Anto so Bautismo?

I-PLAY

Anto so Bautismo?

Say ebat na Biblia

Pian nabautismoan so sakey ya too, kailangan ya sikatoy ilubog odino ipalseb ed danum. a Dakel ya bautismo so akarekord ed Biblia. (Gawa 2:41) Say sakey ed satan et say impanpabautismo nen Jesus, ya impalseb ed Ilog Jordan. (Mateo 3:13, 16) Kalabas na pigaran taon, walay Etiopen laki ya nampabautismo diad “kawalaan na danum” ya asingger ed dalan legan ya sikatoy manbabiahe.—Gawa 8:36-40.

Imbangat nen Jesus ya kaukolan a nabautismoan iray magmaliw ya papatumbok to. (Mateo 28:19, 20) Ontan met so imbangat nen apostol Pedro.—1 Pedro 3:21.

Diad sayan artikulo

Antoy labay ya ibaga na bautismo?

Say sakey et manpabautismo pian ipanengneng ed arum odino diad publiko ya nagbabawian to la ray kasalanan to, tan insipan to ed Dios ya gawaen toy panlabayan To anggan antoy nagawa. Desidido met ya lanang ton unoren so Dios tan si Jesus diad amin ya gawaen tod bilay to. Saray manpabautismo et akaparaan ira ya gawaen so panlabayan na Dios pian manbilay ira na andi-anggaan.

Say pangipalseb ed danum et dugarugan simbolo ed pananguman ya gawaen na sakey ed bilay to. Akin ey? Inkompara na Biblia so bautismo ed ponpon. (Roma 6:4; Colosas 2:12) No say sakey et ipalseb ed danum, ipapanengneng to ya sikatoy inatey la ed datin paraan na kabibilay to. No sikatoy onimwas la ed danum, igapo toy balon bilay bilang dedikadon Kristiano.

Antoy ibabaga na Biblia tungkol ed pambinyag ed baby odino christening?

Anggapoy nabasa ed Biblia ya pambinyag na baby odino christening. b

Say pambinyag ed baby et ag-ibabangat na Biblia. Nabasa ditan ya no say sakey et labay toy manpabautismo, wala ray kailangan ton gawaen pian nabautismoan. Singa bilang, kailangan ton natalosan iray manunan bangat na Biblia tan dapat ton iyaplika iratan ed bilay to. Antis ya nabautismoan, kailangan ya nagbabawian to la ray kasalanan to tan indedika to lay sarili to ed Dios panamegley na pikakasi. (Gawa 2:38, 41; 8:12) Ag-iratan nagawan na saray baby.

Antoy labay ya ibaga na manpabautismo ed ngaran na Ama, Anak, tan masanton espiritu?

Oniay ingganggan nen Jesus ed saray papatumbok to: “Ibangat yo iray totoo ed amin a nasyon pian magmaliw iran disipulok, a bautismoan yo ra ed ngaran na Ama tan ed ngaran na Anak tan ed ngaran na masanton espiritu, ya ibangat yo ran mangunor ed amin ya ingganggan kod sikayo.” (Mateo 28:19, 20) Abitla ditan ya bautismoan ira “ed ngaran na” lapud saray manpabautismo et kailangan dan bidbiren so autoridad tan posisyon na Ama tan say Anak to, ontan met ed betang na masanton espiritu na Dios. Bilang ilustrasyon, oniay imbaga nen apostol Pedro ed sakey ya laki ya inyanak a lupoy: “Diad ngaran nen Jesu-Kristo a Nazareno, akar ka!” (Gawa 3:6) Antoy labay ya ibaga nen Pedro ed saman ya imbaga to? Bibidbiren to tan rerespetoen toy autoridad nen Kristo ya rason no akin ya inmabig so laki.

Say “Ama” et ontutukoy ed si Jehova c a Dios. Lapud sikato so Amalsa, Angiter na Bilay, tan Makapanyarin-amin a Dios, si Jehova so walaan na sankatagyan ya autoridad.—Genesis 17:1; Apocalipsis 4:11.
Say “Anak” et si Jesu-Kristo, ya angiter na bilay to parad sikatayo. (Roma 6:23) Ag-itayo makaligtas no agtayo bidbiren tan awaten so importantin betang nen Jesus parad gagala na Dios ed saray totoo.—Juan 14:6; 20:31; Gawa 4:8-12.
Say “masanton espiritu” et aktibon puersa odino pakayarin uusaren na Dios. d Inusar na Dios so masanton espiritu to pian mamalsa, pian mangiter na bilay, pian ipasabi mensahe to ed saray propeta tan arum ni, tan atan met so iiter tod saray lingkor to pian nagawaan da so panlabayan to. (Genesis 1:2; Job 33:4; Roma 15:18, 19) Inusar met na Dios so masanton espiritu to ya mangigiya ed saray nansulat na Biblia pian nisulat da so walad kanonotan to.—2 Pedro 1:21.

