Levitico 7:1-38
7 “‘Ini an balaud may kalabotan han halad tungod han pagin salaan:+ Baraan gud ito nga butang.
2 Ira iihawon* an halad tungod han pagin salaan ha lugar nga ira gin-ihawan han mga halad nga sinunog, ngan an dugo hito+ sadang igwisik ha ngatanan nga ligid han halaran.+
3 Iya ighahalad an ngatanan nga tambok hito,+ upod an matambok nga ikog, an tambok nga nakakaputos han mga tinai,
4 ngan an duha nga kidney upod an tambok dida hito nga hirani ha mga pig-i. Iya liwat kukuhaon an tambok ha atay pati an mga kidney.+
5 Papaasuhon ito han saserdote dida ha halaran sugad nga halad nga ginsunog ha kalayo para kan Jehova.+ Usa ito nga halad tungod han pagin salaan.
6 An tagsa nga lalaki ha mga saserdote makaon hito,+ ngan sadang ito kaunon ha usa nga baraan nga lugar. Baraan gud ito nga butang.+
7 An balaud may kalabotan han halad tungod han sala aplikado liwat ha halad tungod han pagin salaan; mahingangadto ito ha saserdote nga naghihimo han pagpara han sala pinaagi hito.+
8 “‘Kon an saserdote maghalad hin halad nga sinunog para ha usa nga tawo, an panit+ han halad nga sinunog nga iginhatag ha saserdote magigin iya.
9 “‘An tagsa nga halad nga tikang ha lugas nga ginluto ha pugon o ginluto ha karaha o ha hurmaan+ mahingangadto ha saserdote nga maghahalad hito. Magigin iya ito.+
10 Pero an tagsa nga halad nga tikang ha lugas nga ginsalaktan hin lana+ o nga mamara,+ mahingangadto ha ngatanan nga anak nga lalaki ni Aaron; parapriho an magigin malon han kada tagsa.
11 “‘Yana ini an balaud may kalabotan han halad nga ginsasarosaroan+ nga mahimo ihalad han usa ngadto kan Jehova:
12 Kon iya ito ighahalad sugad nga kapahayagan hin pagpasalamat,+ ighahalad niya upod han halad ha pagpasalamat an mga tinapay nga singsing an kurti nga waray libadura nga ginsalaktan hin lana, an mga tinapay nga manipis nga waray libadura nga ginpahiran hin lana, ngan an mga tinapay nga singsing an kurti nga hinimo ha pino nga harina nga ginhalo hin maopay ngan ginsalaktan hin lana.
13 Iya ighahalad an iya halad upod an mga tinapay nga singsing an kurti nga may libadura ngan an iya mga halad nga ginsasarosaroan nga amo an halad ha pagpasalamat.
14 Tikang hito, ighahalad niya an usa han tagsa nga halad sugad nga sagrado nga bahin para kan Jehova; mahingangadto ito ha saserdote nga magwiwisik han dugo han halad nga ginsasarosaroan.+
15 An karne han iya mga halad nga ginsasarosaroan nga amo an halad ha pagpasalamat kakaunon ha adlaw nga iya ito iginhalad. Kinahanglan diri hiya magsalin hin bisan ano nga bahin hito tubtob ha kaaga.+
16 “‘Kon an halad nga iya iginhalad usa nga saad+ o boluntaryo nga halad,+ kakaunon ito ha adlaw nga iya iginhalad an iya halad, ngan an mahisalin hito mahimo liwat kaunon ha sunod nga adlaw.
17 Pero an bisan ano nga mahisalin nga karne han halad ha ikatulo ka adlaw susunugon ha kalayo.+
18 Pero kon an bisan ano nga karne han iya halad nga ginsasarosaroan kaunon ha ikatulo ka adlaw, an naghalad hito diri makarawat hin pag-uyon han Dios. Diri hiya makakapahimulos hito; mangil-ad ito nga butang, ngan an tawo* nga makaon hito may baratunon tungod han iya sayop.+
19 An karne nga masaphid ha bisan ano nga mahugaw diri kakaunon. Susunugon ito ha kalayo. An ngatanan nga tawo nga malimpyo mahimo kumaon han malimpyo nga karne.
