An Siyahan nga Libro han mga Cronicas 13:1-14
13 Ginkonsulta ni David an mga lider han kada 1,000 ngan han kada 100 ngan an tagsa nga iba pa nga lider.+
2 Katapos, hi David nagsiring ha bug-os nga kongregasyon han Israel: “Kon ha iyo baga hin maopay ito ngan ginkakarawat ito ni Jehova nga aton Dios, magpadara kita hin mensahe ha aton nahibibilin nga kabugtoan ha ngatanan nga rehiyon han Israel ngan pati ha mga saserdote ngan ha mga Levita, ha ira mga syudad+ nga may mga panabsaban, nga kumanhi ngan umupod ha aton.
3 Ngan igbalik naton an Arka+ han aton Dios.” Kay waray nira ito panginanoa ha mga adlaw ni Saul.+
4 An bug-os nga kongregasyon inuyon nga buhaton ito kay baga hin husto ito para ha ngatanan nga katawohan.
5 Salit gintirok ni David an bug-os nga Israel, tikang ha salog* han Ehipto tubtob ha Lebo-hamat,*+ basi dad-on an Arka han tinuod nga Dios tikang ha Kiriat-jearim.+
6 Hi David ngan an bug-os nga Israel sinagka ngadto ha Baala,+ ngadto ha Kiriat-jearim nga sakop han Juda, basi kuhaon tikang didto an Arka han tinuod nga Dios, hi Jehova, nga nalingkod ha trono ha bawbaw* han mga kerubin,+ diin gintatawag an iya ngaran.
7 Kondi an Arka han tinuod nga Dios ira iginsakay ha bag-o nga karomata+ ngan gindara ito tikang ha balay ni Abinadab, ngan hira Uzah ngan Ahio an nagtutugway han karomata.+
8 Hi David ngan an bug-os nga Israel nagsiselebrar ha atubangan han tinuod nga Dios ha bug-os nira nga kusog, nga ginduduyogan hin mga kanta, mga arpa, iba pa nga mga instrumento nga may kwerdas, mga tamborin,+ mga simbal,+ ngan mga trumpeta.+
9 Kondi pag-abot nira ha giriokan han Kidon, igin-unat ni Uzah an iya kamot ngan ginkaptan an Arka, kay haros mahulog ito han mga baka.
10 Salit naglarab an kasina ni Jehova kontra kan Uzah, ngan Iya ginpatay hiya kay iya igin-unat an iya kamot ngadto ha Arka,+ ngan namatay hiya dida ha atubangan han Dios.+
11 Kondi nasina* hi David kay an kapungot ni Jehova naglarab kontra kan Uzah; ngan ito nga lugar gintatawag nga Perez-uzah* tubtob hini nga adlaw.
12 Salit hito nga adlaw nahadlok hi David ha tinuod nga Dios ngan nagsiring: “Paonan-o ko madadara an Arka han tinuod nga Dios ngadto ha akon syudad?”+
13 Waray dad-a ni David an Arka ngadto ha iya gin-uukyan ha Syudad ni David, pero nagsugo hiya nga dad-on ito ha balay ni Obed-edom nga Giteo.
14 An Arka han tinuod nga Dios nakadto ha panimalay ni Obed-edom, nagpabilin ito ha iya balay ha sulod hin tulo ka bulan, ngan padayon nga ginbendisyonan ni Jehova an panimalay ni Obed-edom ngan an ngatanan niya nga gintatag-iya.+
