Salmo 85:1-13
Maipaay iti mangiwanwanwan. Ti annak ni Kore. Samiweng.
85 Naragsakanka, O Jehova, iti dagam;+Insublim dagidiay nakautibo ken Jacob.+
2 Pinakawanmo ti biddut ti ilim;+Inabbongam ti isuamin a basolda.+ Selah.
3 Minedmedam ti isuamin a rungsotmo;+Nagbaw-ingka manipud iti bara ti ungetmo.+
4 Urnongennakami nga isubli, O Dios ti pannakaisalakanmi,+Ket isardengmo ti panagluksawmo kadakami.+
5 Agingga aya iti tiempo a di nakedngan nga agpungtotkanto unay kadakami?+Padanonemto aya ti ungetmo iti kinapkaputotan?+
6 Sika saannakamto aya a biagen manen,+Tapno makapagrag-o kenka ti mismo nga ilim?+
7 Ipakitam kadakami, O Jehova, ti naayat a kinamanangngaasim,+Ket ti panangisalakanmo itdem koma kadakami.+
8 Denggekto no ania ti sawen ti pudno a Dios a ni Jehova,+Ta sawennanto ti talna iti ilina+ ken kadagidiay nasungdona,Ngem saanda koma nga agsubli iti panagtalek iti bagi.+
9 Sigurado a ti panangisalakanna asideg kadagidiay agbuteng kenkuana,+Tapno ti dayag agtaeng iti dagatayo.+
10 No maipapan iti naayat a kinamanangngaasi ken kinapudno, nagsinnabetda;+Ti kinalinteg ken talna—naginnagepda.+
11 Ti met laeng kinapudno agtubonto manipud iti mismo a daga,+Ket ti met laeng kinalinteg tumannawagto manipud iti mismo a langlangit.+
12 Kasta met, ni Jehova, iti biangna, itdennanto ti naimbag,+Ket ti bukodtayo a daga ipaaynanto ti bungana.+
13 Iti sanguananna magnanto ti mismo a kinalinteg,+Ket mangaramidto dayta iti dalan babaen kadagiti addangna.+
