Genesis 16:1-16

  • Hagar ken Ismael (1-16)

16  Awan pay idi ti anak+ ni Sarai nga asawa ni Abram, ngem adda adipenna nga Egipcio nga agnagan iti Hagar.+  Gapuna, kinuna ni Sarai ken ni Abram: “Saan nga impalubos ni Jehova a maaddaanak iti anak. Pangngaasim ta makidennaka iti adipenko a babai. Bareng maaddaanak iti anak babaen kenkuana.”+ Pinatgan ni Abram ti kiddaw ni Sarai.  Kalpasan ti 10 a tawen a panagnaed ni Abram idiay Canaan, inted ni Sarai ken ni Abram ti Egipcio nga adipenna a ni Hagar kas asawana.  Dinennaan ni Abram ni Hagar ket nagsikog. Idi naammuan ni Hagar a masikogen, timmangsit ket inumsina ni Sarai.  Gapuna, kinuna ni Sarai ken ni Abram: “Sika ti makagapu iti pannakalaisko. Intedko kenka* ti adipenko, ket idi naammuanna a masikog, rinugiannak nga umsien. Ni koma Jehova ti mangikeddeng no asino ti umiso kadata.”  Kinuna ni Abram ken ni Sarai: “Adipenmo ti babai. Aramidem ti pagarupem a nasayaat.” Kalpasanna, imbabain ni Sarai ni Hagar, isu a nagtalaw.  Di nagbayag, adda anghel ni Jehova a nangsabat kenkuana iti maysa nga ubbog iti let-ang, iti dalan nga agturong idiay Sur.+  Kinuna ti anghel: “Hagar nga adipen ni Sarai, naggapuam ken sadino ti papanam?” Insungbat ni Hagar: “Tinalawak ni Sarai nga apok.”  Iti kasta, kinuna ti anghel ni Jehova: “Agsublika ken apom ket agpakumbabaka kenkuana.” 10  Imbaga pay ti anghel ni Jehova: “Paaduekto ti kaputotam,* ket saanto a mabilang ti kaaduda.”+ 11  Kinuna pay ti anghel ni Jehova: “Masikogka ita ket mangipasngaykanto iti maysa a lalaki. Panaganamto iti Ismael,* ta nangngeg ni Jehova ti panagrigatmo. 12  Agbalinto a kasla iti atap nga asno.* Kabusornanto ti amin, ken bumusorto kenkuana ti amin, ket agnaedto iti asideg dagiti kakabsatna.”* 13  Iti kasta, immawag iti nagan ni Jehova, a makisarsarita idi kenkuana: “Maysaka a Dios a makakita iti amin,”+ ta kinunana: “Nakitak a mismo daydiay makakitkita kaniak.” 14  Dayta ti makagapu a naawagan dayta a bubon iti Beer-lahai-roi.* (Adda iti nagbaetan ti Kades ken Bered.) 15  Idi agangay, impasngay ni Hagar ti anak a lalaki ni Abram ket pinanaganan ni Abram iti Ismael.+ 16  Agtawen ni Abram iti 86 idi impasngay ni Hagar ni Ismael.

Footnotes

Lit., “iti saklotmo.”
Lit., “bin-im.”
Kaipapananna, “Dinengngeg ti Dios.”
Wenno “onager,” maysa a kita ti atap nga asno, nupay adda mangipagarup a maysa a sebra. Nalabit tumukoy iti kababalin a managbukbukod.
Wenno mabalin a, “saanto a natalna ti pannakipagnaedna iti amin a kakabsatna.”
Kaipapananna, “Bubon Daydiay Sibibiag ken Makakitkita Kaniak.”