Levitico 23:1-44
-
Baraan nga adlaw ngan piyesta (1-44)
23 Hi Jehova nakiistorya pa kan Moises, nga nasiring:
2 “Pakiistorya ha mga Israelita ngan sumati hira, ‘An iyo igpapasamwak+ nga mga piyesta+ ni Jehova baraan nga mga kombensyon. Ini an akon mga piyesta:
3 “‘Mahimo magtrabaho hin unom ka adlaw, pero ha ikapito ka adlaw amo an sabbath han bug-os nga pagpahuway,+ usa nga baraan nga kombensyon. Diri kamo magtatrabaho hin bisan ano. Magigin sabbath ito para kan Jehova diin man kamo naukoy.+
4 “‘Amo ini an mga piyesta ni Jehova, an baraan nga mga kombensyon nga iyo igpapasamwak ha mga panahon nga igintanda para hito:
5 Ha siyahan nga bulan, ha ika-14 ka adlaw han bulan,+ ha pagtikasirom* amo an Paskua+ ni Jehova.
6 “‘Ha ika-15 ka adlaw hini nga bulan amo an Piyesta han Tinapay nga Waray Libadura para kan Jehova.+ Pito ka adlaw nga makaon kamo hin tinapay nga waray libadura.+
7 Ha siyahan nga adlaw, isasaurog niyo an usa nga baraan nga kombensyon.+ Diri kamo sadang magbuhat hin bisan ano nga mabug-at nga trabaho.
8 Pero maghahalad kamo kan Jehova hin halad nga ginsunog ha kalayo ha sulod hin pito ka adlaw. Magkakaada hin baraan nga kombensyon ha ikapito ka adlaw. Diri kamo sadang magbuhat hin bisan ano nga mabug-at nga trabaho.’”
9 Hi Jehova padayon nga nakiistorya kan Moises, nga nasiring:
10 “Pakiistorya ha mga Israelita ngan sumati hira, ‘Kon makasulod na kamo ha tuna nga akon iginhahatag ha iyo ngan gin-ani na niyo an aranihon dida hito, kinahanglan magdara kamo hin usa ka butok han mga uhay han siyahan nga mga bunga+ han iyo inani ngadto ha saserdote.+
11 Ngan an binutok nga mga uhay iya iaabyog ngadto-nganhi ha atubangan ni Jehova basi makakarawat hin pag-uyon para ha iyo. Iaabyog ito han saserdote ha adlaw katapos han Sabbath.
12 Ha adlaw nga iyo iginpaabyog an binutok nga mga uhay, kinahanglan maghalad kamo hin mahimsog nga karnero nga lalakí nga diri malahos ha usa ka tuig an edad, sugad nga halad nga sinunog para kan Jehova.
13 Kaupod hito an halad nga tikang ha lugas nga duha ka ikanapulo nga bahin han usa ka epah* han pino nga harina nga ginsalaktan hin lana, sugad nga halad nga ginsunog ha kalayo para kan Jehova, nga nakakapalipay* an hamot; ngan an halad nga irimnon nga ikaupat nga bahin han usa ka hin* nga bino.
14 Ayaw kamo pagkaon hin bisan ano nga tinapay, sinanlag nga lugas, o bag-o nga lugas tubtob hini nga adlaw, tubtob nga madara niyo an halad ngadto ha iyo Dios. Usa ito nga nagpapadayon nga surundon para ha ngatanan niyo nga henerasyon diin man kamo naukoy.
15 “‘Mag-iihap kamo hin pito nga sabbath tikang ha adlaw katapos han Sabbath, tikang ha adlaw nga nagdara kamo han binutok nga mga uhay sugad nga halad nga gin-aabyog.+ Kinahanglan kompleto ito nga mga semana.
