An Siyahan nga Libro han mga Cronicas 19:1-19
19 Ha urhi, namatay hi Nahas nga hadi han mga Ammonita, ngan an iya anak an nagin hadi kasaliwan niya.+
2 Ngan nagsiring hi David: “Magpapakita ako hin maunungon nga gugma+ kan Hanun nga anak ni Nahas, kay an iya tatay nagpakita hin maunungon nga gugma ha akon.” Salit nagsugo hi David hin mga mensahero basi liawon hiya tungod han kamatay han iya tatay. Pero han an mga surugoon ni David sinulod ha tuna han mga Ammonita+ basi liawon hi Hanun,
3 an mga prinsipe han mga Ammonita nagsiring kan Hanun: “Kahuna mo ba nga ginpapasidunggan ni David an imo tatay pinaagi ha pagsugo hin mga magliliaw ha imo? Diri ba kinanhi ha imo an iya mga surugoon basi mag-usisa hin maopay ngan mag-espiya han tuna ngan sakupon ka?”
4 Salit ginkuha ni Hanun an mga surugoon ni David ngan gin-ahitan hira+ ngan gin-utod an katunga han ira mga bado tubtob ha ira bubot ngan ginpalakat hira.
5 Han iginsumat kan David an mahitungod han mga lalaki, nagsugo dayon hiya hin iba basi tapoon hira, kay naalohan gud hira; ngan an hadi nagsiring ha ira: “Didto la anay kamo ha Jerico+ tubtob nga tumubo utro an iyo mga bungot, ngan katapos, balik kamo.”
6 Paglabay han panahon, nakita han mga Ammonita nga nangangalas gud hi David ha ira, salit hi Hanun ngan an mga Ammonita nagpadara hin 1,000 ka talanton* nga silber basi igsuhol para hin mga karuwahe ngan mga parapangabayo tikang ha Mesopotamia,* Aram-maaca, ngan Zoba.+
7 Amo nga nagsuhol hira para hin 32,000 nga karuwahe, kaupod an hadi han Maaca ngan an iya katawohan. Katapos, inabot hira ngan nagkampo ha atubangan han Medeba.+ An mga Ammonita nagkatirok tikang ha ira mga syudad ngan ginawas para ha pakiggirra.
8 Han nakabati hi David mahitungod hito, iya ginsugo hi Joab+ ngan an ngatanan nga sundalo, pati na an iya pinakamagkusog nga mga girriro.+
9 Ngan an mga Ammonita ginawas ngan pinwesto basi makiggirra didto ha aragian tipasulod ha syudad samtang an mga hadi nga inupod nakadto ha kapatagan nga bulag ha ira.
10 Han nakita ni Joab nga an nasulong nga kasundalohan naatake ha iya tikang ha prente ngan ha luyo, ginpili niya an pipira han pinakamag-opay nga mga sundalo ha Israel ngan ginpapwesto hira basi tapoon an mga Siryano.+
11 An iba pa nga kalalakin-an iya iginbutang ilarom han pagpanguna* han iya bugto nga hi Abisai,+ para papwestuhon hira basi tapoon an mga Ammonita.
12 Katapos, nagsiring hiya: “Kon an mga Siryano+ magin mas makusog kay ha akon, kinahanglan buligan mo ako; pero kon an mga Ammonita magin mas makusog kay ha imo, bubuligan ko ikaw.
13 Kinahanglan magin marig-on ngan maisugon+ kita para ha aton katawohan ngan para ha mga syudad han aton Dios, ngan bubuhaton ni Jehova kon ano an maopay ha iya pagkita.”
14 Katapos, gintapo ni Joab ngan han iya mga tawo an mga Siryano ngan nakiggirra ha ira, ngan namalagiw hira tikang ha iya atubangan.+
15 Han nakita han mga Ammonita nga namalagiw na an mga Siryano, namalagiw liwat hira tikang kan Abisai nga iya bugto ngan sinulod ha syudad. Katapos hini, binalik hi Joab ha Jerusalem.
16 Han nakita han mga Siryano nga napirde na hira han Israel, nagsugo hira hin mga mensahero basi ipatawag an mga Siryano ha rehiyon han Salog,*+ ngan hi Sopac nga lider han kasundalohan ni Hadadezer an nangunguna ha ira.+
17 Han iginsumat ito kan David, gintirok dayon niya an bug-os nga Israel ngan tinabok ha Jordan ngan kinadto ha ira ngan pinwesto basi makiggirra ha ira. Hira David pinwesto basi tapoon an mga Siryano ngan nakiggirra hira ha iya.+
18 Kondi an mga Siryano namalagiw tikang ha Israel; ngan ginpamatay ni David an 7,000 nga parapadalagan hin karuwahe ngan 40,000 nga nagbabaktas nga sundalo nga mga Siryano, ngan iya ginpatay hi Sopac nga lider han kasundalohan.
19 Han nakita han mga surugoon ni Hadadezer nga napirde na hira han Israel,+ nakigmurayaw dayon hira kan David ngan nagin iya mga sakop;+ ngan an Sirya waray na maruyag pagbulig ha mga Ammonita.