Kasin kasalanan so manpabautismo lamet?

Dakel ya totoo so mansasalat na relihyon da. Balet panon to no abautismoan ira ed datin relihyon da? Kasin mankasalanan ira no manpabautismo lamet ira? Panisiaan na arum ya kasalanan itan lapud samay ibabaga na Efeso 4:5: “Sakey a Katawan, sakey a pananisia, sakey a bautismo.” Balet, ag-ibabaga na sayan bersikulo ya agnayarin manpabautismo lamet so sakey ya too. Akin ey?

Konteksto. Diad konteksto na Efeso 4:5 et indanet nen apostol Pablo ya saray tuan Kristiano et kailangan day mankakasakey ed papanisiaan da. (Efeso 4:1-3, 16) Niwala labat itan ya pankakasakey no saksakey ya Katawan so tutumboken da, si Jesus-Kristo; no pareho so panisiaan o pakatalos da ed saray ibabangat na Biblia; tan no tumboken da so ibabaga na Biblia ya kaukolan a gawaen na sakey antis ya nabautismoan.

Pinaseseg nen apostol Pablo so arum ya manpabautismo lamet ira. Say rason et nampabautismo ira nensaman balet ta agda atalosan iray Kristianon bangat.—Gawa 19:1-5.

No iner dapat akabase so pampabautismo. Pian awaten na Dios so bautismo na sakey, dapat akabase itan ed “suston kakabatan ed katuaan” ya walad Biblia. (1 Timoteo 2:3, 4) No say sakey et abautismoan ed relihyon ya say ibabangat da et aga akabase ed Biblia, ag-itan awaten na Dios. (Juan 4:23, 24) Tua, maong so intension to ed impanpabautismo to, balet aliwa itan ya “unong ed suston kakabatan.” (Roma 10:2) Kanian pian awaten na Dios so panagdayew to, kaukolan ton aralen so katuaan ed Biblia, iyaplika iray naaralan to, idedika toy sarili to ed Dios, tan manpabautismo lamet. No ontan so situasyon, aliwan kasalanan so pambautismo lamet. Imbes, atan so dugan gawaen to.

Arum ed saray bautismo ya abitla ed Biblia

Diad Biblia, wala ni arum ya labay ya ibaga na bautismo, likud ed pangipalseb ed saray papatumbok nen Kristo. Nia ray pigaran alimbawa.

Impanbautismo nen Juan Bautista. e Nampabautismo iray Judio tan Judion proselita ed si Juan pian ipanengneng ya nagbabawian da la ray kasalanan da lapud agda inunor so Mosaikon Ganggan—say Ganggan ya inter na Dios ed si Moises ya parad saray Israelita. Akatulong so impanbautismo nen Juan pian niparaan iray totoo ya nabidbir tan naawat so Mesias—si Jesus a taga Nazaret.—Lucas 1:13-17; 3:2, 3; Gawa 19:4.

Bautismo nen Jesus. Nikadkaduma so impanpabautismo nen Jesus ed si Juan Bautista. Perpekto si Jesus tan anggapon balot so kasalanan to. (1 Pedro 2:21, 22) Kanian agto kaukolan so magbabawi odino ‘onkerew ed Dios na malinis a konsiensia.’ (1 Pedro 3:21) Imbes, sikatoy nampabautismo pian ipanengneng ya mabulos ton gawaen so panlabayan na Dios bilang say insipan ya Mesias, odino Kristo. Kaibad satan so pangiter toy bilay to parad sikatayo.—Hebreo 10:7-10.

Bautismo ed masanton espiritu. Binitla nen Juan Bautista tan si Jesu-Kristo so tungkol ed bautismo ed masanton espiritu. (Mateo 3:11; Lucas 3:16; Gawa 1:1-5) Duma itan ed samay bautismo ed ngaran na masanton espiritu. (Mateo 28:19) Akin ey?

Limitado labat so bilang na saray papatumbok nen Jesus ya nabautismoan ed masanton espiritu. Nilanaan ira na masanton espiritu pian manlingkor ira ed tawen bilang saserdote tan arari. f (1 Pedro 1:3, 4; Apocalipsis 5:9, 10) Uleyan da iray minilyon ya papatumbok nen Jesus ya say ilalo ra et manbilay na andi-anggaan diad Paraison dalin.—Mateo 5:5; Lucas 23:43.

