An Siyahan nga Libro han mga Cronicas 18:1-17
18 Ha urhi, ginpirde ni David an mga Filisteo ngan ginsakop hira ngan ginkuha an Gat+ ngan an mga bungto nga sakop* hito tikang ha mga kamot han mga Filisteo.+
2 Katapos, iya ginpirde an Moab,+ ngan an mga Moabita nagin mga surugoon ni David ngan naghatag hira hin bayad.*+
3 Ginpirde ni David hi Hadi Hadadezer+ han Zoba+ hirani ha Hamat+ samtang nagbibiyahe hiya basi ig-establisar an iya awtoridad ha Salog Eufrates.+
4 Nakabihag hi David hin 1,000 nga karuwahe, 7,000 nga parapangabayo, ngan 20,000 nga nagbabaktas nga sundalo ni Hadadezer.+ Katapos, ginpamigtingan ni David* an haros ngatanan nga kabayo nga may karuwahe labot la han 100 nga kabayo.+
5 Han an mga Siryano ha Damasco kinadto basi buligan hi Hadi Hadadezer han Zoba, ginpamatay ni David an 22,000 nga Siryano.+
6 Katapos, nagtindog hi David hin mga kampo hin mga sundalo ha Damasco ha Sirya, ngan an mga Siryano nagin mga surugoon ni David ngan naghatag hira hin bayad. Gintagan ni Jehova hi David hin kadaogan* bisan diin hiya kumadto.+
7 Ginkuha liwat ni David an malidong nga bulawan nga mga taming tikang ha mga surugoon ni Hadadezer ngan gindara ito ha Jerusalem.
8 Nagkuha hi David hin damu gud nga tumbaga* tikang ha Tibhat ngan Cun, nga mga syudad ni Hadadezer. Gin-gamit ito ni Solomon ha paghimo han Dagat* nga tumbaga,+ han mga harigi, ngan han mga garamiton nga tumbaga.+
9 Han hinbaroan ni Hadi Tou han Hamat nga ginpirde ni David an ngatanan nga sundalo ni Hadi Hadadezer+ han Zoba,+
10 ginsugo dayon niya an iya anak nga lalaki nga hi Hadoram ngadto kan Hadi David basi kumustahon ngan pasidunggan hiya kay nakiggirra hiya kan Hadadezer ngan ginpirde niya hiya (kay hi Hadadezer agsob makiggirra kan Tou), ngan nagdara hi Hadoram han ngatanan nga klase hin gamit nga bulawan, silber, ngan tumbaga.
11 Ginbaraan ito ni Hadi David para kan Jehova,+ upod an mga silber ngan mga bulawan nga iya gindara tikang ha ngatanan nga nasud: tikang ha Edom ngan Moab, tikang ha mga Ammonita,+ ha mga Filisteo,+ ngan ha mga Amalekita.+
12 Ginpamatay ni Abisai+ nga anak nga lalaki ni Zeruias+ an 18,000 nga Edomita ha Walog han Asin.+
13 Nagtindog hiya ha Edom hin mga kampo hin mga sundalo, ngan an ngatanan nga Edomita nagin mga surugoon ni David.+ Gintagan ni Jehova hi David hin kadaogan* bisan diin hiya kumadto.+
14 Padayon nga naghadi hi David ha bug-os nga Israel,+ ngan nagpapadapat hiya hin hustisya ngan katadongan ha ngatanan niya nga katawohan.+
15 Hi Joab nga anak nga lalaki ni Zeruias an nangunguna ha kasundalohan,+ hi Jehosafat+ nga anak nga lalaki ni Ahilud an pararekord,
16 Hi Zadok nga anak nga lalaki ni Ahitub ngan hi Ahimelec nga anak nga lalaki ni Abiatar an mga saserdote, ngan hi Savsa an sekretaryo.
17 Hi Benaias nga anak nga lalaki ni Jehoiada an nangunguna ha mga Kereteo+ ngan mga Peleteo.+ Ngan an mga anak nga lalaki ni David amo an aada ha siyahan nga katungdanan sunod ha hadi.
