Salmo 38:1-22
Samiweng ni David, tapno mangipalagip.
38 O Jehova, saannak a tubngaren iti rurodmo,+Saannak met a lintegen iti pungtotmo.+
2 Ta dagiti bukodmo a pana limmumlomda a nakaun-uneg kaniak,+Ket bumaba kaniak ta imam.+
3 Awan ti nasalun-at a paset iti lasagko gapu iti panangkondenarmo.+Awan ti talna kadagiti tulangko maigapu iti basolko.+
4 Ta dagiti bukodko a biddut limmasatda iti ngatuen ti ulok;+Kas iti maysa a nadagsen nga awit nadagsenda unay maipaay kaniak.+
5 Dagiti sugatko bimmangsitda, immabayada,Gapu iti kinamaagko.+
6 Malagawanak idi, naparukobak iti napalalo;+Iti intero nga agmalem nagpagnapagnaak a sililiday.+
7 Ta dagiti mismo a lomok napno iti pannakasinit,Ket awan ti nasalun-at a paset iti lasagko.+
8 Nabibinegak ken nailupitlupitak iti napalalo;Nagungorak gapu iti panagasug ti pusok.+
9 O Jehova, iti sanguanam adda ti isuamin a tarigagayko,Ket manipud kenka saan a nailinged ti mismo a panagsennaayko.+
10 Ti bukodko a puso naggutok iti nakaro, ti bilegko pinanawannak,Ket ti met lawag dagiti bukodko a mata awan kaniak.+
11 No maipapan kadagiti managayat kaniak ken kadagiti kakaduak, agtalinaedda a sitatakder iti adayo manipud saplitko,+Ket dagiti met laeng nasinged nga am-ammok nagtakderda iti adayo.+
12 Ngem dagidiay mangsapsapul iti kararuak agipakatda kadagiti silo,+Ket dagidiay agar-aramid iti pakadidigraak nagsaoda kadagiti panagrigat,+Ket iti intero nga agmalem mangidaydayamudomda kadagiti panangallilaw.+
13 No maipapan kaniak, kas iti maysa a tuleng, saanak nga umimdeng;+Ket kas iti maysa nga umel, saanko a luktan ti ngiwatko.+
14 Ket nagbalinak a kas iti tao a saan a makangngeg,Ket iti ngiwatko awan idi dagiti pangbales nga argumento.
15 Ta kenka, O Jehova, nagurayak;+Sika simmungbatka, O Jehova a Diosko.+
16 Ta kinunak: “No saan a kasta agrag-oda kaniak;+No ti sakak nagkaglis,+ pudno unay nga agpasawda maibusor kaniak.”+
17 Ta nakasaganaak nga agpigsol,+Ket ti ut-otko adda idi a patinayon iti sanguanak.+
18 Ta imbagak ti maipapan iti bukodko a biddut;+Nangrugiak a maringgoran gapu iti basolko.+
19 Ket bimmileg dagiti kabusorko a sibibiag,+Ket immadu dagidiay manggurgura kaniak nga awan ti rason.+
20 Ket ginunggonaandak iti dakes kas subad ti naimbag;+Binusbusordak kas supapak ti panangsurotko ti naimbag.+
21 Saannak a panawan, O Jehova.O Diosko, dika agtalinaed nga adayo kaniak.+
22 Agganatka iti panangtulong kaniak,+O Jehova a pakaisalakanak.+