20 “‘Pero an bisan hin-o nga tawo* nga mahugaw ngan kumaon han karne han halad nga ginsasarosaroan nga para kan Jehova, ito nga tawo* kinahanglan patayon.*+
21 Kon an usa nga tawo* makakapot hin bisan ano nga mahugaw, kahugawan man ito han tawo+ o mahugaw nga hayop+ o bisan ano nga mahugaw ngan mangil-ad nga butang,+ ngan kumaon hin karne han halad nga ginsasarosaroan nga para kan Jehova, ito nga tawo* kinahanglan patayon.’”*
22 Hi Jehova padayon nga nakiistorya kan Moises, nga nasiring:
23 “Sumati an mga Israelita, ‘Ayaw kamo pagkaon hin bisan ano nga tambok+ han baka o han karnero nga lalakí o han kanding.
24 An tambok han hayop nga hin-agian nga patay ngan an tambok han hayop nga ginpatay han lain nga hayop mahimo gamiton ha bisan ano nga iba nga katuyoan, pero ayaw gud niyo ito pagkaona.+
25 Kay an bisan hin-o nga kumaon han tambok tikang ha hayop nga iya iginhalad sugad nga halad nga ginsunog ha kalayo para kan Jehova kinahanglan patayon.*
26 “‘Ayaw kamo pagkaon hin bisan ano nga dugo+ ha bisan diin nga lugar nga iyo gin-uukyan, kanan mga tamsi man ito o kanan iba nga mga hayop.
27 An bisan hin-o* nga kumaon han bisan ano nga dugo kinahanglan patayon.’”*+
28 Hi Jehova padayon nga nakiistorya kan Moises, nga nasiring:
29 “Sumati an mga Israelita, ‘An bisan hin-o nga maghalad han iya halad nga ginsasarosaroan ngadto kan Jehova, magdadara han bahin han halad tikang ha iya halad nga ginsasarosaroan ngadto kan Jehova.+
30 Iya dadad-on ha iya mismo mga kamot an tambok+ upod an dughan sugad nga halad nga ginsunog ha kalayo para kan Jehova, ngan iya ito iaabyog ngadto-nganhi sugad nga halad nga gin-aabyog+ ha atubangan ni Jehova.
31 Papaasuhon han saserdote an tambok dida ha halaran,+ pero an dughan mahingangadto kan Aaron ngan ha iya mga anak.+
32 “‘Ighahatag niyo ha saserdote an too nga paa sugad nga sagrado nga bahin tikang ha iyo mga halad nga ginsasarosaroan.+
33 An anak ni Aaron nga maghahalad han dugo han mga halad nga ginsasarosaroan ngan han tambok, amo an makakadara han too nga paa sugad nga iya malon.+
34 Kay akon ginkukuha an dughan han halad nga gin-aabyog ngan an paa han sagrado nga bahin tikang ha mga halad nga ginsasarosaroan han mga Israelita, ngan iginhahatag ko ito kan Aaron nga saserdote ngan ha iya mga anak sugad nga nagpapadayon nga regulasyon para ha mga Israelita.+
35 “‘Ini an bahin tikang ha mga halad nga ginsunog ha kalayo para kan Jehova nga ilalain para ha mga saserdote, para kan Aaron ngan ha iya mga anak, ha adlaw nga iya iginpresentar hira basi magin mga saserdote ni Jehova.+
36 Iginsugo ni Jehova nga ihahatag ha ira ini nga bahin tikang ha mga Israelita ha adlaw nga iya gindihogan hira.+ Permanente ito nga surundon para ha ira mga henerasyon.’”
37 Ini an balaud may kalabotan han halad nga sinunog,+ han halad nga tikang ha lugas,+ han halad tungod han sala,+ han halad tungod han pagin salaan,+ han halad para ha pagbutang ha katungdanan,+ ngan han halad nga ginsasarosaroan,+
38 sugad han iginsugo ni Jehova kan Moises ha Bukid Sinai+ ha adlaw nga iya ginsugo an mga Israelita nga ihalad an ira mga halad para kan Jehova didto ha kamingawan han Sinai.+
Mga footnote
^ Ha iba nga lugar, “papatayon.”
^ O “kalag.”
^ O “an kalag.”
^ O “kalag.”
^ Lit., “utdon tikang ha iya katawohan.”
^ Lit., “utdon tikang ha iya katawohan.”
^ O “kalag.”
^ O “usa nga kalag.”
^ Lit., “utdon tikang ha iya katawohan.”
^ O “An bisan hin-o nga kalag.”
^ Lit., “utdon tikang ha iya katawohan.”
