Levitico 4:1-35
-
An halad tungod han sala (1-35)
4 Hi Jehova nagsiring pa kan Moises:
2 “Sumati an mga Israelita, ‘Kon may tawo* nga makasala hin diri tinuyo+ pinaagi ha pagbuhat hin bisan ano han mga butang nga iginsugo ni Jehova nga diri angay buhaton:
3 “‘Kon makasala+ an dinihogan nga saserdote+ ngan tungod hito makasala an katawohan, kon sugad kinahanglan maghalad hiya kan Jehova hin mahimsog nga turilyo nga baka sugad nga halad tungod han sala para han sala nga iya nabuhat.+
4 Iya dadad-on an baka nga lalakí ngadto ha aragian tipasulod ha tolda nga katirokan+ ha atubangan ni Jehova ngan iya itutungbaw an iya kamot ha ulo han baka nga lalakí, ngan iya iihawon* an baka nga lalakí ha atubangan ni Jehova.+
5 Katapos, an dinihogan nga saserdote+ makuha han iba han dugo han baka nga lalakí ngan dadad-on ito ngadto ha tolda nga katirokan;
6 ngan igtutunlob han saserdote an iya tudlo ha dugo+ ngan igwiwisik an iba han dugo hin pito ka beses+ ha atubangan ni Jehova ha prente han kurtina han baraan nga lugar.
7 Igpapahid liwat han saserdote an iba han dugo ha mga sungay han halaran han mahamot nga insenso,+ nga aada ha atubangan ni Jehova ha tolda nga katirokan; ngan iya ihuhuwad an ngatanan nga nabibilin nga dugo han baka nga lalakí ngada ha ubos han halaran han halad nga sinunog,+ nga aada ha aragian tipasulod ha tolda nga katirokan.
8 “‘Katapos, iya kukuhaon an ngatanan nga tambok han baka nga lalakí nga halad tungod han sala, upod na an tambok nga nakakaputos han mga tinai ngan an tambok nga nakapalibot ha mga tinai,
9 ngan an duha nga kidney upod an tambok dida hito nga hirani ha mga pig-i. Ngan iya liwat kukuhaon an tambok ha atay pati an mga kidney.+
10 Pariho liwat hito an kukuhaon tikang ha todo nga baka nga halad nga ginsasarosaroan.+ Ngan papaasuhon ito han saserdote dida ha halaran han halad nga sinunog.
11 “‘Pero an panit han baka nga lalakí ngan an ngatanan nga unod hito upod na an ulo hito, an mga tiil hito, an mga tinai hito, ngan an tai hito+—
12 an ngatanan nga iba pa nga parte han baka nga lalakí—iya ito dadad-on ngadto ha gawas han kampo ha malimpyo nga lugar diin ginlalabog an mga abo,* ngan iya ito susunugon ha kalayo ha bawbaw han sungo.+ Sadang ito sunugon ha ginlalabogan han mga abo.
13 “‘Yana kon an bug-os nga komunidad han Israel nagin salaan tungod han diri tinuyo nga pagbuhat hin sala,+ pero diri maaram an kongregasyon nga nagbuhat hira hin butang nga iginsugo ha ira ni Jehova nga diri pagbuhaton,+
14 ngan katapos nahibaroan an sala, an kongregasyon kinahanglan maghalad hin turilyo nga baka para ha halad tungod han sala ngan dad-on ito ha atubangan han tolda nga katirokan.
15 Itutungbaw han mga tigurang han komunidad an ira mga kamot ha ulo han baka nga lalakí ha atubangan ni Jehova, ngan an baka nga lalakí iihawon ha atubangan ni Jehova.
16 “‘Katapos, dadad-on han dinihogan nga saserdote an iba han dugo han baka nga lalakí ngadto ha tolda nga katirokan.
17 Igtutunlob han saserdote an iya tudlo ha dugo ngan igwiwisik an iba hito hin pito ka beses ha atubangan ni Jehova ha prente han kurtina.+
18 Katapos, iya ipapahid an iba han dugo ha mga sungay han halaran+ dida ha atubangan ni Jehova, nga aada ha tolda nga katirokan; ngan iya ihuhuwad an ngatanan nga nabibilin nga dugo ngada ha ubos han halaran han halad nga sinunog, nga aada ha aragian tipasulod ha tolda nga katirokan.+
19 Iya kukuhaon an ngatanan nga tambok hito ngan papaasuhon ito dida ha halaran.+
20 Iya bubuhaton ha baka nga lalakí an sugad han iya ginbuhat ha lain nga baka nga lalakí nga halad tungod han sala. Iya ito bubuhaton ha sugad hito nga paagi, ngan hihimoon han saserdote an pagpara han sala para ha ira,+ ngan papasayloon hira.
