Levitico 14:1-57
14 Hi Jehova padayon nga nakiistorya kan Moises, nga nasiring:
2 “Ini an balaud mahitungod han tawo nga may liprosi ha adlaw nga iginpahayag nga putli hiya, ha panahon nga dad-on hiya ngadto ha saserdote.+
3 An saserdote magawas ha kampo ngan uusisahon hiya. Kon an tawo nga may liprosi nag-opay na ha iya liprosi,
4 susugoon hiya han saserdote nga magdara hin duha nga buhi nga tamsi nga malimpyo, kahoy nga sedro, inulang nga malamrag an kapula,* ngan hisopo para ha paglimpyo ha iya.+
5 Magsusugo an saserdote nga ihawon* an usa nga tamsi dida ha surudlan nga hinimo ha lapok nga may sulod nga tubig nga gin-alog ha naagos nga tubig.
6 Pero dadad-on niya an buhi nga tamsi upod an kahoy nga sedro, an inulang nga malamrag an kapula, ngan an hisopo, ngan durungan nga igtutunlob ito dida ha dugo han tamsi nga gin-ihaw ha bawbaw han tubig nga gin-alog ha naagos nga tubig.
7 Katapos, igwiwisik niya an dugo hin pito ka beses ngada ha tawo nga naglilimpyo han iya kalugaringon tikang ha liprosi ngan ipapahayag hiya nga limpyo, ngan bubuhian niya an buhi nga tamsi didto ha uma.+
8 “An tawo nga naglilimpyo han iya kalugaringon kinahanglan maglaba han iya mga bado ngan mag-ahit han ngatanan niya nga buhok ngan makarigo ha tubig, ngan magigin limpyo hiya. Katapos, mahimo na hiya sumulod ha kampo, pero maukoy hiya ha gawas han iya tolda ha sulod hin pito ka adlaw.
9 Ha ikapito ka adlaw, sadang niya ahiton an ngatanan nga buhok ha iya ulo ngan ha iya sulang ngan ha iya mga kiray. Katapos niya ahiton an ngatanan niya nga buhok, lalabhan niya an iya mga bado ngan makarigo hiya ha tubig, ngan magigin limpyo hiya.
10 “Ha ikawalo ka adlaw, makuha hiya hin duha nga maghimsog nga karnero nga lalakí, usa nga mahimsog nga nati nga karnero nga babayé+ nga diri malahos ha usa ka tuig an edad, tulo ka ikanapulo nga bahin han usa ka epah* han pino nga harina nga ginsalaktan hin lana sugad nga halad nga tikang ha lugas,+ ngan hin usa ka log* nga lana;+
11 ngan an saserdote nga nagpahayag ha iya nga limpyo magpipresentar han tawo nga naglilimpyo han iya kalugaringon, upod an mga halad, ha atubangan ni Jehova dida ha aragian tipasulod ha tolda nga katirokan.
12 Kukuhaon han saserdote an usa nga karnero nga lalakí ngan ighahalad ito sugad nga halad tungod han pagin salaan+ upod an usa ka log nga lana, ngan iya ito iaabyog ngadto-nganhi sugad nga halad nga gin-aabyog ha atubangan ni Jehova.+
13 Katapos, iya iihawon an karnero nga lalakí ha lugar nga kasagaran nga gin-iihawan han halad tungod han sala ngan han halad nga sinunog,+ ha baraan nga lugar, kay pariho han halad tungod han sala, an halad tungod han pagin salaan mahingangadto ha saserdote.+ Baraan gud ito nga butang.+
14 “Katapos, an saserdote makuha han iba han dugo han halad tungod han pagin salaan, ngan ipapahid ito han saserdote ha ubos han too nga talinga han tawo nga naglilimpyo han iya kalugaringon ngan ha tamuragko han iya too nga kamot ngan ha tamuragko han iya too nga tiil.
15 Ngan an saserdote makuha hin lana tikang ha usa ka log nga lana+ ngan ihuhuwad ito ha iya mismo wala nga palad.
16 Katapos, igtutunlob han saserdote an iya too nga tudlo ha lana nga ada ha iya wala nga palad ngan pinaagi han iya tudlo igwiwisik niya an iba nga lana hin pito ka beses ha atubangan ni Jehova.
