Levitico 15:1-33

  • Mahugaw nga nagawas ha ikinatawo (1-33)

15  Hi Jehova padayon nga nakiistorya kanda Moises ngan Aaron, nga nasiring:  “Sidnga an mga Israelita ngan sumati hira, ‘Kon an usa nga lalaki gin-giginawasan tikang ha iya ikinatawo,* ini nga nagawas nakakahimo ha iya nga mahugaw.+  Mahugaw hiya tungod han nagawas, padayon man ito nga nagowa tikang ha iya ikinatawo o nababara, mahugaw la gihapon hiya.  “‘Bisan ano nga katre nga higdaan han tawo nga gin-giginawasan magigin mahugaw, ngan bisan ano nga iya lingkoran magigin mahugaw.  An tawo nga kumapot ha iya katre kinahanglan maglaba han iya mga bado, ngan sadang hiya kumarigo ha tubig ngan magigin mahugaw hiya tubtob ha pagsirom.+  An bisan hin-o nga lumingkod ha ginlingkoran han tawo nga gin-giginawasan sadang maglaba han iya mga bado, kumarigo ha tubig, ngan magigin mahugaw tubtob ha pagsirom.  An bisan hin-o nga kumapot ha lawas han tawo nga gin-giginawasan sadang maglaba han iya mga bado, kumarigo ha tubig, ngan magigin mahugaw tubtob ha pagsirom.  Kon an tawo nga gin-giginawasan tumupra ha tawo nga limpyo, ito nga tawo kinahanglan maglaba han iya mga bado, kumarigo ha tubig, ngan magigin mahugaw tubtob ha pagsirom.  An bisan ano nga montura* nga lingkoran han tawo nga gin-giginawasan magigin mahugaw. 10  An bisan hin-o nga kumapot hin bisan ano nga butang nga nakada ha ilarom niya magigin mahugaw tubtob ha pagsirom, ngan an bisan hin-o nga magdara hito nga mga butang maglalaba han iya mga bado, makarigo ha tubig, ngan magigin mahugaw tubtob ha pagsirom. 11  Kon an tawo nga gin-giginawasan+ waray paghunaw ngan kumapot hiya hin tawo, ito nga tawo kinahanglan maglaba han iya mga bado, kumarigo ha tubig, ngan magigin mahugaw tubtob ha pagsirom. 12  An surudlan nga hinimo ha lapok nga kaptan han tawo nga gin-giginawasan sadang buongon, ngan an bisan ano nga surudlan nga kahoy sadang hugasan hin tubig.+ 13  “‘Kon umundang* an naggiginawas ngan an tawo magin limpyo tikang hito, mag-iihap hiya hin pito ka adlaw para han iya pagputli, ngan kinahanglan hiya maglaba han iya mga bado, kumarigo ha naawas nga tubig, ngan magigin limpyo hiya.+ 14  Ha ikawalo ka adlaw, sadang hiya kumuha hin duha nga tukmo o duha nga piyak nga sarapati,+ ngan makadto ha atubangan ni Jehova ha aragian tipasulod ha tolda nga katirokan ngan ihahatag ito ha saserdote. 15  Ngan ighahalad ito han saserdote, an usa sugad nga halad tungod han sala ngan an usa pa sugad nga halad nga sinunog, ngan hihimoon han saserdote an pagpara han sala para ha iya ha atubangan ni Jehova may kalabotan han naggiginawas ha iya. 16  “‘Yana kon an usa nga lalaki gin-gawsan hin semilya, sadang niya karigoan an iya bug-os nga lawas ha tubig ngan magigin mahugaw hiya tubtob ha pagsirom.+ 17  Kinahanglan labhan niya ha tubig an bisan ano nga bado ngan bisan ano nga anit nga may-ada semilya dida hito, ngan magigin mahugaw ito tubtob ha pagsirom. 18  “‘Kon an usa nga lalaki makighilawas ha usa nga babaye ngan gin-gawsan hin semilya, sadang hira kumarigo ha tubig ngan magigin mahugaw tubtob ha pagsirom.