Mga Buhat han mga Apostol 22:1-30
22 “Mga kalalakin-an, mga kabugtoan ngan mga amay, pamatii niyo an akon depensa ha iyo yana.”+
2 Pakabati nira nga nagyayakan hiya ha ira ha Hebreo nga yinaknan, mas nagmingaw pa gud hira, ngan nagsiring hiya:
3 “Usa ako nga Judio,+ nga natawo ha Tarso ha Cilicia,+ pero ineskwela ako dinhi hini nga syudad ngan hi Gamaliel+ mismo an akon magturutdo, gintutdoan ako uyon ha pagkaistrikto han Balaud nga gintuman han aton mga kaapoy-apoyan,+ ngan madasigon ako ha pag-alagad ha Dios sugad la ha iyo ngatanan yana.+
4 Gintimaraot ko ini nga Dalan tubtob ha kamatayon, nga gin-gagapos ngan iginpapapriso an kalalakin-an ngan kababayin-an,+
5 sugad han mapapamatud-an han hitaas nga saserdote ngan han bug-os nga grupo han mga tigurang. Nakakarawat liwat ako hin mga surat tikang ha ira para ha kabugtoan ha Damasco, ngan tipakadto na ako basi an mga aadto madara ko nga nakagapos ngadto ha Jerusalem basi sirotan.
6 “Pero samtang nagbibiyahe ako ngan nagtitikahirani ha Damasco, han mga udto na, tigda la nga may masilaw nga lamrag tikang ha langit nga nagsanag ha akon palibot,+
7 ngan natumba ako ha tuna ngan nakabati hin tingog nga nasiring ha akon: ‘Saul, Saul, kay ano nga gintitimaraot mo ako?’
8 Binaton ako: ‘Hin-o ka, Ginoo?’ Ngan nagsiring hiya ha akon: ‘Ako hi Jesus nga Nazareno, nga imo gintitimaraot.’
9 Yana an mga tawo nga kaupod ko nakakita han lamrag, pero waray hira makabati han tingog han nakikiistorya ha akon.
10 Katapos nagpakiana ako: ‘Ginoo, ano an sadang ko buhaton?’ An Ginoo nagsiring ha akon: ‘Buhát, sulod ha Damasco, ngan didto isusumat ha imo an ngatanan nga ipapabuhat ha imo.’+
11 Pero tungod kay waray ako nakikita kay masilaw gud adto nga lamrag, inabot ako ha Damasco nga gintutugwayan han mga kamot han akon mga kaupod.
12 “Katapos, usa nga lalaki nga Ananias an ngaran, nga debotado nga tawo uyon ha Balaud, ngan maopay an ginsisiring mahitungod ha iya han ngatanan nga Judio nga naukoy didto,
13 an kinadto ha akon. Tinindog hiya hirani ha akon ngan nagsiring ha akon: ‘Saul, bugto, makakakita ka na utro!’ Ngan hito mismo nga takna hinangad ako ngan nakita ko hiya.+
14 Nagsiring hiya: ‘Ginpili ka han Dios han aton mga kaapoy-apoyan basi mahibaro han iya kaburut-on ngan makakita han usa nga matadong+ ngan makabati han tingog tikang ha iya baba,
15 kay magigin saksi ka para ha iya ngadto ha ngatanan nga tawo mahitungod han mga butang nga imo nakita ngan nabatian.+
16 Ngan yana kay ano nga naglalangan ka? Buhát, pagpabawtismo, ngan hugasi an imo mga sala+ pinaagi ha pagtawag han iya ngaran.’+
17 “Pero han nakabalik na ako ha Jerusalem+ ngan nag-iinampo ako ha templo, nakakita ako hin bisyon
18 ngan nakita ko hiya nga nasiring ha akon: ‘Pag-apura ngan gawas dayon ha Jerusalem, kay diri nira kakarawaton an imo pagpamatuod mahitungod ha akon.’+
19 Ngan nagsiring ako: ‘Ginoo, hira mismo maaram gud nga hadto napakadto ako ha tagsa nga sinagoga, nga ginpipriso ngan ginkakastigo an mga natoo ha imo;+
20 ngan han ginpapatay hi* Esteban nga imo saksi, natindog ako ha hirani ngan nauyon hito ngan nagbabantay ha pantungbaw nga mga bado han mga nagpapatay ha iya.’+
21 Pero nagsiring hiya ha akon: ‘Lakat, kay susugoon ko ikaw ngadto ha higrayo nga mga nasud.’”+
22 Yana padayon nga namati hira ha iya tubtob hini nga iya ginsiring. Katapos gindaku nira an ira mga tingog, nga nasiring: “Kuhaa ito nga tawo dinhi ha tuna, kay diri hiya angay mabuhi!”
23 Tungod kay naggiginuliat hira, nag-iitsa han ira pantungbaw nga mga bado, ngan nagsasabrag hin tapotapo ha hangin,+
24 nagsugo an kumander han militar nga dad-on hi Pablo ha kwarter han mga sundalo ngan nagsiring nga sadang hiya imbistigaron samtang ginlalatigo, basi mahibaroan gud niya kon kay ano nga naggiginuliat hira hin sugad hini kontra kan Pablo.
25 Pero han gin-unat na nira hiya basi latiguhon, nagsiring hi Pablo ha opisyal han kasundalohan nga natindog didto: “Uyon ba ha balaud nga iyo latiguhon an usa nga Romano* nga waray pa hukmi?”*+
26 Pakabati hini han opisyal han kasundalohan, kinadto hiya ha kumander han militar ngan iginsumat ito, nga nasiring: “Ano an imo plano nga buhaton? Romano man ngay-an ini nga tawo.”
27 Salit an kumander han militar dinaop ngan nagpakiana ha iya: “Sumati ako, Romano ka ba?” Binaton hiya: “Oo.”
28 Nagsiring an kumander han militar: “Ginpalit ko ha daku nga kantidad hin kwarta ini nga mga katungod sugad nga tuminungnong.” Nagsiring hi Pablo: “Pero ako natawo nga may-ada na hini nga mga katungod.”+
29 Salit nangatras dayon tikang ha iya an kalalakin-an nga mag-iimbistigar na unta ha iya nga may upod nga pagpakuri; ngan nahadlok an kumander han militar han iya hinbaroan nga Romano ngay-an hiya ngan tungod kay gin-gapos niya hiya hin mga kadena.+
30 Salit kinabuwasan, tungod kay karuyag gud niya hibaroan kon kay ano nga gin-aakusaran hi Pablo han mga Judio, ginbuhian niya hiya ngan ginsugo an punoan nga mga saserdote ngan an bug-os nga Sanhedrin nga magtirirok. Katapos iginlusad niya hi Pablo ngan ginpatindog hiya ha butnga nira.+
