n fa titi weiin’n sa.+
19 Klunwifuɛ’m be atin’n ti kɛ aosin’n sa.Be siman like ng’ɔ yi be ase’n.
20 Min wa, sie ɔ su kpa naan tie min ndɛ mun.Sie ɔ su tie ndɛ nga nkan’n kpa.
21 Nán ɔ ɲin kpa be su.Fa be sie ɔ klun kpa.+
22 Afin be man be nga be wun be’n be nguan,+yɛ be yo maan be kplo’n* nun sanndi be.
23 Sasa ɔ awlɛn’n tra like kwlaa,+afin i nun yɛ nguan’n i bo’n fin-ɔn.
24 Nán kan ato ndɛ mun.+Yɛ nán maan gblɛ ndɛ fin ɔ nuan fite.
25 Nian ɔ ɲrun ndɛnman su trelele,fa ɔ ɲin sie i like ng’ɔ o ɔ ɲrun ndɛnman su’n su.+
26 Kplakpla kan ɔ ja’n wá tía lɛ’n,*+yɛ ɔ atin nga a sin be su’n be kwlaa bé yó atin kpa.
27 Nán kɔ fama suannzɛ bɛ su.+Maan ɔ ja’n tia like ng’ɔ ti tɛ’n i wun mmua.
Ja ngua lɔ ndɛ mun
^ Annzɛ “min mmla’n.”
^ Ebr., “be kpanwun-ɔ.”
^ Ebr., “be nnɛn ba wunmuan’n.”
^ Be kwla se ekun kɛ “Bu kan ɔ ja’n wá tía lɛ’n, i akunndan kpa.”
