An Siyahan nga Libro han mga Cronicas 20:1-8
20 Ha tinikangan han tuig,* ha panahon nga an mga hadi nagawas ha pakiggirra, ginpangunahan ni Joab+ an kasundalohan ngan ginbungkag an tuna han mga Ammonita; inabot hiya ngan ginpalibotan an Raba,+ samtang hi David nagpabilin ha Jerusalem.+ Gin-atake ni Joab an Raba ngan ginbungkag ito.+
2 Katapos, ginkuha ni David tikang ha ulo ni Malcam an korona, ngan hinbaroan nga an kabug-aton hito usa ka talanton* nga bulawan, ngan dida hito may-ada marahalon nga mga bato; ngan iginbutang ito ha ulo ni David. Nagkuha liwat hiya hin damu gud nga dinag-an tikang ha syudad.+
3 Ngan iya igin-gawas an katawohan nga aadto ha sulod ngan ginpatrabaho hira+ ha pagsarutso hin mga bato ngan ha pagtrabaho gamit an magtarom nga mga garamiton nga puthaw ngan an mga atsa. Ito an ginbuhat ni David ha ngatanan nga syudad han mga Ammonita. Ha kataposan, hi David ngan an ngatanan nga sundalo binalik ha Jerusalem.
4 Katapos hito, nagkaada hin girra ha Gezer kontra ha mga Filisteo. Hito nga panahon ginpatay ni Sibecai+ nga Husatita hi Sipai, nga tulin han mga Refaim,+ ngan nasakop hira.
5 Ngan nagkaada utro girra kontra ha mga Filisteo, ngan ginpatay ni Elhanan nga anak nga lalaki ni Jair hi Lami nga bugto ni Goliat+ nga Giteo, nga an bangkaw may karaptan nga pariho han pabalabag nga kahoy nga ginagamit han mga parahablon.+
6 Nagkaada pa utro girra ha Gat,+ diin may usa nga lalaki nga diri ordinaryo an kadaku,+ nga may 6 nga tudlo ha tagsa nga kamot ngan 6 nga tudlo ha tagsa nga tiil,* 24 ngatanan; ngan hiya liwat tulin han mga Refaim.+
7 Gintinamay niya+ an Israel. Salit ginpatay hiya ni Jonathan nga anak nga lalaki ni Simea+ nga bugto nga lalaki ni David.
8 Ini an katulinan han mga Refaim+ ha Gat,+ ngan namatay hira ha kamot ni David ngan ha kamot han iya mga surugoon.
