An Siyahan nga Libro han mga Cronicas 14:1-17
14 Hi Hadi Hiram+ han Tiro nagpadara hin mga mensahero ngadto kan David, upod an mga kahoy nga sedro, mga mason,* ngan mga panday basi magtukod hin balay* para ha iya.+
2 Ngan maaram hi David nga marig-on nga gin-establisar ni Jehova an iya posisyon sugad nga hadi han Israel,+ kay ginpahitaas gud an iya pagkahadi para ha Israel nga Iya katawohan.+
3 Nagkuha hi David hin damu pa nga asawa+ ha Jerusalem, ngan hi David nagkaada hin dugang pa nga mga anak nga lalaki ngan mga anak nga babaye.+
4 Ini an mga ngaran han iya mga anak nga natawo ha Jerusalem:+ hira Sammua, Sobab, Nathan,+ Solomon,+
5 Ibhar, Elisua, Elpelet,
6 Noga, Nefeg, Jafia,
7 Elisama, Beeliada, ngan Elifelet.
8 Han hinbatian han mga Filisteo nga gindihogan na hi David sugad nga hadi han bug-os nga Israel,+ an ngatanan nga Filisteo nagkasagka basi pamilngon hi David.+ Han hinbatian ni David an mahitungod hito, ginawas hiya kontra ha ira.
9 Katapos, an mga Filisteo nagkaabot ngan padayon nga ginsulong an Walog* han Refaim.+
10 Hi David nagpakiana ha Dios, nga nasiring: “Sadang ba ako sumagka basi makiggirra ha mga Filisteo? Ihahatag mo ba hira ha akon kamot?” Hi Jehova binaton ha iya: “Sagka, ngan ihahatag ko gud hira ha imo kamot.”+
11 Salit hi David sinagka ngadto ha Baal-perazim,+ ngan iya hira ginpamatay didto. Ngan hi David nagsiring: “Gin-guhangan han tinuod nga Dios an rumbay han akon mga kaaway pinaagi han akon kamot, pariho hin guhang nga nahihimo han katubigan.” Ito an hinungdan kon kay ano nga ginngaranan nira ito nga lugar hin Baal-perazim.*
12 Ginbayaan han mga Filisteo an ira mga dios didto, ngan han hi David naghatag han sugo, ginpansunog ini ha kalayo.+
13 Ha urhi, sinulong utro an mga Filisteo didto ha walog.*+
14 Hi David nagpakiana na liwat ha Dios, pero an tinuod nga Dios nagsiring ha iya: “Ayaw pagdiretso pagsagka ha pag-atake ha ira. Lugod, libot ha ira luyo, ngan sulonga hira ha atubangan han kakahoyan nga baca.+
15 Ngan kon mabatian mo tikang ha bawbaw han kakahoyan nga baca an tunog nga sugad hin nagmamartsa, tikangi an imo pag-atake, kay an tinuod nga Dios nag-una na ha imo basi pamatayon an kasundalohan han mga Filisteo.”+
16 Salit ginbuhat ni David an iginsugo ha iya han tinuod nga Dios,+ ngan ira ginpamatay an Filisteo nga kasundalohan tikang ha Gibeon tubtob ha Gezer.+
17 Ngan an kabantogan ni David nakaabot ha ngatanan nga katunaan, ngan iginpaabat ni Jehova an kahadlok tungod ha iya ha ngatanan nga nasud.+