+ 19  “‘Kon an usa nga babaye gin-aagasan hin dugo tikang ha iya lawas, magpapadayon an iya pagkamahugaw tungod han iya regla ha sulod hin pito ka adlaw.+ An bisan hin-o nga kumapot ha iya magigin mahugaw tubtob ha pagsirom.+ 20  An bisan ano nga iya higdaan samtang mahugaw hiya tungod han iya regla magigin mahugaw, ngan an ngatanan nga iya lingkoran magigin mahugaw.+ 21  An bisan hin-o nga kumapot han iya katre sadang maglaba han iya mga bado, kumarigo ha tubig, ngan magigin mahugaw tubtob ha pagsirom. 22  An bisan hin-o nga kumapot ha bisan ano nga ginlingkoran hito nga babaye sadang maglaba han iya mga bado, kumarigo ha tubig, ngan magigin mahugaw tubtob ha pagsirom. 23  Kon ito nga babaye liningkod ha katre o ha iba nga gamit, an bisan hin-o nga kumapot hito magigin mahugaw tubtob ha pagsirom.+ 24  Ngan kon an usa nga lalaki makighilawas ha iya ngan an iya pagkamahugaw tungod han regla mahingada ha lalaki,+ magigin mahugaw an lalaki ha sulod hin pito ka adlaw, ngan bisan ano nga katre nga higdaan niya magigin mahugaw. 25  “‘Kon an usa nga babaye pagdinugoan hin damu ka adlaw+ nga diri pa panahon han iya regla,+ o kon pagdinugoan hiya hin mas maiha kay han iya kasagaran nga regla, magigin mahugaw hiya durante han ngatanan nga adlaw nga gindidinugoan hiya, pariho ha mga adlaw nga mahugaw hiya tungod han regla. 26  An bisan ano nga katre nga iya higdaan durante han mga adlaw nga gindidinugoan hiya magigin pariho han katre nga iya ginhigdaan han mahugaw hiya tungod han regla,+ ngan an bisan ano nga iya lingkoran magigin mahugaw sugad han nahitatabo ha panahon nga mahugaw hiya tungod han regla. 27  An bisan hin-o nga kumapot hito magigin mahugaw, ngan kinahanglan maglaba han iya mga bado, kumarigo ha tubig, ngan magigin mahugaw tubtob ha pagsirom.+ 28  “‘Pero kon limpyo na hiya tikang ha pagdinugui, mag-iihap hiya hin pito ka adlaw, ngan katapos hito magigin limpyo hiya.+ 29  Ha ikawalo ka adlaw, sadang hiya kumuha hin duha nga tukmo o duha nga piyak nga sarapati,+ ngan iya ito dadad-on ha saserdote dida ha aragian tipasulod ha tolda nga katirokan.+ 30  Ighahalad han saserdote an usa sugad nga halad tungod han sala ngan an usa pa sugad nga halad nga sinunog, ngan hihimoon han saserdote an pagpara han sala para ha iya ha atubangan ni Jehova may kalabotan han mahugaw nga nagawas ha iya.+ 31  “‘Salit kinahanglan padayon nga ibulag mo an mga Israelita tikang ha ira pagkamahugaw, basi diri hira mamatay tungod han ira pagkamahugaw pinaagi ha paghugaw han akon tabernakulo, nga aada ha butnga nira.+ 32  “‘Ini an balaud mahitungod han lalaki nga gin-giginawasan, han lalaki nga mahugaw tungod han paggawsi hin semilya,+ 33  han babaye ha panahon nga mahugaw hiya tungod han regla,+ han bisan hin-o nga lalaki nga gin-giginawasan o bisan hin-o nga babaye nga gindidinugoan,+ ngan han lalaki nga nakikighilawas ha mahugaw nga babaye.’”

Mga footnote

Lit., “ha iya unod.”
Ginlilingkoran ha likod han hayop.
Ha iba nga lugar, “tumuko.”