Levitico 20:1-27
20 Hi Jehova padayon nga nakiistorya kan Moises, nga nasiring:
2 “Sumati an mga Israelita, ‘An bisan hin-o nga tawo ha Israel ngan an bisan hin-o nga dayo nga naukoy ha Israel nga maghatag han bisan hin-o han iya mga anak ngadto kan Molec kinahanglan gud patayon.+ Babatuhon hiya han katawohan han tuna tubtob nga mamatay hiya.
3 Ig-aatubang ko mismo an akon nawong kontra hito nga tawo, ngan akon hiya papatayon,* kay iya iginhatag an iba han iya mga anak ngadto kan Molec, ngan iya ginhugawan an akon baraan nga lugar+ ngan ginpasiparahan an akon baraan nga ngaran.
4 Kon tinuyo nga piyongan han katawohan han tuna an ginbubuhat hito nga tawo han iginhahatag niya an iya anak ngadto kan Molec ngan diri nira hiya patayon,+
5 akon gud mismo ig-aatubang an akon nawong kontra hito nga tawo ngan ha iya pamilya.+ Ito nga tawo akon papatayon* pati an ngatanan nga inupod ha iya ha pagbuhat hin imoralidad pinaagi ha pagsingba kan Molec.
6 “‘Kon an usa nga tawo* diri matinumanon ha akon,* kon dumangop hiya ha mga espiritista+ ngan ha mga parapanigo,+ isasalikway ko gud ito nga tawo* ngan hiya papatayon.*+
7 “‘Kinahanglan baraanon niyo an iyo kalugaringon ngan magin baraan kamo,+ kay ako hi Jehova nga iyo Dios.
8 Ngan kinahanglan sundon niyo an mga surundon nga akon iginhatag ngan tumanon ito.+ Ako hi Jehova nga nagbabaraan ha iyo.+
9 “‘Kon may bisan hin-o nga tawo nga nagsusumpa* ha iya tatay o ha iya nanay, kinahanglan gud hiya patayon.+ Tungod kay iginsumpa niya an iya tatay o an iya nanay, hiya an may baratunon han iya mismo kamatayon.*
10 “‘Yana mahitungod han lalaki nga nag-aadulteryo ha asawa han iba nga lalaki: An lalaki nga nag-aadulteryo ha asawa han iya igkasi-tawo kinahanglan gud patayon, an lalaki ngan an babaye nga nag-aadulteryo.+
11 An lalaki nga nakikighilawas ha asawa han iya tatay naghahatag hin kaarawdan ha iya tatay.*+ Hira nga duha kinahanglan gud patayon. Hira an may baratunon han ira mismo kamatayon.*
12 Kon an usa nga lalaki makighilawas ha iya umagad nga babaye, hira nga duha kinahanglan gud patayon. Gintalapas nira kon ano an natural. Hira an may baratunon han ira mismo kamatayon.*+
13 “‘Kon an usa nga lalaki makighilawas ha lalaki pariho ha pakighilawas han usa ha babaye, hira nga duha nagbubuhat hin mangil-ad nga butang.+ Kinahanglan gud hira patayon. Hira an may baratunon han ira mismo kamatayon.*
14 “‘Kon an usa nga lalaki magkuha ha usa nga babaye ngan ha iya nanay, mangil-ad ito nga buhat.*+ Sadang nira sunugon hiya ha kalayo pati an magnanay,+ basi an mangil-ad nga panggawi diri magpadayon dida ha iyo.
15 “‘Kon an usa nga lalaki makighilawas ha hayop, kinahanglan gud hiya patayon, ngan kinahanglan patayon niyo an hayop.+
16 Kon an usa nga babaye dumaop ha bisan ano nga hayop basi makighilawas hito,+ kinahanglan patayon niyo an babaye ngan an hayop. Kinahanglan gud hira patayon. Hira an may baratunon han ira mismo kamatayon.*
17 “‘Kon an usa nga lalaki makighilawas ha iya bugto nga babaye, ha anak nga babaye han iya tatay o ha anak nga babaye han iya nanay, ngan ira makita an pagkahubo han usa kag usa, kaalohan ito.+ Kinahanglan patayon* hira ha atubangan han mga anak han ira katawohan. Iya gintagan hin kaarawdan an iya bugto nga babaye.* May baratunon hiya tungod han iya sayop.