16 Mag-iihap kamo hin 50 ka adlaw+ tubtob ha adlaw katapos han ikapito nga Sabbath, ngan katapos, maghahalad kamo kan Jehova hin bag-o nga halad nga tikang ha lugas.+
17 Magdadara kamo tikang ha iyo mga urukyan hin duha nga tinapay sugad nga halad nga gin-aabyog. Sadang ini himoon tikang ha duha ka ikanapulo nga bahin han usa ka epah* han pino nga harina. Sadang ito lutoon nga may salakot nga libadura,+ sugad nga siyahan nga hinog nga mga bunga para kan Jehova.+
18 Ngan sadang niyo ighalad kaupod han mga tinapay an pito nga maghimsog nga nati nga karnero nga lalakí, usa ka tuig an edad han kada tagsa, ngan usa nga turilyo nga baka ngan duha nga karnero nga lalakí.+ Magigin halad nga sinunog ini para kan Jehova kaupod an halad nga tikang ha lugas ngan an mga halad nga irimnon, sugad nga halad nga ginsunog ha kalayo, nga nakakapalipay* nga hamot para kan Jehova.
19 Ngan kinahanglan maghalad kamo hin usa nga nati nga kanding sugad nga halad tungod han sala+ ngan duha nga nati nga karnero nga lalakí, usa ka tuig an edad han kada tagsa, sugad nga halad nga ginsasarosaroan.+
20 Iaabyog ito ngadto-nganhi han saserdote kaupod han mga tinapay nga tikang ha siyahan nga hinog nga mga bunga, sugad nga halad nga gin-aabyog ha atubangan ni Jehova, upod an duha nga nati nga karnero nga lalakí. Magigin baraan ito para kan Jehova ngan mahingangadto ha saserdote.+
21 Hini nga adlaw igpapasamwak niyo+ nga magkakaada kamo hin baraan nga kombensyon. Diri kamo sadang magbuhat hin bisan ano nga mabug-at nga trabaho. Usa ito nga nagpapadayon nga surundon para ha ngatanan niyo nga henerasyon ha ngatanan niyo nga gin-uukyan.
22 “‘Kon mag-ani kamo han aranihon ha iyo tuna, ayaw ubosa pag-ani an ligid han imo uma ngan diri mo sadang pamuruton an nahisalin han imo ani.+ Sadang mo ito bayaan para ha pobre*+ ngan para ha dayo nga residente.+ Ako hi Jehova nga iyo Dios.’”
23 Hi Jehova padayon nga nakiistorya kan Moises, nga nasiring:
24 “Sumati an mga Israelita, ‘Ha siyahan nga adlaw han ikapito ka bulan, sadang kamo magkaada hin bug-os nga pagpahuway, usa nga hinumdóman nga igpapahibaro pinaagi han pagpatunog hin trumpeta,+ usa nga baraan nga kombensyon.
25 Diri kamo puydi magbuhat hin bisan ano nga mabug-at nga trabaho, ngan maghahalad kamo kan Jehova hin halad nga ginsunog ha kalayo.’”
26 Hi Jehova nakiistorya pa kan Moises, nga nasiring:
27 “Pero ha ikanapulo ka adlaw hini nga ikapito ka bulan, amo an Adlaw han Pagpara han Sala.+ Sadang niyo igsaurog an usa nga baraan nga kombensyon, ngan kinahanglan iyo paantuson an iyo kalugaringon*+ ngan maghahalad kamo kan Jehova hin halad nga ginsunog ha kalayo.
28 Diri kamo magtatrabaho hin bisan ano nga klase hin trabaho hito nga adlaw kay adlaw ito han pagpara han sala basi himoon an pagpara han sala+ para ha iyo ha atubangan ni Jehova nga iyo Dios.
29 An bisan hin-o* nga diri magpapaantos han iya kalugaringon* hito nga adlaw papatayon.*+
30 Ngan akon papatayon tikang ha iya katawohan an tagsa nga tawo* nga magtatrabaho hin bisan ano nga klase hin trabaho hito nga adlaw.
31 Ayaw kamo pagbuhat hin bisan ano nga klase hin trabaho. Usa ito nga nagpapadayon nga surundon para ha ngatanan niyo nga henerasyon diin man kamo naukoy.
32 Usa ito nga sabbath han bug-os nga pagpahuway para ha iyo, ngan iyo paaantuson an iyo kalugaringon*+ ha gab-i han ikasiyam nga adlaw han bulan. Sadang niyo tumanon an iyo sabbath tikang ha katunod han adlaw tubtob ha sunod nga katunod han adlaw.”
