Salmo 18:1-50
Iti mangiwanwanwan. Ti adipen ni Jehova, ni David, a nangisao ken Jehova ti sasao daytoy a kanta iti aldaw a panangispal kenkuana ni Jehova iti dakulap dagiti amin a kabusorna ken iti ima ni Saul.+ Ket kinunana:
18 Maaddaanakto iti panagayat kenka, O Jehova a pigsak.+
2 Ni Jehova ti napasdok a batok ken salindegko ken Manangilisi kaniak.+Ti Diosko isu ti batok. Agkamangakto kenkuana,+Kalasagko ken sara ti pannakaisalakanko, natalged a kamangko.+
3 Iti Daydiay maidaydayaw, ni Jehova, umawagakto,+Ket manipud kadagiti kabusorko maisalakanakto.+
4 Dagiti tali ni patay pinalawlawandak;+Dagiti dumaruros a panaglayus ti awan kaes-eskanna a tattao pinagkulkullayawdak met.+
5 Dagiti mismo a tali ti Sheol pinalikmutandak;+Dagiti silo ni patay sinangodak.+
6 Iti pannakaparigatko immaw-awagak ken Jehova,Ket iti Diosko nagpatpatulongak.+Manipud templona nangngegna ti timekko,+Ket ti mismo a panagpatulongko iti sanguananna dimteng ita kadagiti lapayagna.+
7 Ket ti daga nangrugi nga agkintayeg ken agyugayog,+Ket dagiti met laeng pamuon ti bambantay nadayyegda,+Ket nagkinkintayegda gapu ta isu napagunget.+
8 Nagpangato ti asuk kadagiti abut ti agongna, ket ti met laeng apuy manipud ngiwatna nangal-alun-on;+Dagiti met laeng beggang gimmil-ayabda manipud kenkuana.
9 Ket pinagbayukyokna ti langlangit ket bimmaba.+Ket ti napuskol a daguyemyem adda iti baba dagiti sakana.
10 Ket immay a sisasakay iti rabaw ti maysa a kerubin ket immay a nagtaytayab,+Ket immay a simiag iti rabaw dagiti payak ti maysa nga espiritu.+
11 Idin ti sipnget pinagbalinna a paglemmenganna a lugar,+Iti intero nga aglikmutna kas abong-abongna,Nasipnget a dandanum, napuskol nga ul-ulep.+
12 Manipud ti kinaraniag iti sangona adda dagiti ulepna a limmabas,+Uraro ken dagiti sumsumged a beggang ti apuy.+
13 Ket iti langlangit nangrugi nga aggurruod ni Jehova,+Ket ti met laeng Kangatuan rinugianna nga iyesngaw ti timekna,+Uraro ken dagiti sumsumged a beggang ti apuy.
14 Ket nangibibiat kadagiti panana, tapno maiwarawarana ida;+Ket nangibiat kadagiti kimat, tapno mariribukna ida.+
15 Ket dagiti lansad ti dandanum nagparangda,+Ket dagiti pamuon ti nabunga a daga nalukasan+Manipud pammabalawmo, O Jehova, manipud iti pug-aw ti anges dagiti abut ti agongmo.+
16 Nagbaon manipud ngato, innalanak,+Inaonnak iti dadakkel a dandanum.+
17 Inispalnak iti napigsa a kabusorko,+Ken kadagidiay manggurgura kaniak; agsipud ta napigpigsada ngem siak.+
18 Sinangsangodak iti aldaw ti pannakadidigrak,+Ngem ni Jehova nagbalin a kas saranay kaniak.+
19 Ket inruarnak nga impan iti nalawa a lugar;+Inalawnak, agsipud ta naragsakan kaniak.+
20 Gunggonaannak ni Jehova maitunos iti kinalintegko;+Maitunos iti kinadalus dagiti imak supapakannak.+
21 Ta sinalimetmetak ti daldalan ni Jehova,+Ket saanak a sidadangkes a simmina iti Diosko.+
22 Ta amin dagiti hudisial a pangngeddengna adda iti sangok,+Ket dagiti paglinteganna saankonto nga ikkaten kaniak.+
23 Ket paneknekakto ti bagik nga awan pagkuranganna kenkuana,+Ket aluadakto ti bagik manipud biddut iti biangko.+
24 Ket supapakannak koma ni Jehova maitunos iti kinalintegko,+Maitunos iti kinadalus dagiti imak iti sanguanan dagiti matana.+