Bautismo ed si Kristo Jesus tan ed ipapatey to. Saramay abautismoan ed masanton espiritu et “abautismoan [met] ed si Kristo Jesus.” (Roma 6:3) Kanian ayan bautismo et parad saray alanaan ya papatumbok nen Jesus ya kaiba ton manuley diad tawen. Lapud bautismo da ed si Jesus, nagmaliw iran kaiba ed alanaan ya kongregasyon to. Si Jesus so Ulo, tan sikara so laman.—1 Corinto 12:12, 13, 27; Colosas 1:18.

Saray alanaan ya Kristiano et “abautismoan [met] ed ipapatey [nen Jesus].” (Roma 6:3, 4) Aaligen da si Jesus, iyuuna dad bilay da so pangunor tan pamaliket ed Dios nen say sarili da, tan amta ra ya aliwan diad dalin so pambilayan da na andi-anggaan. Nibagan asumpal da iyan klase na bautismo no inatey la ra tan apaoli la rad tawen bilang espiritun pinalsa.—Roma 6:5; 1 Corinto 15:42-44.

Bautismo ed apoy. Oniay imbaga nen Juan Bautista ed saray katongtong to: “[Si Jesus] so manbautismo ed sikayo ed masanton espiritu tan ed apoy. Sankabembenan to lay pala a panagtaep to, tan linisan ton maong so panag-ilikan to tan tiponen tod kamalir so trigo to, balet poolan toy taep diad agnaerep ya apoy.” (Mateo 3:11, 12) Kasin naimano yo so pandumaan na bautismo ed apoy tan bautismo ed masanton espiritu? Antoy labay ya ibaga nen Juan ed ilustrasyon to?

Say trigo et ontutukoy ed saramay ondengel tan onunor ed si Jesus. Walay pankanawnawa dan nabautismoan ed masanton espiritu. Aman balet so taep et isisimbolo to iramay ag-ondengel ed si Jesus. Nabautismoan ira ed apoy—naderal ira tan anggapo lay ilalo ra.—Mateo 3:7-12; Lucas 3:16, 17.

Saray lingon papanisiaan tungkol ed Kristianon bautismo

Lingon papanisiaan: Ayos labat so panwisik o pangikalboy danum ed ulo na sakey, anggano agla ipalaseb o ilubog ed danum.

No antoy duga: Diad Biblia, amin ya abautismoan et impalseb o inlubog ed danum. (Mateo 3:13, 16; Gawa 8:36-39) Anggapoy anggan sakey ya winisikan labat. g Agnipanengneng na panwisik so kabaliksan na pangipalseb ed danum—ya say sakey ya abautismoan et inatey la ed datin paraan na kabibilay to tan gapoan to lay manbilay bilang dedikadon lingkor na Dios.

Lingon papanisiaan: Nen imbaga na Biblia ya abautismoan imay guardia “tan say sankaabungan [to],” di kaiba ed abautismoan iray kapangiyanak ya ugaw.—Gawa 16:25, 31-34.

No antoy duga: Diad tua, anggapoy abitlan edad. Sakey ni, antis ya nabautismoan imay guardia tan say sankaabungan to, amta da la tan inawat da lay “salita nen Jehova.” (Gawa 16:31, 32, 34) Kanian mapatnag ya wala la rad dugan edad pian natalosan so nangel da tan panisiaan so Dios tan si Jesus.

a Base ed Vine’s Complete Expository Dictionary of Old and New Testament Words, say labay ya ibaga na Griegon salita ya impatalos ya “bautismo” et “pangipalseb ed danum, kompleton pangilubog ed danum, tan iyimwas ed danum.”

b Say “christening” et seremonya ya gagawaen na arum ya simbaan pian ikdan na ngaran so kapangiyanak ya ugaw insan da “binyagan” diad panwisik o pangikalboy danum ed ulo to.

c Jehova so personal a ngaran na Dios. (Salmo 83:18) Nengnengen so artikulo ya “Siopa si Jehova?”

d Nengnengen so artikulo ya “Anto so Masanton Espiritu?”

e Nengnengen so artikulo ya “Sino si Juan Bautista?”

f Nengnengen so artikulo ya “Siopa ray Onlad Tawen?”

g Diad Biblia, say salitan impatalos ya “bautismo” et nayarin ontukoy met ed saray seremonyal ya panaglinis, singa say pangikalboy danum ed saray gamit ya uusaren ed panagdayew. (Marcos 7:4; Hebreo 9:10, paimanod leksab) Pero siempre, duma iya ed samay impanpalseb ed si Jesus tan ed saray papatumbok to.