Levitico 27:1-34
27 Hi Jehova padayon nga nakiistorya kan Moises, nga nasiring:
2 “Pakiistorya ha mga Israelita ngan sumati hira, ‘Kon an usa nga tawo maghimo hin espesyal nga saad+ ha paghalad kan Jehova hin ginbanabana nga kantidad han usa nga tawo,*
3 an ginbanabana nga kantidad han usa nga lalaki nga 20 tubtob 60 anyos, 50 ka sekel* uyon ha kabug-aton han sekel ha baraan nga lugar.*
4 Pero kon babaye, an ginbanabana nga kantidad 30 ka sekel.
5 Kon an edad 5 tubtob 20 anyos, an ginbanabana nga kantidad han lalaki 20 ka sekel ngan 10 ka sekel para han babaye.
6 Kon an edad usa ka bulan tubtob lima ka tuig, an ginbanabana nga kantidad han lalaki lima ka sekel nga silber ngan tulo ka sekel nga silber para han babaye.
7 “‘Kon an edad 60 anyos ngan sobra pa, an ginbanabana nga kantidad 15 ka sekel para han lalaki ngan 10 ka sekel para han babaye.
8 Pero kon an nagsasaad pobre hinduro ngan diri makakabayad han ginbanabana nga kantidad,+ an tawo matindog ha atubangan han saserdote, ngan an saserdote an magpipresyo ha iya. An saserdote an magbabanabana han kantidad nga maaakos han nagsasaad.+
9 “‘Kon an iginsaad usa nga hayop nga angayan ighalad kan Jehova, an bisan ano nga ihahatag kan Jehova magigin baraan.
10 Diri niya ito puydi saliwnan o balyoan, an maopay hin diri maopay o an diri maopay hin maopay. Pero kon balyoan niya an usa nga hayop hin lain nga hayop, an orihinal ngan an iginbalyo hito pariho magigin baraan.
11 Kon mahugaw ito nga hayop+ ngan diri puydi ihatag kan Jehova sugad nga halad, iya patitindugon an hayop ha atubangan han saserdote.
12 Katapos, pipresyohan ito han saserdote depende kon maopay ito o diri maopay. An ginbanabana nga kantidad nga ginsiring han saserdote amo an susundon.
13 Pero kon karuyag niya ito paliton utro, kinahanglan dugangan pa niya hin 20 porsyento an ginbanabana nga kantidad hito.+
14 “‘Yana kon an usa nga tawo magbaraan han iya balay sugad nga baraan nga butang para kan Jehova, pipresyohan ito han saserdote depende kon maopay ito o diri maopay. An presyo nga ginsiring han saserdote amo an magigin kantidad hito.+
15 Pero kon an tawo nga nagbaraan han iya balay karuyag nga paliton utro ito, kinahanglan dugangan pa niya hin 20 porsyento an ginbanabana nga kantidad hito, ngan magigin iya ito.
16 “‘Kon an usa nga tawo magbaraan han iba han tuna nga iya gintatag-iya para kan Jehova, an kantidad hito babanabanaon depende ha kadamu han binhi nga isasabwag dida hito: an usa ka homer* nga sebada nga binhi, 50 ka sekel nga silber.
17 Kon magbaraan hiya han iya uma durante han Tuig han Kagawasan,+ an ginbanabana nga kantidad hito amo an susundon.
18 Kon magbaraan hiya han iya uma katapos han Tuig han Kagawasan, an saserdote an magkakarkulo para ha iya han presyo depende ha kadamu han mga tuig nga nabibilin tubtob han sunod nga Tuig han Kagawasan, ngan kinahanglan ibanan an ginbanabana nga kantidad hito.+
19 Pero kon an tawo nga nagbaraan han uma karuyag nga paliton utro ito, kinahanglan dugangan pa niya hin 20 porsyento an ginbanabana nga kantidad hito, ngan magpapabilin ito nga iya.
20 Yana kon diri niya paliton utro an uma ngan iginbaligya an uma ha iba nga tawo, diri na ito puydi paliton utro.
21 Kon an uma iginbalik durante ha Tuig han Kagawasan, magigin baraan ito kan Jehova, sugad nga uma nga iginlain para ha iya. Magigin panag-iya ito han mga saserdote.+
22 “‘Kon an usa nga tawo magbaraan para kan Jehova han uma nga iya napalit nga diri bahin han iya napanunod nga panag-iya,+
23 an saserdote an magkakarkulo para ha iya han kantidad hito tubtob ha Tuig han Kagawasan, ngan hito nga adlaw babayaran niya an ginbanabana nga kantidad.+ Baraan ito kan Jehova.
24 Ha Tuig han Kagawasan, an uma ibabalik ha tawo nga iya ginpalitan hito, ha tawo nga nagtatag-iya han tuna.+
25 “‘An tagsa nga kantidad babanabanaon uyon ha kabug-aton han sekel ha baraan nga lugar. An sekel magkakantidad hin 20 ka gera.*
26 “‘Pero waray bisan hin-o nga magbabaraan han suhag han mga hayop, kay igin-anak ito sugad nga suhag para kan Jehova.+ Baka man ito o karnero, gintatag-iya na ito ni Jehova.+
27 Kon usa ito han maghugaw nga mga hayop ngan tutubuson niya ito uyon ha ginbanabana nga kantidad, dudugangan pa niya hin 20 porsyento an kantidad hito.+ Pero kon diri ito paliton utro, igbabaligya ito uyon ha ginbanabana nga kantidad.
28 “‘Pero an butang nga tikang ha mga panag-iya han usa nga tawo nga iya kinaburut-on nga iginlain* para kan Jehova, diri puydi ibaligya o paliton utro, tawo man ito o hayop o uma nga iya gintatag-iya. An tagsa nga iginlain nga butang baraan gud kan Jehova.+
29 Dugang pa, diri mahimo tubuson an ginkondenar nga tawo nga iginlain para bungkagon.+ Kinahanglan gud hiya patayon.+
30 “‘Gintatag-iya ni Jehova an tagsa nga ikanapulo nga bahin+ han ngatanan nga produkto han tuna, tikang man ito ha produkto han uma o ha bunga han mga kahoy. Baraan ito kan Jehova.
31 Kon maruyag an usa nga tawo nga paliton utro an bisan ano han iya ikanapulo nga bahin, kinahanglan dugangan pa niya hin 20 porsyento an kantidad hito.
32 Mahitungod han tagsa nga ikanapulo nga bahin han mga baka ngan mga karnero, an tagsa nga naagi ha ilarom han tungkod han paraataman hin panon, an ikanapulo nga hayop* magigin baraan kan Jehova.
33 Diri niya ito sadang usisahon kon maopay ba ito o diri maopay, diri liwat niya ito sadang balyoan. Pero kon babalyoan niya ito, an orihinal ngan an iginbalyo hito pariho magigin baraan.+ Diri ito puydi paliton utro.’”
34 Ini an mga sugo nga iginhatag ni Jehova kan Moises para ha mga Israelita didto ha Bukid Sinai.+
