Levitico 24:1-23
24 Hi Jehova padayon nga nakiistorya kan Moises, nga nasiring:
2 “Sugoa an mga Israelita nga magdara ha imo hin puro nga lana han ginbayo nga mga olibo para ha mga suga, basi padayon nga maglaga pirme an mga lampara.+
3 Ha gawas han kurtina han Pagpamatuod ha tolda nga katirokan, sadang panginanoon ni Aaron an mga lampara basi padayon ito nga maglaga pirme tikang ha pagsirom tubtob ha kaaga ha atubangan ni Jehova. Usa ito nga nagpapadayon nga surundon para ha ngatanan niyo nga henerasyon.
4 Sadang niya iplastar pirme hin maopay an mga lampara dida ha burutangan han lampara+ nga puro nga bulawan ha atubangan ni Jehova.
5 “Makuha ka hin pino nga harina ngan magluluto hin 12 nga tinapay nga singsing an kurti. Duha ka ikanapulo nga bahin han usa ka epah* an gagamiton para ha tagsa nga tinapay.
6 Ibubutang mo ito ha lamesa nga puro nga bulawan ha atubangan ni Jehova.+ Pagtuturotungbawon mo ito ha duha ka pundok nga tag-unom an kada pundok.+
7 Sadang mo butangan hin puro nga busag nga insenso an tagsa nga ginturungbaw nga pundok, ngan gagamiton ito sugad nga tinapay para ha simbolo han halad*+ nga ginsunog ha kalayo para kan Jehova.
8 Kada adlaw han Sabbath, pirme niya ito ibubutang hin maopay ha atubangan ni Jehova.+ Usa ito nga nagpapadayon nga kasabotan ha mga Israelita.
9 Mahingangadto ito kan Aaron ngan ha iya mga anak nga lalaki,+ ngan ira ito kakaunon ha baraan nga lugar,+ kay para ha saserdote baraan gud ito tikang ha mga halad nga ginsunog ha kalayo para kan Jehova, sugad nga nagpapadayon nga regulasyon.”
10 Dida ha mga Israelita, may usa nga lalaki nga an nanay Israelita ngan an tatay Ehiptohanon,+ ngan nakaaway niya an usa nga Israelita nga lalaki dida ha kampo.
11 Ini nga lalaki nga an nanay Israelita nagpasipara han Ngaran* ngan iginsumpa* ito.+ Salit ira gindara hiya ngadto kan Moises.+ Nahituman nga an iya nanay hi Selomit nga anak nga babaye ni Dibri ha tribo ni Dan.
12 Ira gin-aresto ngan ginpabantayan hiya tubtob nga iginpahibaro ha ira an desisyon ni Jehova.+
13 Katapos, hi Jehova nagsiring kan Moises:
14 “Dad-a an tawo nga nagsumpa ngadto ha gawas han kampo, ngan kinahanglan itungbaw han ngatanan nga nakabati ha iya an ira mga kamot ha iya ulo, ngan katapos babatuhon hiya han bug-os nga komunidad.+
15 Ngan sadang mo sumatan an mga Israelita, ‘Kon igsumpa han bisan hin-o nga tawo an iya Dios, magkakaada hiya baratunon tungod han iya sala.
16 Salit kinahanglan gud patayon an tawo nga nagpasipara han ngaran ni Jehova.+ Kinahanglan gud hiya batuhon han bug-os nga komunidad. Dayo man hiya nga residente o Israelita, kinahanglan patayon hiya tungod han iya pagpasipara han Ngaran.
17 “‘Kon may tawo nga magkuha han kinabuhi han usa nga tawo,* kinahanglan gud hiya patayon.+
18 An bisan hin-o nga magpatay hin inataman nga hayop* han iba nga tawo kinahanglan magbayad para hito, kinabuhi para ha kinabuhi.*
19 Kon paul-olan han usa nga tawo an iya igkasi-tawo, an iya ginbuhat kinahanglan buhaton ha iya.+
20 Bari para ha bari, mata para ha mata, ngipon para ha ngipon, an pagpaul-ol nga iya ginbuhat sadang liwat buhaton ha iya.+
21 An tawo nga magpatay hin hayop kinahanglan magbayad para hito,+ pero an tawo nga magpatay hin usa nga tawo kinahanglan patayon.+
22 “‘Pariho nga hudisyal nga desisyon an ipapatuman ha iyo, dayo man hiya nga residente o Israelita,+ kay ako hi Jehova nga iyo Dios.’”
23 Katapos, nakiistorya hi Moises ha mga Israelita, ngan ira gindara ha gawas han kampo an tawo nga nagsumpa, ngan ira ginbato hiya.+ Salit ginbuhat han mga Israelita an iginsugo ni Jehova kan Moises.
Mga footnote
^ O “sugad nga hinumdóman (representasyon) nga bahin hito.”
^ Karuyag sidngon, an ngaran nga Jehova, sumala han iginpapakita ha ber. 15 ngan 16.
^ O “ginpanhimaraot.”
^ O “magpatay han bisan hin-o nga kalag.”
^ O “Ngan an tawo nga magpatay han kalag han usa nga hayop.”
^ O “kalag para ha kalag.”
