An Siyahan nga Libro han mga Cronicas 11:1-47
11 Paglabay han panahon, an ngatanan nga Israelita nagtirirok didto kan David ha Hebron+ ngan nagsiring: “Kitaa! Imo kami kalugaringon nga tul-an ngan unod.*+
2 Ha naglabay nga mga panahon han hi Saul pa an hadi, ikaw an nangunguna ha Israel ha mga pakiggirra hito.*+ Ngan hi Jehova nga imo Dios nagsiring ha imo: ‘Ikaw an mag-aataman* han Israel nga akon katawohan, ngan ikaw an magigin lider han Israel nga akon katawohan.’”+
3 Salit an ngatanan nga tigurang han Israel kinadto ha hadi didto ha Hebron, ngan hi David naghimo hin kasabotan kaupod nira ha Hebron ha atubangan ni Jehova. Katapos, ira gindihogan hi David sugad nga hadi han Israel,+ sumala ha ginsiring ni Jehova pinaagi kan Samuel.+
4 Ha urhi, hi David ngan an bug-os nga Israel kinadto ha Jerusalem, karuyag sidngon, ha Jebus,+ diin an mga Jebusita+ naukoy hito nga tuna.
5 Gintamay hi David han mga umurukoy ha Jebus: “Diri ka gud makakasulod ngadi!”+ Kondi ginsakop ni David an balwarte han Zion,+ nga amo yana an Syudad ni David.+
6 Salit hi David nagsiring: “Kon hin-o an siyahan nga umatake ha mga Jebusita magigin lider* ngan prinsipe.” Ngan hi Joab+ nga anak ni Zeruias an siyahan nga sinagka, ngan hiya an nagin lider.
7 Katapos, hi David inukoy ha balwarte. Ito an hinungdan nga ira ito gintawag nga Syudad ni David.
8 Nagtikang hiya pagtukod han mga pader han syudad ngan hin iba pa nga mga istraktura ha bug-os nga syudad, tikang ha Bungtod* ngadto ha mga lugar ha palibot hito, ngan iginpahiuli ni Joab an iba pa nga bahin han syudad.
9 Hito nga paagi hi David padayon nga nagtikabantog,+ ngan kaupod niya hi Jehova han mga hugpo.
10 Yana ini an mga lider han magkusog nga mga girriro ni David, nga naghatag ha iya hin marig-on nga suporta ha iya pagkahadi, kaupod an bug-os nga Israel, basi himoon hiya nga hadi sumala ha ginsiring ni Jehova mahitungod han Israel.+
11 Ini an lista han magkusog nga mga girriro ni David: hi Jasobeam+ nga anak hin Hacmonita, an lider han tulo.+ Iya ginwarawara an iya bangkaw kontra ha 300 nga lalaki ngan ginpamatay hira ha usa la ka higayon.+
12 Sunod ha iya amo hi Eleazar+ nga anak nga lalaki ni Dodo nga Ahohita.+ Usa hiya han tulo nga magkusog nga girriro.
13 Kaupod hiya ni David ha Pas-damim,+ diin nagtirirok an mga Filisteo basi makiggirra. May-ada didto tuna nga puno hin sebada, ngan an katawohan namalagiw tungod han mga Filisteo.
14 Kondi tinindog hiya ha butnga han uma ngan gindepensahan ito ngan padayon nga ginpamatay an mga Filisteo, salit hi Jehova nagpahinabo hin daku nga kadaogan.*+
15 Tulo han 30 nga lider an linugsad ngadto ha bato, ngadto kan David ha lungib han Adulam,+ samtang an Filisteo nga kasundalohan nagkakampo ha Walog* han Refaim.+
16 Hito nga panahon hi David nakadto ha iya arayopan, ngan may kampo han mga Filisteo ha Bethlehem.
17 Katapos, iginpahayag ni David an iya hingyap: “Kon makainom la unta ako han tubig tikang ha tirokan hin tubig nga hirani ha ganghaan han Bethlehem!”+
18 Salit an tulo nagpirit pagsulod ha kampo han mga Filisteo ngan nag-alog tikang ha tirokan hin tubig nga hirani ha ganghaan han Bethlehem ngan gindara ito kan David; kondi nagdumiri hi David ha pag-inom hito ngan iginhuwad ito ha tuna ha atubangan ni Jehova.
19 Nagsiring hiya: “Imposible gud nga buhaton ko ini tungod han akon pagtahod ha Dios! Iinumon ko ba an dugo hini nga mga lalaki nga nagbutang han ira kinabuhi* ha peligro?+ Tungod kay iginbutang nira ha peligro an ira kinabuhi* amo nga nakadara hira hito.” Salit nagdumiri hiya pag-inom hito. Ini an mga ginbuhat han iya tulo nga magkusog nga girriro.
