Levitico 3:1-17
3 “‘Kon an iya halad usa nga halad nga ginsasarosaroan*+ ngan kon ighahalad niya ito tikang ha mga baka, lalakí man ito o babayé, sadang hiya maghalad hin mahimsog nga hayop ha atubangan ni Jehova.
2 Iya itutungbaw an iya kamot ha ulo han iya halad, ngan iihawon* ito dida ha aragian tipasulod ha tolda nga katirokan; ngan an mga anak ni Aaron nga mga saserdote, magwiwisik han dugo ha ngatanan nga ligid han halaran.
3 Iya ighahalad an parte han halad nga ginsasarosaroan sugad nga halad nga ginsunog ha kalayo para kan Jehova:+ an tambok+ nga nakakaputos han mga tinai, an ngatanan nga tambok nga nakapalibot ha mga tinai,
4 ngan an duha nga kidney upod an tambok dida hito nga hirani ha mga pig-i. Iya liwat kukuhaon an tambok ha atay pati an mga kidney.+
5 Papaasuhon ito han mga anak ni Aaron dida ha halaran ha bawbaw han halad nga sinunog nga iginbutang ha bawbaw han sungo dida ha kalayo;+ usa ito nga halad nga ginsunog ha kalayo sugad nga nakakapalipay* nga hamot para kan Jehova.+
6 “‘Kon an iya halad kan Jehova tikang ha panon para ha halad nga ginsasarosaroan, maghahalad hiya hin mahimsog nga lalakí o babayé nga hayop.+
7 Kon maghalad hiya hin karnero nga lalakí sugad nga iya halad, kon sugad iya ito ighahalad ha atubangan ni Jehova.
8 Iya itutungbaw an iya kamot ha ulo han iya halad, ngan iihawon ito ha atubangan han tolda nga katirokan. An mga anak ni Aaron magwiwisik han dugo hito ha ngatanan nga ligid han halaran.
9 Iya ighahalad an tambok tikang ha halad nga ginsasarosaroan sugad nga halad nga ginsunog ha kalayo para kan Jehova.+ Iya kukuhaon an bug-os nga matambok nga ikog nga hirani ha butagtok, an tambok nga nakakaputos han mga tinai, an ngatanan nga tambok nga nakapalibot ha mga tinai,
10 ngan an duha nga kidney upod an tambok dida hito nga hirani ha mga pig-i. Iya liwat kukuhaon an tambok ha atay pati an mga kidney.+
11 Ngan papaasuhon ito han saserdote dida ha halaran sugad nga pagkaon,* usa nga halad nga ginsunog ha kalayo para kan Jehova.+
12 “‘Kon kanding an iya halad, kon sugad iya ito ighahalad ha atubangan ni Jehova.
13 Iya itutungbaw an iya kamot ha ulo hito, ngan iihawon ito ha atubangan han tolda nga katirokan, ngan an dugo hito kinahanglan igwisik han mga anak ni Aaron ha ngatanan nga ligid han halaran.
14 An parte nga iya ighahalad sugad nga iya halad nga ginsunog ha kalayo para kan Jehova amo an tambok nga nakakaputos han mga tinai, an ngatanan nga tambok nga nakapalibot ha mga tinai,+
15 ngan an duha nga kidney upod an tambok dida hito nga hirani ha mga pig-i. Iya liwat kukuhaon an tambok ha atay pati an mga kidney.
16 Papaasuhon ito han saserdote dida ha halaran sugad nga pagkaon,* usa nga halad nga ginsunog ha kalayo nga nakakapalipay* nga hamot. An ngatanan nga tambok kan Jehova.+
17 “‘Usa ito nga nagpapadayon nga surundon para ha iyo mga henerasyon, ha ngatanan nga lugar nga iyo gin-uukyan:* Ayaw gud kamo pagkaon hin bisan ano nga tambok o bisan ano nga dugo.’”+
Mga footnote
^ O “usa nga halad ha pakigmurayaw.”
^ Ha iba nga lugar, “papatayon.”
^ O “nakakarelaks.” Lit., “nakakapakalma.”
^ Lit., “tinapay,” karuyag sidngon, sugad nga bahín han Dios han halad nga ginsasarosaroan.
^ Lit., “tinapay,” karuyag sidngon, sugad nga bahín han Dios han halad nga ginsasarosaroan.
^ O “nakakarelaks.” Lit., “nakakapakalma.”
^ Ha iba nga lugar, “gin-iistaran.”
