Salmo 12:1-8
Iti mangiwanwanwan iti makimbaba nga oktaba.+ Samiweng ni David.
12 Isalakannak,+ O Jehova, ta daydiay nasungdo nagngudon;+Ta dagiti matalek a tattao nagpukawdan iti annak ti tattao.
2 Ti di kinapudno sasawenda iti maysa ken maysa;+Babaen iti nalamuyot a bibig+ agsasaoda uray pay buyogen ti siping a puso.+
3 Gessatento ni Jehova dagiti amin a nalamuyot a bibig,Ti dila nga agsasao iti naindaklan a bambanag,+
4 Dagidiay a nagkuna: “Babaen iti dilami mangabakkaminto.+Adda kadakami dagiti bibigmi. Siasinonto ti apo maipaay kadakami?”
5 “Gapu iti panagagaw manipud kadagidiay naparigatan, gapu iti panagsennaay dagidiay napanglaw,+Iti daytoy a tiempo tumakderakto,” kuna ni Jehova.+“Isu ikabilkonto iti kinatalged manipud asinoman a mangpugso kenkuana.”+
6 Ti sasao ni Jehova nasin-aw a sasao,+Kas iti pirak a napasudi iti pagtunawan nga urno iti daga, napasin-aw iti mamimpito.
7 Sika, O Jehova, saluadamto ida;+Italimengmonto ti tunggal maysa manipud itoy a kaputotan agingga iti tiempo a di nakedngan.
8 Dagidiay nadangkes magnada iti intero nga aglikmut,Agsipud ta ti nakaro a kinadakes maitan-ok iti tengnga ti annak ti tattao.+
