Levitico 9:1-24
-
Aaron naghalad hin mga halad (1-24)
9 Ha ikawalo ka adlaw,+ gintawag ni Moises hi Aaron ngan an iya mga anak nga lalaki ngan an mga tigurang han Israel.
2 Nagsiring hiya kan Aaron: “Kuha para ha imo hin nati nga baka para ha halad tungod han sala+ ngan hin karnero nga lalakí para ha halad nga sinunog, mga maghimsog, ngan ihalad ito ha atubangan ni Jehova.
3 Pero masiring ka ha mga Israelita, ‘Kuha kamo hin kanding nga lalakí para ha halad tungod han sala ngan hin nati nga baka ngan hin karnero nga lalakí, an tagsa hito usa ka tuig an edad ngan mga maghimsog, para ha halad nga sinunog,
4 ngan hin todo nga baka ngan hin karnero nga lalakí para ha mga halad nga ginsasarosaroan,+ basi ihalad ito ha atubangan ni Jehova, ngan hin halad nga tikang ha lugas+ nga ginsalaktan hin lana, kay yana nga adlaw hi Jehova magpapakita ha iyo.’”+
5 Salit gindara nira ha atubangan han tolda nga katirokan kon ano an iginsugo ni Moises. Katapos, an bug-os nga komunidad hinirani ngan nanindog ha atubangan ni Jehova.
6 Ngan hi Moises nagsiring: “Ini an iginsugo ni Jehova nga iyo pagbuhaton, basi magpakita ha iyo an himaya ni Jehova.”+
7 Katapos, nagsiring hi Moises kan Aaron: “Daop ha halaran ngan ihalad an imo halad tungod han sala+ ngan an imo halad nga sinunog, ngan himoa an pagpara han sala para ha imo kalugaringon+ ngan para ha imo panimalay; ngan ihalad an halad han katawohan,+ ngan himoa an pagpara han sala para ha ira,+ sugad han iginsugo ni Jehova.”
8 Dinaop dayon hi Aaron ha halaran ngan gin-ihaw* an nati nga baka nga halad tungod han sala nga para ha iya.+
9 Katapos, an dugo iginhatag han mga anak ni Aaron+ ngadto ha iya, ngan iya igintunlob an iya tudlo ha dugo ngan iginpahid ito ha mga sungay han halaran, ngan an nabibilin nga dugo iya iginhuwad ha ubos han halaran.+
10 An tambok ngan an mga kidney ngan an tambok ha atay nga tikang ha halad tungod han sala iya ginpaaso ha halaran, sugad han iginsugo ni Jehova kan Moises.+
11 Ngan an karne pati an panit iya ginsunog ha kalayo ha gawas han kampo.+
12 Katapos, iya gin-ihaw an halad nga sinunog, ngan an dugo iginhatag han mga anak ni Aaron ngadto ha iya, ngan iya ito iginwisik ha ngatanan nga ligid han halaran.+
13 Iginhatag nira ha iya an mga parte han halad nga sinunog pati an ulo, ngan iya ito ginpaaso ha halaran.
14 Labot pa, iya ginhugasan an mga tinai ngan an mga tiil ngan iya ito ginpaaso ha bawbaw han halad nga sinunog dida ha halaran.
15 Katapos, iya iginhalad an halad han katawohan ngan ginkuha an kanding nga halad tungod han sala nga para ha katawohan ngan gin-ihaw ito ngan naghalad hin halad tungod han sala pinaagi hito pariho han siyahan.
16 Ngan iya gindara an halad nga sinunog ngan iginhalad ito uyon ha regular nga proseso.+
17 Sunod, iginhalad niya an halad nga tikang ha lugas,+ iya ginpuno hito an iya kamot ngan ginpaaso ito ha halaran, labot han halad nga sinunog ha aga.+
18 Katapos hito, iya gin-ihaw an todo nga baka ngan an karnero nga lalakí nga halad nga ginsasarosaroan nga para ha katawohan. Kahuman, an dugo iginhatag han mga anak ni Aaron ngadto ha iya, ngan iya ito iginwisik ha palibot ha ngatanan nga ligid han halaran.+
19 Ngan an mga tambok han todo nga baka,+ an matambok nga ikog han karnero nga lalakí, an tambok nga nakakaputos ha mga parte ha sulod han ginhawa, an mga kidney, ngan an tambok ha atay,+
20 ito ngatanan nga tambok ira iginbutang ha mga dughan han mga hayop, ngan katapos hito iya ginpaaso an mga tambok dida ha halaran.+
21 Pero an mga dughan ngan an too nga paa igin-abyog ni Aaron ngadto-nganhi sugad nga halad nga gin-aabyog ha atubangan ni Jehova, sugad han iginsugo ni Moises.+
22 Katapos, gin-alsa ni Aaron an iya mga kamot ngada ha katawohan ngan ginbendisyonan hira,+ ngan linusad kahuman ighalad an halad tungod han sala ngan an halad nga sinunog ngan an mga halad nga ginsasarosaroan.
23 Ha kataposan, hira Moises ngan Aaron sinulod ha tolda nga katirokan ngan ginawas ngan ginbendisyonan an katawohan.+
Yana an himaya ni Jehova nagpakita ha ngatanan nga katawohan,+
24 ngan an kalayo ginawas tikang kan Jehova+ ngan gin-ugtang an halad nga sinunog ngan an mga tambok dida ha halaran. Han nakita ito han ngatanan nga katawohan nan-gugliat hira ngan linuhod hira nga nahapa ha tuna.+
Mga footnote
^ Ha iba nga lugar, “ginpatay.”
