Mga Buhat han mga Apostol 25:1-27
25 Salit paglabay hin tulo ka adlaw tikang han inabot hi Festo+ ha probinsya ngan nagtikang pagmando, sinagka hiya ha Jerusalem tikang ha Cesarea.
2 Ngan an punoan nga mga saserdote ngan an nangunguna nga kalalakin-an han mga Judio naghatag ha iya hin impormasyon kontra kan Pablo.+ Salit nagtikang hira pakimalooy kan Festo
3 sugad nga pabor* nga pakadtoon hi Pablo ha Jerusalem. Pero nagpaplano hira nga ambuson hi Pablo ngan patayon hiya ha dalan.+
4 Pero nagsiring hi Festo nga magpapabilin hi Pablo nga priso didto ha Cesarea ngan hiya mismo hirani na bumalik didto.
5 “Salit adton may awtoridad dida ha iyo,” siring niya, “paupda ha akon ngadto ngan akusaran hiya, kon may ginbuhat gud man nga sayop ito nga tawo.”+
6 Salit katapos niya magpabilin hin mga walo o napulo ka adlaw kaupod nira, linugsad hiya ngadto ha Cesarea, ngan kinabuwasan liningkod hiya ha lingkoran han paghukom ngan nagsugo nga dad-on hi Pablo ha sulod.
7 Pagsulod niya, an mga Judio nga linugsad tikang ha Jerusalem nanindog ha palibot niya, nga nagpipresenta hin damu nga magbug-at nga akusasyon kontra ha iya nga diri man nira napapamatud-an.+
8 Pero nagsiring hi Pablo sugad nga depensa: “Waray ako nabuhat nga bisan ano nga sala kontra ha Balaud han mga Judio o kontra ha templo o kontra han Cesar.”+
9 Tungod kay karuyag ni Festo nga paboran hiya han mga Judio,+ nagsiring hiya kan Pablo: “Karuyag mo ba sumagka ha Jerusalem ngan didto ka hukman ha akon atubangan may kalabotan hini nga mga butang?”
10 Kondi nagsiring hi Pablo: “Natindog ako ha atubangan han lingkoran han paghukom han Cesar, diin ako angay hukman. Waray ako nabuhat nga sayop ha mga Judio, ngan maaram ka gud liwat hito.
11 Kon tinuod nga usa ako nga magburuhat hin sala ngan may nahimo nga angay hin kamatayon,+ diri ako makikimalooy nga malikyan an kamatayon; pero kon waray basihan an mga akusasyon hini nga mga tawo kontra ha akon, waray tawo nga may katungod ha pagtubyan ha akon ngadto ha ira sugad nga pabor ha ira. Naapela ako ha Cesar!”+
12 Katapos ni Festo makiistorya ha grupo han mga magsaragdon, nagsiring hiya: “Naapela ka ha Cesar; makadto ka ha Cesar.”
13 Paglabay hin pipira ka adlaw, hi Agripa nga hadi ngan hi Bernice inabot ha Cesarea para bisitahon hi Festo basi maghatag hin katalahoran ha iya.
14 Tungod kay nagpabilin hira didto hin pipira ka adlaw, iginpresenta ni Festo ha hadi an kaso ni Pablo, nga nasiring:
“May usa nga tawo nga ginpabay-an ni Felix nga magpabilin nga priso,
15 ngan han nakadto ako ha Jerusalem, an punoan nga mga saserdote ngan an mga tigurang han mga Judio naghatag hin impormasyon mahitungod ha iya,+ nga naghahangyo hin paghukom kontra ha iya.
16 Pero binaton ako ha ira nga diri pamaagi han mga Romano nga itubyan an bisan hin-o nga tawo basi maghatag hin pabor kon an akusado nga tawo waray pa umatubang ha mga nag-aakusar ha iya ngan magkaada higayon nga depensahan an iya kalugaringon may kalabotan ha reklamo ha iya.+
17 Salit pag-abot nira dinhi, waray ako maglangan, lugod kinabuwasan liningkod ako ha lingkoran han paghukom ngan nagsugo nga dad-on ha sulod ito nga tawo.
18 Pagtindog han mga nag-aakusar, waray nira ig-akusar ha iya an bisan hain han magraot nga mga butang nga akon ginlaoman may kalabotan ha iya.+
19 May-ada la hira mga isyu kontra ha iya may kalabotan ha ira kalugaringon nga pagsingba ha dios*+ ngan may kalabotan ha usa nga tawo nga Jesus an ngaran, nga namatay pero padayon nga gin-iinsister ni Pablo nga buhi.+
20 Tungod kay diri ako maaram kon paonan-o susulbaron ini nga isyu, nagpakiana ako kon karuyag niya kumadto ha Jerusalem ngan didto hukman may kalabotan hini nga mga butang.+
21 Pero han nag-apela hi Pablo nga magpabilin ha prisohan samtang ginhuhulat an desisyon han Agusto,*+ nagsugo ako nga padayon nga gwardyahan hiya tubtob nga ipadara ko hiya ha Cesar.”
22 Katapos nagsiring hi Agripa kan Festo: “Karuyag ko mismo mapamatian ito nga tawo.”+ “Buwas,” siring niya, “mapapamatian mo hiya.”
23 Salit kinabuwasan, inabot hira Agripa ngan Bernice nga may magarbo gud nga parada ngan sinulod ha ruwang nga katirokan upod an mga kumander han militar pati na an prominente nga kalalakin-an ha syudad; ngan han nagsugo hi Festo, gindara hi Pablo ha sulod.
24 Ngan nagsiring hi Festo: “Hadi Agripa ngan kamo ngatanan nga aanhi kaupod namon, nakikita niyo ini nga tawo nga ginhangyo ha akon han ngatanan nga Judio ha Jerusalem ngan dinhi, nga naggiginuliat nga diri na hiya angay mabuhi pa.+
25 Pero nakita ko nga waray hiya nabuhat nga angay hin kamatayon.+ Salit han ini mismo nga tawo an nag-apela ha Agusto, nagdesisyon ako nga ipadara hiya.
26 Kondi diri pa ako sigurado kon ano an akon isusurat ha akon Ginoo mahitungod ha iya. Salit gindara ko hiya ha atubangan niyo ngatanan, ngan labi na ha imo atubangan, Hadi Agripa, basi katapos han pag-usisa ha iya kaso, bangin may maisurat na ako.
27 Kay baga hin diri makatadunganon para ha akon nga magpadara hin priso ngan diri liwat isumat an mga akusasyon kontra ha iya.”