20 Hi Abisai+ nga bugto ni Joab+ an nagin lider han lain pa nga tulo; iya ginwarawara an iya bangkaw kontra ha 300 nga lalaki ngan ginpamatay hira, ngan may reputasyon hiya pariho han tulo.+
21 Mahitungod han lain pa nga tulo, hiya an mas prominente kay ha duha ha ira, ngan hiya an ira lider; pero waray niya matupngi an ranggo han siyahan nga tulo.
22 Hi Benaias+ nga anak ni Jehoiada usa nga maisugon nga tawo* nga nagbuhat hin damu nga talagsahon nga butang didto ha Kabzeel.+ Iya ginpatay an duha nga anak nga lalaki ni Ariel nga taga-Moab, ngan usa ka adlaw han nauran hin niebe linusad hiya ha usa nga tirokan hin tubig ngan nagpatay hin leon.+
23 Ginpatay liwat niya an usa nga Ehiptohanon nga lalaki nga diri ordinaryo an kadaku—lima ka siko* an kahitaas.+ Bisan kon ito nga Ehiptohanon may ginkakaptan nga bangkaw pariho han pabalabag nga kahoy nga ginagamit han mga parahablon,+ hi Benaias nakig-away ha iya gamit an usa nga tungkod ngan gin-agaw an bangkaw tikang ha kamot han Ehiptohanon ngan ginpatay hiya pinaagi han iya mismo bangkaw.+
24 Ini an mga ginbuhat ni Benaias nga anak ni Jehoiada, ngan may reputasyon hiya nga pariho han tulo nga magkusog nga girriro.
25 Bisan kon mas prominente gud hiya kay han trenta, waray niya matupngi an ranggo han tulo.+ Kondi gintuinan hiya ni David nga manguna ha iya personal nga mga gwardya.
26 An magkusog nga mga girriro han mga pwersa militar amo hi Asahel+ nga bugto ni Joab, hi Elhanan nga anak nga lalaki ni Dodo nga taga-Bethlehem,+
27 hi Sammot nga Harorita, hi Helez nga Pelonita,
28 hi Ira+ nga anak nga lalaki ni Ikes nga taga-Tekoa, hi Abi-ezer+ nga taga-Anatot,
29 hi Sibecai+ nga Husatita, hi Ilai nga Ahohita,
30 hi Maharai+ nga Netofatita, hi Heled+ nga anak nga lalaki ni Baanah nga Netofatita,
31 hi Itai nga anak nga lalaki ni Ribai nga taga-Gibeah han mga Benjaminita,+ hi Benaias nga taga-Piraton,
32 hi Hurai nga tikang ha mga walog* han Gaas,+ hi Abiel nga Arbatita,
33 hi Azmavet nga Baharumita, hi Eliaba nga Saalbonita,
34 an mga anak nga lalaki ni Hasem nga Gizonita, hi Jonathan nga anak ni Sagee nga Hararita,
35 hi Ahiam nga anak nga lalaki ni Sacar nga Hararita, hi Elifal nga anak nga lalaki ni Ur,
36 hi Hefer nga Mekeratita, hi Ahias nga Pelonita,
37 hi Hezro nga taga-Carmel, hi Naarai nga anak nga lalaki ni Ezbai,
38 hi Joel nga bugto ni Nathan, hi Mibhar nga anak nga lalaki ni Hagri,
39 hi Zelek nga Ammonita, hi Naharai nga taga-Berot, nga paradara han mga gamit nga pan-girra ni Joab nga anak ni Zeruias;
40 hi Ira nga Itrita, hi Gareb nga Itrita,
41 hi Uria+ nga Hiteo, hi Zabad nga anak nga lalaki ni Alai,
42 hi Adina nga anak nga lalaki ni Siza nga Rubenita, nga usa nga lider han mga Rubenita, ngan an 30 nga iya kaupod;
43 hi Hanan nga anak nga lalaki ni Maaca, hi Josafat nga Mitnita,
44 hi Uzia nga taga-Astarot, hira Sama ngan Jeiel nga mga anak nga lalaki ni Hotam nga taga-Aroer;
45 hi Jediael nga anak nga lalaki ni Simri, ngan hi Joha nga iya bugto nga Tizita;
46 hi Eliel nga Mahavita, hira Jeribai ngan Josavias nga mga anak nga lalaki ni Elnaam, ngan hi Itma nga Moabita;
47 hira Eliel, Obed, ngan Jaasiel nga Mezobaita.
Mga footnote
^ O “Imo kami mga kadugo.”
^ Lit., “an naggagawas ngan an nagsusulod han Israel.”
^ Lit., “ulo.”
^ O “Milo.” Usa nga Hebreo nga termino nga nangangahulogan nga “pantambak.”
^ O “katalwasan.”
^ O “Hamubo nga Kapatagan.”
^ O “ira kalag.”
^ O “ira kalag.”
^ Lit., “an anak han maisugon nga lalaki.”
