Levitico 1:1-17
-
An halad nga sinunog (1-17)
1 Ngan gintawag ni Jehova hi Moises ngan nagyakan ha iya tikang ha tolda nga katirokan,+ nga nasiring:
2 “Pakiistorya ha mga Israelita* ngan sumati hira, ‘Kon an bisan hin-o ha iyo maghalad hin halad kan Jehova tikang ha inataman nga mga hayop, ighahalad niyo an iyo halad tikang ha panon han mga baka o tikang ha mga karnero.+
3 “‘Kon an iya halad usa nga halad nga sinunog tikang ha mga baka, maghahalad hiya hin mahimsog nga hayop nga lalakí.+ Kinaburut-on nga ighahalad niya ito+ ha atubangan ni Jehova dida ha aragian tipasulod ha tolda nga katirokan.
4 Iya igtutungbaw an iya kamot ha ulo han halad nga sinunog, ngan kakarawaton ito para ha iya ha pagpara han iya sala.
5 “‘Katapos, kinahanglan ihawon* an turilyo nga baka ha atubangan ni Jehova, ngan an mga anak ni Aaron nga mga saserdote,+ maghahalad han dugo ngan magwiwisik han dugo ha ngatanan nga ligid han halaran+ nga aada ha aragian tipasulod ha tolda nga katirokan.
6 An halad nga sinunog sadang anitan ngan ataduhon.+
7 An mga anak ni Aaron nga mga saserdote, magbubutang hin kalayo ha halaran+ ngan magpaplastar han sungo dida ha kalayo.
8 An mga anak ni Aaron nga mga saserdote, magpaplastar han mga parte han halad,+ nga an ulo ngan an tambok* aada ha bawbaw han sungo ha kalayo dida ha halaran.
9 An mga tinai hito ngan an mga tiil* hito huhugasan ha tubig, ngan ito ngatanan papaasuhon han saserdote dida ha halaran sugad nga halad nga sinunog, usa nga halad nga ginsunog ha kalayo nga nakakapalipay* nga hamot para kan Jehova.+
10 “‘Kon an iya halad para ha halad nga sinunog tikang ha panon,+ tikang ha mga karnero nga lalakí o ha mga kanding, maghahalad hiya hin usa nga lalakí nga mahimsog.+
11 Iihawon ito dida ha norte nga ligid han halaran ha atubangan ni Jehova, ngan an mga anak ni Aaron nga mga saserdote, magwiwisik han dugo hito ha ngatanan nga ligid han halaran.+
12 Iya ito aataduhon ngan igpaplastar ito han saserdote, nga an ulo hito ngan an tambok* hito aada ha bawbaw han sungo dida ha kalayo ha halaran.
13 Iya huhugasan ha tubig an mga tinai hito ngan an mga tiil, ngan ito ngatanan ighahalad han saserdote ngan papaasuhon dida ha halaran. Usa ito nga halad nga sinunog, usa nga halad nga ginsunog ha kalayo nga nakakapalipay* nga hamot para kan Jehova.
14 “‘Pero kon maghahalad hiya hin mga tamsi sugad nga halad nga sinunog para kan Jehova, maghahalad hiya han iya halad tikang ha mga tukmo o ha piyak nga mga sarapati.+
15 Ighahalad ito han saserdote ha halaran ngan gugulgolon an liog hito ngan papaasuhon ito dida ha halaran, pero an dugo hito patuturoon ha ligid han halaran.
16 Iya kukuhaon an babalonan hito ngan an mga barahibo hito ngan iglalabog ito ha ligid han halaran, ha may este, ha lugar nga ginbubutangan han mga abo.*+
17 Iya ito pipikason dida ha mga pako hito nga diri ito gintutunga ha duha ka parte. Katapos, papaasuhon ito han saserdote ha halaran ha bawbaw han sungo dida ha kalayo. Usa ito nga halad nga sinunog, usa nga halad nga ginsunog ha kalayo nga nakakapalipay* nga hamot para kan Jehova.
Mga footnote
^ Lit., “mga anak nga lalaki ni Israel.”
^ Ha iba nga lugar, “patayon.”
^ O “an tambok ha palibot han mga kidney.”
^ Ha iba nga lugar, “siki.”
^ O “nakakarelaks.” Lit., “nakakapakalma.”
^ O “an tambok ha palibot han mga kidney.”
^ O “nakakarelaks.” Lit., “nakakapakalma.”
^ O “mantikaon nga mga abo,” karuyag sidngon, mga abo nga nababad ha tambok han mga halad.
^ O “nakakarelaks.” Lit., “nakakapakalma.”