25 Iti daydiay nasungdo agtignaykanto a sisusungdo;+Iti awan pagkuranganna, nabaneg a lalaki makilangenkanto nga awan pagkuranganna;+
26 Iti daydiay agtaltalinaed a nadalus agparangkanto a nadalus;+Ket iti daydiay nakillo agparangkanto a killo;+
27 Agsipud ta sika isalakanmonto ti naparigatan nga ili;+Ngem dagiti natangsit a mata ipababamto.+
28 Ta sika gangtamto ti pagsilawak, O Jehova;+Ti met laeng Diosko pagsilnagennanto ti kinasipngetko.+
29 Ta babaen kenka makapagtarayak a sumaranget iti buyot dagiti tulisan;+Ket babaen ti Diosko makakalay-atak iti pader.+
30 No maipapan iti pudno a Dios, perpekto ti dalanna;+Ti sasao ni Jehova ket napasudi.+Isu maysa a kalasag kadagidiay amin nga agkamang kenkuana.+
31 Ta siasino ti Dios malaksid ken Jehova?+Ket siasino ti bato malaksid iti Diostayo?+
32 Ti pudno a Dios isu Daydiay mangbarbarikes a siiirut kaniak iti kired,+Ket ipalubosnanto ti dalanko nga agbalin a perpekto,+
33 Mamagbalin kadagiti sakak a kas iti saksaka dagiti kabaian nga ugsa,+Ket iti rabaw dagiti disso a nangato maipaay kaniak pagtalinaedennak a sitatakder.+
34 Isursurona dagiti imak maipaay iti pannakigubat,+Ket dagiti takiagko nangitalmeg iti bai a gambang.+
35 Ket itedmonto kaniak ti mangisalakan a kalasagmo,+Ket ti mismo a makannawan nga imam saranayennakto,+Ket ti mismo a kinapakumbabam pagbalinennakto a naindaklan.+
36 Mangaramidkanto iti lugar nga umdas ti kalawana maipaay kadagiti addangko iti babaek,+Ket sigurado a saanto nga agkalog dagiti palaypalayko.+
37 Kamatekto dagiti kabusorko ket kamakamek ida;Ket saanakto nga agsubli agingga a matalipuposda.+
38 Rumrumekekto ida tapno iti kasta saandanto a kabaelan ti bumangon;+Mapasagdanto iti baba dagiti sakak.+
39 Ket bariksannakto iti kired maipaay iti pannakigubat;Kusbuemto iti babaek dagidiay tumakder a bumusor kaniak.+
40 Ket no maipapan kadagiti kabusorko, sigurado nga itedmonto kaniak ti teltelda;+Ket no maipapan kadagidiay nakaro ti pananggurada kaniak, pagulimekekto ida.+
41 Agpatulongda, ngem awan ti manangisalakan,+Ken Jehova, ngem pudno a saanna a sungbatan ida.+
42 Ket begbegekto ida iti napino a kas iti tapok iti sanguanan ti angin;+Kas iti pitak dagiti kalsada ibuyatkonto ida.+
43 Ilisinakto iti panagsapul-biddut dagiti umili.+Dutokannakto a pannakaulo dagiti nasion.+Maysa nga ili a saanko a naammuan—agserbidanto kaniak.+
44 Iti alimadamad laeng natulnogdanto kaniak;+Dagiti met laeng ganggannaet umaydanto nga agtulmeng kaniak.+
45 Dagiti met laeng ganggannaet aglumendanto,Ket rummuardanto nga agpigpigerger manipud kadagiti baluarteda.+
46 Sibibiag ni Jehova,+ ket bendito koma ti Batok,+Ket maitan-ok koma ti Dios ti pannakaisalakanko.+
47 Ti pudno a Dios isu ti Manangipaay kaniak iti ar-aramid ti pammales;+Ket parukmaenna dagiti ili iti babaek.+
48 Ilislisinak kadagiti naunget a kabusorko;+Iti ngatuen dagidiay tumakder a bumusor kaniak ingatonakto,+Manipud iti tao ti kinaranggas ispalennakto.+
49 Dayta ti makagapu nga idayawkanto iti tengnga dagiti nasion, O Jehova,+Ket iti naganmo mangipaayakto iti samiweng.+
50 Isu agar-aramid iti naindaklan nga ar-aramid ti panangisalakan maipaay iti arina+Ken mangwatwatwat iti naayat a kinamanangngaasi iti daydiay pinulotanna,+Ken David ken iti bin-ina agingga iti tiempo a di nakedngan.+
