An Siyahan nga Libro han mga Cronicas 10:1-14
-
Kamatay ni Saul ngan han iya mga anak (1-14)
10 Hito nga panahon an mga Filisteo nakikiggirra ha Israel. Ngan an kalalakin-an han Israel namalagiw tikang ha atubangan han mga Filisteo, ngan damu an ginpamatay ha Bukid Gilboa.+
2 Ginlanat han mga Filisteo hi Saul ngan an iya mga anak nga lalaki tubtob nga naabtan hira, ngan ginpamatay han mga Filisteo hira Jonathan, Abinadab, ngan Malki-sua,+ nga mga anak ni Saul.
3 Nagtikaduro an pakiggirra kontra kan Saul, ngan hin-agian hiya han mga parapamana, ngan nasamaran hiya han mga parapamana.+
4 Katapos, nagsiring hi Saul ha iya paradara han mga gamit nga pan-girra: “Hulbota an imo espada ngan ibuno ito ha akon, basi inin diri turi nga kalalakin-an diri kumanhi ngan trataron ako hin waray kalooy.”*+ Kondi nadiri an iya paradara han mga gamit nga pan-girra, kay nahahadlok gud hiya. Salit ginkuha ni Saul an espada ngan ginbuno an iya kalugaringon.+
5 Han nakita han paradara han mga gamit nga pan-girra ni Saul nga patay na hiya, ginbuno liwat niya an iya kalugaringon gamit an iya espada ngan namatay hiya.
6 Salit hi Saul ngan an iya tulo nga anak, ngan an ngatanan ha iya panimalay parapriho nagkamatay.+
7 Han nakita han ngatanan nga katawohan han Israel ha walog* nga namalagiw na an ngatanan ngan patay na hi Saul ngan an iya mga anak, nagtikang hira bumaya ha ira mga syudad ngan namalagiw. Katapos hito, an mga Filisteo nangabot ngan gin-ukyan ito.
8 Kinabuwasan, han an mga Filisteo nangabot basi panguhaon an mga gamit han mga ginpamatay, nakita nira hi Saul ngan an iya mga anak nga patay na ha Bukid Gilboa.+
9 Salit ira ginhukasan hiya ngan ginpugotan ngan ginpananggal an iya mga gamit nga pan-girra, ngan nagpadara hira hin mensahe ha bug-os nga tuna han mga Filisteo nga ipasamwak an sumat ngadto ha ira mga idolo+ ngan ha katawohan.
10 Katapos, an iya mga gamit nga pan-girra ira iginbutang ha balay* han ira dios ngan ginbitay an iya ulo ha balay ni Dagon.+
11 Han nabatian han ngatanan nga taga-Jabes+ ha Gilead an mahitungod han ngatanan nga ginbuhat han mga Filisteo kan Saul,+
12 binuhát an ngatanan nga girriro ngan gindara an patay nga lawas ni Saul ngan an patay nga lawas han iya mga anak. Ira ito gindara ha Jabes ngan ginlubong an ira mga tul-an ha ilarom han daku nga kahoy ha Jabes,+ ngan nagpuasa hira hin pito ka adlaw.
13 Salit namatay hi Saul tungod han iya pagin diri matinumanon kan Jehova kay waray hiya sumugot ha pulong ni Jehova,+ ngan nagkonsulta hiya ha espiritista+
14 imbes nga magpakiana kan Jehova. Salit Iya hiya ginpatay ngan igintubyan an pagkahadi ngadto kan David nga anak ni Jesse.+
