Levitico 12:1-8
-
Pagputli katapos mag-anak (1-8)
12 Hi Jehova nagsiring pa kan Moises:
2 “Sumati an mga Israelita, ‘Kon magburod* an usa nga babaye ngan mag-anak hin lalaki, magigin mahugaw hiya ha sulod hin pito ka adlaw, sugad la nga mahugaw hiya ha mga adlaw han pagkamahugaw han may-ada hiya regla.+
3 Ha ikawalo ka adlaw tuturion an bata.+
4 Padayon nga lilimpyohan niya an iya kalugaringon ha masunod nga 33 ka adlaw tungod han dugo nga nawara ha iya. Diri hiya angay kumapot hin bisan ano nga baraan nga butang, ngan diri hiya angay sumulod ha baraan nga lugar tubtob nga iya matuman an mga adlaw han iya pagputli.
5 “‘Kon mag-anak hiya hin babaye, magigin mahugaw hiya ha sulod hin 14 ka adlaw, sugad la ha panahon nga may-ada hiya regla. Padayon nga lilimpyohan niya an iya kalugaringon ha masunod nga 66 ka adlaw tungod han dugo nga nawara ha iya.
6 Kon makompleto na an mga adlaw han iya pagputli tungod han anak nga lalaki o han anak nga babaye, magdadara hiya hin karnero nga lalakí nga diri malahos ha usa ka tuig an edad para ha halad nga sinunog+ ngan hin piyak nga sarapati o hin tukmo para ha halad tungod han sala ngadto ha aragian tipasulod ha tolda nga katirokan, ngadto ha saserdote.
7 Ighahalad ito han saserdote ha atubangan ni Jehova ngan hihimoon an pagpara han sala para ha babaye, ngan magigin limpyo na hiya tikang ha dugo nga inawas ha iya. Ini an balaud mahitungod han babaye nga nag-anak hin lalaki man o hin babaye.
8 Pero kon diri hiya makakaakos hin karnero, kon sugad kinahanglan magdara hiya hin duha nga tukmo o duha nga piyak nga sarapati,+ usa para ha halad nga sinunog ngan usa para ha halad tungod han sala, ngan hihimoon han saserdote an pagpara han sala para ha iya, ngan magigin limpyo na hiya.’”
Mga footnote
^ O “magmabdos hin binhi.”
