Salmo 24:1-10
Ni David. Samiweng.
24 Kukua ni Jehova ti daga ken ti linaonna,+Ti nabunga a daga ken dagidiay agnanaed iti dayta.+
2 Ta iti rabaw dagiti baybay isu insaadna a sititibker dayta,+Ket iti rabaw dagiti karayan pagtalinaedenna dayta a naipasdek a sititibker.+
3 Siasino ti mabalin a sumang-at iti bantay ni Jehova,+Ket siasino ti mabalin a tumakder iti nasantuan a dissona?+
4 Ti asinoman nga awanan basol ti im-imana ken nadalus ti pusona,+A saan a nangawit iti kararuak nga agturong iti bin-ig a kinaawan pateg,+Wenno uray nagsapata buyogen ti panangallilaw.+
5 Mangalanto iti bendision manipud ken Jehova+Ken kinalinteg manipud Dios ti pannakaisalakanna.+
6 Daytoy ti kaputotan dagidiay mangsapsapul kenkuana,Dagidiay mangbirbirok iti rupam, O [Dios ni] Jacob.+ Selah.
7 “Itangadyo dagiti uloyo, O dakayo a ruangan,+Ket tumakderkayo, O dakayo a manayon a pagserkan,+Tapno sumrek koma ti nadayag nga Ari!”+
8 “Siasino, ngarud, daytoy nadayag nga Ari?”+“Ni Jehova a napigsa ken mannakabalin,+Ni Jehova a mannakabalin iti bakal.”+
9 “Itangadyo dagiti uloyo, O dakayo a ruangan;+Wen, itangadyo ida, O dakayo a manayon a pagserkan,Tapno sumrek koma ti nadayag nga Ari!”+
10 “Siasino, ngarud, isuna, daytoy nadayag nga Ari?”“Ni Jehova ti buybuyot—isu ti nadayag nga Ari.”+ Selah.
