Ɲanndra Mun 11:1-31
11 Zoova i ɲin ci toe nga be fa di ndrunmun’n,sanngɛ ɔ klo toe* ng’ɔ ti kpa’n.+
2 Tutre’n i sinma yɛle ɲannzuɛn’n,+sanngɛ ngwlɛlɛ’n ti be nga be si be jranwlɛ’n be liɛ.+
3 Sran ndɛnmanfuɛ’m be mmla nga be nanti su’n yɛle seiin nantilɛ’n,+sanngɛ be nga be kpɛ be wiengu bo waka’n be gblɛ’n yɛ ɔ́ núnnún be-ɔ.+
4 Ɲanmiɛn i ya cɛn’n nun’n, sran’n i aɲanbeun’n* su yomɛn i wun sa ye,+sanngɛ sa kpa yolɛ’n yɛ ɔ́ dé sran’n wie’n i sa nun-ɔn.+
5 Sran mɔ be kwlá sacimɛn i wun’n, i sa nuan su sɛsɛ m’ɔ yo’n ti’n, i atin’n ti trele,sanngɛ klunwifuɛ’n i klunwi’n ti’n, ɔ́ tɔ́.+
6 Sa kpa nga be nga be nanti seiin be yo’n yɛ ɔ́ dé be-ɔ,+sanngɛ be nga be kpɛ be wiengu bo waka’n be liɛ’n, like nga be bɔbɔ be konvi sɔ i’n yɛ ɔ́ sáta be-ɔ.+
7 Kɛ klunwifuɛ’n ko wu’n, nn like nga i wla o su’nw’a wie.Yɛ be boman ninnge nga i kwlalɛ’n ti’n, i ɲin o be sin’n be su diman jɔlɛ kun.+
8 Be de sran kpa’n naan ɔ fin ɲrɛnnɛn’n nun fite,kpɛkun klunwifuɛ’n sin i osu.+
9 Sran ng’ɔ nin Ɲanmiɛn b’a bu’n* ɔ fɛ i nuan mlin i wiengu,sanngɛ like nga sran kpa’m be si i’n ti’n, be fite nun.+
10 Sran kpa’m be klun ufue’n ti’n klɔ wunmuan’n di aklunjɔɛ,kɛ klunwifuɛ’m be wu’n, sran’m be kpan aklunjɔɛ kpanlɛ.+
11 Suyralɛ nga sran ndɛnmanfuɛ’m be ɲɛn i’n ti’n,* klɔ wunmuan’n ɲan ɲrun.+Sanngɛ klunwifuɛ’m be nuan nun ndɛ’n bubu klɔ’n.+
12 Sran nga ngwlɛlɛ’n w’a timɛn i’n* ɔ bumɛn i wiengu sran,sanngɛ sran ng’ɔ wun sa wlɛ kpa’n, ɔ tɔ bliin.+
13 Suɛn tɔnfuɛ’n fa nvialiɛ nun ndɛ mun tru,+sanngɛ sran nga be kwla lafi i su’n i liɛ’n, ɔ si i nuan tra.*
14 Kɛ be sieman nvle’n i kpa’n,* nvlefuɛ’m be fɛ,sanngɛ kɛ afɔtuɛ manfuɛ’m be sɔnnin’n, lika’n yo kpa.*+
15 Sɛ sran wie mɔ be simɛn i’n usa bosia’n, maan sran ng’ɔ jran nun’n si weiin kɛ ɔ́ ɲán ndɛ,+sanngɛ sran ng’ɔ kplinman su kɛ ɔ́ súnman sran nun* bosia usalɛ nun’n, ɔ su ɲanman ndɛ.
16 Bla nga i wun yo fɛ’n,* ɔ ɲan ɲrun,+sanngɛ yasua nga be siman aunnvɔɛ’n, be isa aɲanbeun ninnge mun.
17 Sran nga i klun ti ufue’n* ɔ yo i bɔbɔ i wun ye,+sanngɛ sran nga i klun yo wi’n, ɔ fa afɛ* yi i bɔbɔ su.+
18 Akatua nga klunwifuɛ’n ɲɛn i’n nɛ́n i kpafuɛ’n niɔn,+sanngɛ sran ng’ɔ yo sa i nuan su sɛsɛ’n, be fa like jrɛiin be lɛ i ase.+
19 Sran nga sa nuan su sɛsɛ yolɛ’n ti i cinnjin’n, ɔ o nguan’n i atin’n su,+sanngɛ sran ng’ɔ fa klunwi yolɛ’n cici i ti’n, ɔ o wie’n i atin’n su.