17 Katapos, an iba han nahisalin nga lana nga ada ha palad han saserdote, iya ipapahid ha ubos han too nga talinga han tawo nga naglilimpyo han iya kalugaringon ngan ha tamuragko han iya too nga kamot ngan ha tamuragko han iya too nga tiil ha bawbaw han dugo han halad tungod han pagin salaan.
18 An nahisalin nga lana nga ada ha palad han saserdote, iya ipapahid ha ulo han tawo nga naglilimpyo han iya kalugaringon, ngan hihimoon han saserdote an pagpara han sala para ha iya ha atubangan ni Jehova.+
19 “An saserdote maghahalad han halad tungod han sala+ ngan maghihimo han pagpara han sala para ha tawo nga naglilimpyo han iya kalugaringon tikang ha iya pagkamahugaw, ngan katapos hito, iya iihawon an halad nga sinunog.
20 Ngan ighahalad han saserdote an halad nga sinunog ngan an halad nga tikang ha lugas+ didto ha halaran, ngan hihimoon han saserdote an pagpara han sala para ha iya,+ ngan magigin limpyo hiya.+
21 “Pero kon pobre hiya ngan waray ikakaakos, kon sugad makuha hiya hin usa nga karnero nga lalakí sugad nga halad tungod han pagin salaan ngan iaabyog ito ngadto-nganhi, basi himoon an pagpara han sala para ha iya, upod an usa ka ikanapulo nga bahin han usa ka epah* han pino nga harina nga ginsalaktan hin lana sugad nga halad nga lugas, usa ka log nga lana,
22 ngan duha nga tukmo o duha nga piyak nga sarapati, uyon ha iya maaakos. An usa sugad nga halad tungod han sala, ngan an usa pa sugad nga halad nga sinunog.+
23 Ha ikawalo ka adlaw,+ dadad-on niya ito ngadto ha saserdote para ha pagpahayag nga putli hiya, dida ha aragian tipasulod ha tolda nga katirokan ha atubangan ni Jehova.+
24 “Kukuhaon han saserdote an karnero nga lalakí sugad nga halad tungod han pagin salaan+ ngan an usa ka log nga lana, ngan iaabyog ito ngadto-nganhi han saserdote sugad nga halad nga gin-aabyog ha atubangan ni Jehova.+
25 Katapos, iya iihawon an karnero nga lalakí sugad nga halad tungod han pagin salaan, ngan an saserdote makuha han iba han dugo han halad tungod han pagin salaan ngan ipapahid ito ha ubos han too nga talinga han tawo nga naglilimpyo han iya kalugaringon ngan ha tamuragko han iya too nga kamot ngan ha tamuragko han iya too nga tiil.+
26 Ihuhuwad han saserdote an iba han lana ngada ha iya mismo wala nga palad,+
27 ngan igwiwisik niya hin pito ka beses pinaagi han iya tudlo an iba nga lana nga ada ha iya wala nga palad ha atubangan ni Jehova.
28 Ngan an iba han lana nga ada ha palad han saserdote, iya ipapahid ha ubos han too nga talinga han tawo nga naglilimpyo han iya kalugaringon ngan ha tamuragko han iya too nga kamot ngan ha tamuragko han iya too nga tiil ha pariho nga mga parte nga iya ginpahiran han dugo han halad tungod han pagin salaan.
29 Katapos, an nahisalin nga lana ha palad han saserdote, iya ipapahid ha ulo han tawo nga naglilimpyo han iya kalugaringon, basi himoon an pagpara han sala para ha iya ha atubangan ni Jehova.
30 “Iya ihahalad an usa han mga tukmo o usa han piyak nga mga sarapati, uyon ha iya maaakos,+
31 an usa nga iya maaakos, sugad nga halad tungod han sala ngan an usa pa sugad nga halad nga sinunog+ upod an halad nga tikang ha lugas; ngan hihimoon han saserdote an pagpara han sala para ha tawo nga naglilimpyo han iya kalugaringon ha atubangan ni Jehova.+
32 “Ini an balaud para ha tawo nga nagkaada han sakit nga liprosi pero waray ikakaakos para ha ginkikinahanglan ha pagputli ha iya.”
33 Katapos, hi Jehova nagsiring kanda Moises ngan Aaron:
34 “Pag-abot niyo ha tuna han Canaan,+ nga akon iginhahatag ha iyo sugad nga panag-iya,+ ngan akon itugot nga magkaada han sakit nga liprosi an usa nga balay ha iyo tuna,+
35 an tag-iya han balay sadang kumadto ha saserdote ngan magsusumat, ‘May usa nga klase hin hugaw nga nakita ha akon balay.’
