Mga Buhat han mga Apostol 6:1-15

  • Pito nga lalaki an ginpili para mag-asikaso (1-7)

  • Hi Esteban gin-akusaran hin pagpasipara (8-15)

6  Hito nga mga adlaw han nagtitikadamu na an mga disipulo, an mga Judio nga nagyayakan hin Griego nagtikang pagreklamo kontra ha mga Judio nga nagyayakan hin Hebreo, kay an ira mga balo nga babaye napapabay-an ha adlaw-adlaw nga panhatag hin pagkaon.+  Salit iginpatawag han Dose an mga disipulo ngan ginsidngan: “Diri husto* nga bayaan namon an pulong han Dios basi manhatag hin pagkaon ha mga lamesa.+  Salit mga kabugtoan, pagpili kamo dida ha iyo hin pito nga lalaki nga maopay an reputasyon,*+ nga puno hin espiritu ngan kinaadman,+ basi matokahan namon hira hinin importante nga buruhaton;+  kondi kami magpapadayon ha pag-ampo ngan ha pagtutdo* han pulong.”  An ira ginsiring nakapalipay ha ngatanan nga disipulo, ngan ginpili nira hi Esteban, usa nga lalaki nga puno hin pagtoo ngan baraan nga espiritu, pati na hi Felipe,+ hi Procoro, hi Nicanor, hi Timon, hi Parmenas, ngan hi Nicolas, usa nga proselita nga taga-Antiokia.  Gindara nira hira ha mga apostol, ngan katapos mag-ampo, igintungbaw han mga apostol an ira mga kamot ngada ha ira.+  Salit an pulong han Dios padayon nga nagsarang,+ ngan an mga disipulo padayon nga nagdamu gud+ ha Jerusalem; ngan damu gud nga saserdote an nagin mga tumuroo.+  Yana hi Esteban, nga puno han pag-uyon ngan gahum han Dios, nagbubuhat hin urusahon gud nga mga butang ngan hin mga tigaman dida ha mga tawo.  Pero may dinaop nga mga tawo tikang ha gintatawag nga Sinagoga han mga Tawo nga Ginbuhian, upod an pipira nga taga-Cirene ngan mga taga-Alejandria, ngan an pipira nga tikang ha Cilicia ngan Asia, basi makigdiskusyon kan Esteban. 10  Kondi diri hira nakakaato ha iya kinaadman ngan ha espiritu nga naggigiya ha iya ha pagyakan.+ 11  Salit patago nga nagkombinse hira hin mga tawo nga magsiring: “Nabatian namon hiya nga nagyayakan hin mga pasipara kontra kan Moises ngan ha Dios.” 12  Ngan gin-aghat nira an mga tawo, an mga tigurang, ngan an mga eskriba, ngan tigda nga kinadto hira ha iya ngan pwersado nga gindakop hiya ngan gindara ha Sanhedrin. 13  Ngan nagdara hira hin buwa nga mga testigo, nga nagsiring: “Ini nga tawo diri naundang ha pagyakan kontra hinin baraan nga lugar ngan kontra ha Balaud. 14  Pananglitan, hinbatian namon hiya nga nasiring nga rurumpagon hini nga Jesus nga Nazareno ini nga lugar ngan babag-uhon an mga kustomre nga iginhatag ha aton ni Moises.” 15  Ngan samtang ginkikinita hiya han ngatanan nga nangangalingkod ha Sanhedrin, nakita nira nga an iya nawong pariho han nawong hin anghel.

Mga footnote

Lit., “makalilipay.”
O “pito nga lalaki nga maopay an bantog.”
Lit., “pagministeryo.” Kitaa an Glossary.