21 Iya ipapadara an baka nga lalakí ngadto ha gawas han kampo ngan susunugon ito, sugad han iya pagsunog ha siyahan nga baka nga lalakí.+ Usa ito nga halad tungod han sala para ha kongregasyon.+
22 “‘Kon an usa nga lider+ diri tinuyo nga nakasala pinaagi ha pagbuhat han usa han ngatanan nga butang nga iginsusugo ni Jehova nga iya Dios nga diri angay buhaton ngan nagin salaan hiya,
23 o kon nasantop niya nga nakabuhat hiya hin sala nga nagtatalapas han sugo, kon sugad kinahanglan magdara hiya hin mahimsog nga nati nga kanding nga lalakí sugad nga iya halad.
24 Iya itutungbaw an iya kamot ha ulo han nati nga kanding ngan iihawon ito ha lugar nga gin-iihawan han halad nga sinunog ha atubangan ni Jehova.+ Usa ito nga halad tungod han sala.
25 An saserdote makuha han iba han dugo han halad tungod han sala pinaagi han iya tudlo ngan ipapahid ito ha mga sungay+ han halaran han halad nga sinunog, ngan iya ihuhuwad an ngatanan nga nabibilin nga dugo hito ngada ha ubos han halaran han halad nga sinunog.+
26 An ngatanan nga tambok hito iya papaasuhon dida ha halaran pariho han tambok han halad nga ginsasarosaroan;+ ngan hihimoon han saserdote an pagpara han sala para ha iya tungod han iya sala, ngan papasayloon hiya.
27 “‘Kon an bisan hin-o* ha katawohan han tuna diri tinuyo nga nakasala ngan nagin salaan pinaagi ha pagbuhat han usa han mga butang nga iginsugo ni Jehova nga diri angay pagbuhaton,+
28 o kon nasantop niya nga nakabuhat hiya hin sala, kon sugad sadang hiya magdara hin mahimsog nga nati nga kanding nga babayé sugad nga iya halad tungod han sala nga iya nabuhat.
29 Iya itutungbaw an iya kamot ha ulo han halad tungod han sala ngan iihawon an halad tungod han sala ha pariho nga lugar nga gin-ihawan han halad nga sinunog.+
30 An saserdote makuha han iba han dugo hito pinaagi han iya tudlo ngan ipapahid ito ha mga sungay han halaran han halad nga sinunog, ngan iya ihuhuwad an ngatanan nga nabibilin nga dugo hito ngada ha ubos han halaran.+
31 Iya kukuhaon an ngatanan nga tambok hito,+ sugad la nga ginkukuha an tambok tikang ha halad nga ginsasarosaroan,+ ngan papaasuhon ito han saserdote dida ha halaran sugad nga nakakapalipay* nga hamot para kan Jehova; ngan hihimoon han saserdote an pagpara han sala para ha iya, ngan papasayloon hiya.
32 “‘Pero kon maghalad hiya hin nati nga karnero sugad nga iya halad tungod han sala, sadang hiya magdara hin mahimsog nga nati nga karnero nga babayé.
33 Iya itutungbaw an iya kamot ha ulo han halad tungod han sala ngan iihawon ito sugad nga halad tungod han sala didto ha lugar nga gin-iihawan han halad nga sinunog.+
34 An saserdote makuha han iba han dugo han halad tungod han sala pinaagi han iya tudlo ngan ipapahid ito ha mga sungay han halaran han halad nga sinunog,+ ngan iya ihuhuwad an ngatanan nga nabibilin nga dugo hito ngada ha ubos han halaran.
35 Iya kukuhaon an ngatanan nga tambok hito pariho han pagkuha han tambok han karnero nga lalakí nga para ha halad nga ginsasarosaroan, ngan papaasuhon ito han saserdote dida ha halaran ha bawbaw han mga halad nga ginsunog ha kalayo para kan Jehova;+ ngan hihimoon han saserdote an pagpara han sala para ha iya tungod han sala nga iya nabuhat, ngan papasayloon hiya.+