36 An saserdote magsusugo nga bakantehon an balay antes hiya umabot basi usisahon an hugaw, basi diri niya ipahayag nga mahugaw an ngatanan nga aada ha balay; ngan katapos hito, masulod an saserdote basi usisahon an balay.
37 Iya uusisahon an apektado nga parte, ngan kon an mga bungbong han balay nahugawan hin berde nga madulaw-dulaw o mapula-pula nga mga lupok ngan mas hilarom ito kay han bawbaw han bungbong,
38 kon sugad an saserdote magawas ha purtahan han balay ngan ikwakwarentinas an balay ha sulod hin pito ka adlaw.+
39 “Katapos, mabalik an saserdote ha ikapito ka adlaw ngan mag-iinspeksyon. Kon an hugaw nagsarang ha mga bungbong han balay,
40 kon sugad an saserdote magsusugo, ngan an nahugawan nga mga bato kinahanglan lukaton ngan ilabog ha gawas han syudad ha usa nga mahugaw nga lugar.
41 Katapos, iya pakakarosan hin maopay an sulod han balay, ngan an ginlukba nga palitada ngan semento sadang ilabog ha gawas han syudad ha usa nga mahugaw nga lugar.
42 Katapos, ira sasaliwnan hin iba nga mga bato an parte nga ira gintangtangan han mga bato, ngan magamit hiya hin iba nga semento ngan papalitadahan an balay.
43 “Pero kon an hugaw bumalik ngan magkaada na liwat hito ha balay katapos nga ginpanlukat an mga bato ngan ginkarosan ngan ginpalitadahan utro an balay,
44 kon sugad an saserdote masulod ngan iinspeksyunon ito. Kon an hugaw nagsarang ha balay, grabe ito nga liprosi+ ha balay. Mahugaw an balay.
45 Iya ipapaguba an balay—an mga bato hito, an mga kahoy hito, ngan an ngatanan nga palitada ngan semento han balay—ngan ipapadara ngadto ha gawas han syudad ha usa nga mahugaw nga lugar.+
46 Pero an bisan hin-o nga sumulod ha balay ha bisan ano nga adlaw nga nakakwarentinas ito+ magigin mahugaw tubtob ha pagsirom;+
47 ngan an bisan hin-o nga humigda ha balay sadang maglaba han iya mga bado, ngan an bisan hin-o nga kumaon ha balay sadang maglaba han iya mga bado.
48 “Pero kon umabot an saserdote ngan makita niya nga an hugaw waray magsarang dida ha balay katapos nga an balay ginpalitadahan utro, kon sugad ipapahayag han saserdote nga limpyo an balay, tungod kay an hugaw nawara na.
49 Basi putlion an balay tikang ha pagkamahugaw,* makuha hiya hin duha nga tamsi, kahoy nga sedro, inulang nga malamrag an kapula, ngan hisopo.+
50 Iya iihawon an usa nga tamsi dida ha surudlan nga hinimo ha lapok nga may sulod nga tubig nga gin-alog ha naagos nga tubig.
51 Katapos, iya kukuhaon an kahoy nga sedro, an hisopo, an inulang nga malamrag an kapula, ngan an buhi nga tamsi ngan igtutunlob ito dida ha dugo han tamsi nga gin-ihaw ngan dida ha tubig nga gin-alog ha naagos nga tubig, ngan kinahanglan iya ito igwisik hin pito ka beses ngada ha balay.+
52 Ngan iya puputlion an balay tikang ha pagkamahugaw* pinaagi han dugo han tamsi, han tubig nga gin-alog ha naagos nga tubig, han buhi nga tamsi, han kahoy nga sedro, han hisopo, ngan han inulang nga malamrag an kapula.
53 Katapos, iya bubuhian an buhi nga tamsi ha gawas han syudad ha uma ngan hihimoon an pagpara han sala para ha balay, ngan magigin limpyo ito.
54 “Ini an balaud may kalabotan ha bisan ano nga liprosi, impeksyon ha anit han ulo o ha bungot,+
55 liprosi ha bado+ o ha balay,+
56 ngan may kalabotan han mga hubag, mga kugang, ngan mga labhak,+
57 basi mahibaroan kon hain an mahugaw ngan kon hain an malimpyo.+ Ini an balaud mahitungod han liprosi.”+