33 Hi Jehova nakiistorya pa kan Moises, nga nasiring:
34 “Sumati an mga Israelita, ‘Ha ika-15 ka adlaw hini nga ikapito ka bulan amo an Piyesta han mga Payag* ha sulod hin pito ka adlaw para kan Jehova.+
35 Magkakaada hin baraan nga kombensyon ha siyahan nga adlaw, ngan diri kamo sadang magbuhat hin bisan ano nga mabug-at nga trabaho.
36 Pito ka adlaw nga kinahanglan maghalad kamo kan Jehova hin halad nga ginsunog ha kalayo. Ha ikawalo ka adlaw, sadang niyo isaurog an usa nga baraan nga kombensyon,+ ngan maghahalad kamo kan Jehova hin halad nga ginsunog ha kalayo. Usa ito nga espesyal nga katirok. Diri kamo puydi magbuhat hin bisan ano nga mabug-at nga trabaho.
37 “‘Amo ini an mga piyesta+ ni Jehova nga iyo igpapasamwak sugad nga baraan nga mga kombensyon+ ha paghalad kan Jehova hin halad nga ginsunog ha kalayo: an halad nga sinunog+ upod an halad nga tikang ha lugas+ ngan an mga halad nga irimnon+ uyon ha ginkikinahanglan kada adlaw.
38 Dugang pa ini han iginhahalad durante ha mga sabbath ni Jehova,+ ngan han iyo mga regalo,+ han iyo mga halad tungod han saad,+ ngan han iyo boluntaryo nga mga halad,+ nga sadang niyo ighatag kan Jehova.
39 Pero ha ika-15 ka adlaw han ikapito ka bulan, kon natirok na niyo an mga produkto han tuna, sadang niyo igselebrar an piyesta ni Jehova ha sulod hin pito ka adlaw.+ An siyahan nga adlaw magigin bug-os nga pagpahuway ngan an ikawalo ka adlaw magigin bug-os nga pagpahuway.+
40 Ha siyahan nga adlaw, kukuhaon niyo an mga bunga han pinakamag-opay nga mga kahoy, an mga palwa han mga kahoy nga palma,+ an mga sanga han magrampag nga mga kahoy ngan an mga kahoy nga alamo ha walog,* ngan magrarayhak kamo+ ha atubangan ni Jehova nga iyo Dios ha sulod hin pito ka adlaw.+
41 Isiselebrar niyo ito sugad nga piyesta para kan Jehova ha sulod hin pito ka adlaw ha kada tuig.+ Sadang niyo ito igselebrar ha ikapito ka bulan sugad nga nagpapadayon nga surundon para ha ngatanan niyo nga henerasyon.
42 Maukoy kamo ha mga payag ha sulod hin pito ka adlaw.+ An ngatanan nga Israelita maukoy ha mga payag,
43 basi an iyo tiarabot nga mga henerasyon mahibaro+ nga ginpaukoy ko ha mga payag an mga Israelita han igin-gagawas ko hira ha tuna han Ehipto.+ Ako hi Jehova nga iyo Dios.’”
44 Salit iginsumat ni Moises ha mga Israelita an mga piyesta ni Jehova.
Mga footnote
^ Matin-aw nga nagtutudlok ha panahon butnga han pagtunod han adlaw ngan han pagsirom.
^ O “nakakarelaks.” Lit., “nakakapakalma.”
^ O “nakakarelaks.” Lit., “nakakapakalma.”
^ O “nag-aantos.”
^ O “an iyo kalag.” An “pagpaantos ha kalugaringon” kasagaran nga ginsasabot sugad nga diri pagbuhat hin pipira nga butang, lakip na an diri pagkaon.
^ O “An bisan hin-o nga kalag.”
^ O posible nga “diri magpupuasa.”
^ Lit., “uutdon tikang ha iya katawohan.”
^ O “kalag.”
^ O “an iyo kalag.”
^ O “Temporaryo nga mga Sirongan.”
