Salmo 129:1-8
Kanta dagiti Panagsang-at.
129 “Nakabaybayagen a nangipakitada kaniak iti panangbusor manipud kinaagtutubok,”+Kunaen koma ita ti Israel,+
2 “Nakabaybayagen a nangipakitada kaniak iti panangbusor manipud kinaagtutubok;+Kaskasdi a saanda a nagballigi kaniak.+
3 Dagiti agar-arado nagaradoda iti mismo a bukotko;+Inyatiddogda dagiti gulisda.”
4 Ni Jehova nalinteg.+Pinugsapugsatna dagiti tali dagidiay nadangkes.+
5 Mabainandanto ket pagsanudenda ti bagbagida,+Amin dagidiay manggurgura iti Sion.+
6 Agbalindanto kas berde a ruot kadagiti atep,+A nagangon sakbay a naparut,+
7 Nga iti dayta ti managani saanna a pinunno ti bukodna nga ima,+Ti asinoman nga agur-urnong kadagiti binettek saanna met a pinunno ti bukodna a saklot.
8 Saan met a kinuna dagidiay lumablabas:“Ti bendision ni Jehova maadda koma kadakayo.+Binendisionandakayo iti nagan ni Jehova.”+
