Levitico 5:1-19
5 “‘Kon may tawo* nga makasala tungod kay nakabati hiya hin panawagan ha publiko nga magtestigo*+ ngan usa hiya nga testigo o nakakita o nahibaro mahitungod hito ngan waray niya ito igsumat, kon sugad may baratunon hiya tungod han iya sayop.
2 “‘O kon an usa nga tawo* makakapot hin bisan ano nga mahugaw, patay nga lawas man hin mahugaw nga ihalas nga hayop, hin mahugaw nga inataman nga hayop, o hin mahugaw nga nagpapanon nga gutiay nga linarang,+ hiya mahugaw ngan magigin salaan bisan kon waray niya ito masantop.
3 O kon may tawo nga waray makasantop nga nakakapot hiya hin kahugawan han tawo+—bisan ano nga mahugaw nga mahimo makahugaw ha iya—ngan mahibaroan niya ito, kon sugad nagigin salaan hiya.
4 “‘O kon may tawo* nga diri anay naghuhunahuna ngan nanunumpa dayon ha pagbuhat hin usa nga butang—pagbuhat man ito hin maopay o pagbuhat hin maraot, anoman ito—ngan diri hiya maaram hito, pero katapos nasantop niya nga nanumpa hiya nga waray anay maghunahuna, nagigin salaan* hiya.+
5 “‘Kon nagigin salaan hiya may kalabotan han usa hini nga mga butang, kon sugad kinahanglan magsumat hiya+ kon ha ano nga paagi hiya nakasala.
6 Magdadara liwat hiya han iya halad tungod han pagin salaan ngadto kan Jehova para ha sala nga iya nabuhat,+ usa nga babayé nga tikang ha panon, usa nga nati nga karnero nga babayé man o usa nga nati nga kanding nga babayé, para ha halad tungod han sala. Katapos, hihimoon han saserdote an pagpara han sala para ha iya tungod han iya sala.
7 “‘Pero kon diri hiya makakaakos hin karnero, kinahanglan magdara hiya ngadto kan Jehova hin duha nga tukmo o duha nga piyak nga sarapati+ sugad nga iya halad tungod han pagin salaan, usa para ha halad tungod han sala ngan usa para ha halad nga sinunog.+
8 Iya ito dadad-on ha saserdote, nga maghahalad siyahan han usa nga para ha halad tungod han sala ngan gugulgolan ito ha prente han liog, nga diri ito uutdon.
9 Igwiwisik niya an iba han dugo han halad tungod han sala ha ligid han halaran, pero an nabibilin nga dugo patuturoon ha ubos han halaran.+ Usa ito nga halad tungod han sala.
10 Iya ighahalad an usa pa sugad nga halad nga sinunog uyon ha regular nga proseso;+ ngan hihimoon han saserdote an pagpara han sala para ha iya tungod han sala nga iya nabuhat, ngan papasayloon hiya.+
11 “‘Yana kon diri hiya makakaakos hin duha nga tukmo o duha nga piyak nga sarapati, kinahanglan magdara hiya sugad nga iya halad para ha iya sala hin ikanapulo nga bahin han usa ka epah*+ han pino nga harina para ha halad tungod han sala. Diri niya ito bubutangan hin lana o hin busag nga insenso, kay usa ito nga halad tungod han sala.
12 Dadad-on niya ito ha saserdote, ngan an saserdote makuha tikang hito hin usa ka harop sugad nga simbolo han halad* ngan papaasuhon ito dida ha halaran ha bawbaw han mga halad nga ginsunog ha kalayo para kan Jehova. Usa ito nga halad tungod han sala.
13 Hihimoon han saserdote an pagpara han sala para ha iya tungod han sala nga iya nabuhat, an bisan ano hini nga mga sala, ngan papasayloon hiya.+ An nabibilin han halad mahingangadto ha saserdote,+ pariho han halad nga tikang ha lugas.’”+
14 Hi Jehova padayon nga nakiistorya kan Moises, nga nasiring:
15 “Kon may tawo* nga nagawi hin diri matinumanon pinaagi hin diri tinuyo nga pakasala kontra ha baraan nga mga butang ni Jehova,+ magdadara hiya ngadto kan Jehova hin usa nga mahimsog nga karnero nga lalakí tikang ha panon sugad nga halad tungod han pagin salaan;+ an kantidad hito ha silber nga sekel* ginpahiuyon ha kabug-aton han sekel ha baraan nga lugar.*+
16 Ngan magbabayad hiya para han sala nga iya nabuhat kontra ha baraan nga lugar ngan magdudugang liwat hiya hin 20 porsyento han kantidad hito.+ Ihahatag niya ito ha saserdote, basi himoon han saserdote an pagpara han sala+ para ha iya pinaagi han karnero nga lalakí sugad nga halad tungod han pagin salaan, ngan papasayloon hiya.+
17 “Kon may tawo* nga nakasala pinaagi ha pagbuhat han bisan ano han mga butang nga iginsugo ni Jehova nga diri angay buhaton, bisan kon diri hiya maaram hito, salaan la gihapon hiya ngan may baratunon tungod han iya sayop.+
18 Magdadara hiya ha saserdote hin usa nga mahimsog nga karnero nga lalakí tikang ha panon uyon ha ginbanabana nga kantidad para han halad tungod han pagin salaan.+ Katapos, hihimoon han saserdote an pagpara han sala para ha iya tungod han diri tinuyo nga sayop nga iya nabuhat nga diri niya hinbabaroan, ngan papasayloon hiya.
19 Usa ito nga halad tungod han pagin salaan. Nakabuhat gud hiya hin sala kan Jehova.”
Mga footnote
^ Lit., “hin tingog ha panhimaraot (panumpa).” Posible gud nga pahibaro mahitungod hin sayop nga buhat nga nag-uupod hin panhimaraot kontra ha nakabuhat hin sayop o kontra ha testigo kon mapakyas hiya ha pagtestigo.
^ O “usa nga kalag.”
^ O “kalag.”
^ O “usa nga kalag.”
^ Baga hin nagpapasabot nga diri niya gintutuman an iya saad.
^ O “sugad nga hinumdóman (representasyon) nga bahin hito.”
^ O “usa nga kalag.”
^ O “uyon ha baraan nga sekel.”
^ O “usa nga kalag.”