18 “‘Kon an usa nga lalaki dumirig ha babaye nga may regla ngan makighilawas ha iya, iginpapakita nira nga duha nga an dugo diri baraan ha ira.+ Hira nga duha kinahanglan patayon.*
19 “‘Ayaw pakighilawas ha bugto nga babaye han imo nanay o ha bugto nga babaye han imo tatay, kay paghatag ito hin kaarawdan ha usa nga kadugo.+ May baratunon hira tungod han ira sayop.
20 An usa nga lalaki nga nakikighilawas ha asawa han iya batâ, naghahatag hin kaarawdan ha iya batâ.*+ May baratunon hira tungod han ira sala. Mamamatay hira nga waray anak.
21 Kon an usa nga lalaki magkuha han asawa han iya bugto nga lalaki, mangil-ad ito.+ Iya gintatagan hin kaarawdan an iya bugto nga lalaki.* Diri hira magkakaada hin anak.
22 “‘Kinahanglan sundon niyo an ngatanan nga surundon nga akon iginhatag ngan an ngatanan nga akon hudisyal nga desisyon+ ngan tumanon niyo ito,+ basi diri kamo igsuka han tuna nga akon pagdadad-an ha iyo.+
23 Ayaw kamo pagsunod han mga surundon han mga nasud nga akon ginpapaiwas tikang ha iyo atubangan;+ kay ira ginbuhat ini ngatanan ngan nangangalas ako ha ira.+
24 Ito an hinungdan nga nagsiring ako ha iyo: “Pagtatag-iyahon niyo an ira tuna, ngan ighahatag ko ito ha iyo sugad nga iyo panag-iya, usa nga tuna nga nag-aawas hin gatas ngan dugos.+ Ako hi Jehova nga iyo Dios, nga nagbubulag ha iyo tikang ha mga katawohan.”+
25 Kinahanglan maghimo kamo hin kaibahan butnga han limpyo ngan han mahugaw nga hayop ngan butnga han mahugaw nga tamsi ngan han malimpyo;+ ayaw niyo himoa nga mangil-ad an iyo kalugaringon* pinaagi hin hayop o hin tamsi o hin bisan ano nga nagkakamang ha tuna nga akon iginbulag basi niyo tagdon sugad nga mahugaw.+
26 Kinahanglan magin baraan kamo ha akon atubangan, kay ako, hi Jehova, baraan,+ ngan iginbubulag ko kamo tikang ha mga katawohan basi magin akon kamo.+
27 “‘An bisan hin-o nga lalaki o babaye nga espiritista o parapanigo* kinahanglan gud patayon.+ Babatuhon hira han mga tawo tubtob nga mamatay. Hira an may baratunon han ira mismo kamatayon.’”*
Mga footnote
^ Lit., “uutdon tikang ha iya katawohan.”
^ Lit., “uutdon tikang ha iya katawohan.”
^ O “kalag.”
^ O “nagbubuhat hin espirituwal nga prostitusyon.”
^ O “kalag.”
^ Lit., “uutdon tikang ha iya katawohan.”
^ O “nanhihimaraot.”
^ Lit., “an iya dugo mahingangada ha iya.”
^ Lit., “nagbubuhayhag han pagkahubo han iya tatay.”
^ Lit., “An ira dugo mahingangada ha ira.”
^ Lit., “An ira dugo mahingangada ha ira.”
^ Lit., “An ira dugo mahingangada ha ira.”
^ O “makaarawod ito nga panggawi; malaw-ay ito.”
^ Lit., “An ira dugo mahingangada ha ira.”
^ Lit., “utdon.”
^ Lit., “ginbuhayhag an pagkahubo han iya bugto nga babaye.”
^ Lit., “utdon tikang ha ira katawohan.”
^ Lit., “nagbubuhayhag han pagkahubo han iya batâ.”
^ Lit., “ginbubuhayhag an pagkahubo han iya bugto nga lalaki.”
^ O “an iyo kalag.”
^ O “may espiritu ha panigo.”
^ Lit., “An ira dugo mahingangada ha ira.”