20 Zoova i ɲin ci be nga be awlɛn’n nun lɔ ti tɛ’n,+sanngɛ i klun jɔ be nga be nanti seiin’n be wun.+
21 Lafi ndɛ nga su:* Ɔ leman kɛ be su tuman klunwifuɛ’n i fɔ,+sanngɛ sran kpa’n i mma’m be liɛ’n, bé ɲán be ti.
22 Bla klanman ng’ɔ faman ngwlɛlɛ nantiman’n,ɔ ti kɛ sika ɔkwlɛ nga m’ɔ wla kɔkɔti’n i bue’n nun’n sa.
23 Like ng’ɔ ti kpa’n yɛ sran kpa’m be ɲin o i sin-ɔn,+sanngɛ like nga klunwifuɛ’m be ɲin o i sin’n ti’n, Ɲanmiɛn fa ya.
24 Sran wie o lɛ’n, ɔ tu i klun mɛn i wiengu’m be like, kpɛkun ɔ ɲan like kpanngban kpa.+Sran wie kusu yo like ng’ɔ fata kɛ ɔ fa cɛ’n i su awɛn, sanngɛ yalɛ’n di i.+
25 Sran nga i klun ti ufue’n, ɔ́ ɲɛ́n i wun,*+yɛ sran ng’ɔ mɛn i wiengu’m be nzue’n* bé mɛ́n i nzue wie.+
26 Sran ng’ɔ fɛ i aliɛ’n sie’n, sran’m bé bó i sannzan,sanngɛ sran ng’ɔ yo i liɛ’n i atɛ’n, bé bó muae mɛ́n i.
27 Sran ng’ɔ kunndɛ kpa kɛ ɔ́ yó sa kpa’n, ɔ kunndɛ klolɛ,+sanngɛ sran ng’ɔ kunndɛ kɛ ɔ́ yó sa tɛ’n, saan ɲrɛnnɛn’n yɛ ɔ́ tɔ́ i su-ɔ.+
28 Sran ng’ɔ fɛ i wla guɛ i aɲanbeun’n su’n, ɔ́ tɔ́,+sanngɛ sran kpa’n yó mlanmlanmlan kɛ waka nɲa sa.+
29 Sran ng’ɔ kpɛ ndɛ* mɛn i awlofuɛ mun’n, ɔ su ɲanman like fi,*+yɛ sinnglinfuɛ’n yó ngwlɛlɛfuɛ’n i junman difuɛ.
30 Like nga sran kpa’n yo’n, i agualiɛ’n ti kɛ nguanwaka sa,+yɛ sran ng’ɔ ɲɛn i wiengu mun’n, ɔ ti ngwlɛlɛfuɛ.+
31 ?Sɛ sran kpa ng’ɔ o asiɛ’n su’n ɔ ɲɛn i ayeliɛ’n i nuan like’n,klunwifuɛ’n nin sa tɛ yofuɛ’n yɛ bé ká lɛ-ɔ?+
Ja ngua lɔ ndɛ mun
^ Annzɛ “toe yɔbuɛ.”
^ Annzɛ “i ninnge kpakpa’m be.”
^ Annzɛ “Sran nga i ndɛ nunman Ɲanmiɛn ndɛ nun’n.”
^ Annzɛ “Kɛ sran ndɛnmanfuɛ’m be bo muae man klɔ kun’n.”
^ Ebr., “ng’ɔ leman awlɛn ba’n.”
^ Ebr., “kata ndɛ su.”
^ Annzɛ “i ngwlɛlɛ su’n.”
^ Annzɛ “be ɲan be ti.”
^ Ebr., “nga i ɲin ci sran nun sunmanlɛ.”
^ Annzɛ “ng’ɔ ti klanman’n.”
^ Annzɛ “Sran ng’ɔ nin i wiengu nanti klanman’n.”
^ Annzɛ “ɲannzuɛn.”
^ Ebr., “Be sa nin be sa.”
^ Ebr., “ɔ́ cɛ́n luklɔɔ.”
^ Ebr., “sran ng’ɔ guɛ i wiengu’m be su nzue kpanngban’n.”
^ Annzɛ “ɲannzuɛn.”
^ Ebr., “aunmuan’n yɛ ɔ́ yó i aja like-ɔ.”
